ತಂದೆ ಸ್ಥಿರವಾಗಿದ್ದಾರೆ: ರಾಜು ಶ್ರೀವಾಸ್ತವ ಪುತ್ರಿ ಅಂತರಾ ಹೇಳಿಕೆ

ನವದೆಹಲಿ: ಹೃದಯಾಘಾತದಿಂದ ಹದಿನೈದು ದಿನಗಳಿಂದ ಏಮ್ಸ್‌ನ ತೀವ್ರ ನಿಗಾ ಘಟಕದಲ್ಲಿರುವ ಜನಪ್ರಿಯ ಹಾಸ್ಯ ನಟ ರಾಜು ಶ್ರೀವಾಸ್ತವ ಅವರು ಸ್ಥಿರವಾಗಿದ್ದಾರೆ ಆದರೂ ಪ್ರಜ್ಞಾಹೀನ ಸ್ಥಿತಿಯಲ್ಲಿದ್ದಾರೆ ಎಂದು ಅವರ ಪುತ್ರಿ ಗುರುವಾರ ಹೇಳಿದ್ದಾರೆ.

ಆಗಸ್ಟ್ 10 ರಂದು ಹೃದಯಾಘಾತಕ್ಕೆ ಒಳಗಾದ ನಂತರ 58 ವರ್ಷದ ರಾಜು ಶ್ರೀವಾಸ್ತವ ಅವರನ್ನು ಆಲ್ ಇಂಡಿಯಾ ಇನ್‌ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸಸ್ ಗೆ ದಾಖಲಿಸಲಾಗಿತ್ತು ,ಅದೇ ದಿನ ಆಂಜಿಯೋಪ್ಲ್ಯಾಸ್ಟಿಗೆ ಒಳಗಾಗಿದ್ದರು.

“ಅವರು ಸ್ಥಿರವಾಗಿದ್ದಾರೆ ಮತ್ತು ಇನ್ನೂ ಪ್ರಜ್ಞಾಹೀನರಾಗಿದ್ದಾರೆ. ವೈದ್ಯರು ಅವರಿಗೆ ಚಿಕಿತ್ಸೆ ನೀಡುತ್ತಿದ್ದಾರೆ ಎಂದು ಶ್ರೀವಾಸ್ತವ್ ಅವರ ಪುತ್ರಿ ಅಂತರಾ ಪಿಟಿಐಗೆ ತಿಳಿಸಿದ್ದಾರೆ.

ಕಳೆದ ವಾರ ಅವರ ಹದಗೆಟ್ಟ ಆರೋಗ್ಯದ ವರದಿಗಳ ಮಧ್ಯೆ, ಅವರ ಪತ್ನಿ ಶಿಖಾ ಅವರು ಶ್ರೀವಾಸ್ತವ್ ಅವರು “ಹೋರಾಟಗಾರ” ಮತ್ತು ಅವರು ಬಲವಾಗಿ ಹಿಂತಿರುಗುತ್ತಾರೆ ಎಂದು ಹೇಳಿದ್ದರು.

ಕುಟುಂಬದ “ಸ್ಥೈರ್ಯ” ದ ಮೇಲೆ ಪರಿಣಾಮ ಬೀರುವ ವದಂತಿಗಳನ್ನು ಹರಡದಂತೆ ಶಿಖಾ ಮಾಧ್ಯಮಗಳು ಮತ್ತು ಅಭಿಮಾನಿಗಳಿಗೆ ವಿನಂತಿಸಿದ್ದರು.