ಕೋವಿಡ್-19 ಎದುರಿಸಲು ರೈಲ್ವೇ ಐಸೋಲೇಶನ್‌ ಬೋಗಿ ಸಿದ್ಧ: ನಳಿನ್‌

ಮಂಗಳೂರು: ಕೋವಿಡ್-19 ನಿಯಂತ್ರಿಸುವ ಸಲುವಾಗಿ ರೈಲ್ವೇ ಇಲಾಖೆ ಮಂಗಳೂರು ಸೆಂಟ್ರಲ್‌ ರೈಲು ನಿಲ್ದಾಣದಲ್ಲಿ ಸಿದ್ಧಪಡಿಸಿರುವ “ಕೋವಿಡ್‌-19 ಐಸೋಲೇಶನ್‌ ಬೋಗಿ’ಯನ್ನು ಸಂಸದ ನಳಿನ್‌ ಕುಮಾರ್‌ ಕಟೀಲು ಹಾಗೂ ಶಾಸಕ ವೇದವ್ಯಾಸ ಕಾಮತ್‌ ರವಿವಾರ ಪರಿಶೀಲಿಸಿದರು.

ಸುದ್ದಿಗಾರರ ಜತೆಗೆ ಮಾತನಾಡಿದ ಸಂಸದ ನಳಿನ್‌, ರೈಲ್ವೇ ಸಚಿವರಾದ ಪಿಯೂಷ್‌ ಗೋಯಲ್‌ ಹಾಗೂ ಸುರೇಶ್‌ ಅಂಗಡಿ ಅವರ ಪ್ರಯತ್ನಕ್ಕೆ ಪೂರಕವಾಗಿ ಪಾಲ್ಗಟ್‌ ವಿಭಾಗವು ನಿಗದಿತ ಅವಧಿಗಿಂತ ಮುಂಚೆಯೇ 32 ಕೋಚ್‌ಗಳನ್ನು ಸಿದ್ಧಪಡಿಸಿದೆ. ಈ ಪೈಕಿ 20ನ್ನು ಮಂಗಳೂರಿಗೆ ಮೀಸಲಿಡಲಾಗಿದೆ. ಇವುಗಳಲ್ಲಿ ಒಟ್ಟು 320 ಬೆಡ್‌ಗಳಿವೆ ಎಂದರು.

ಕೋವಿಡ್-19 ಎದುರಿಸಲು ಜಿಲ್ಲಾಡಳಿತ ಎಲ್ಲ ಸಿದ್ಧತೆ ನಡೆಸಿದೆ. ಆಸ್ಪತ್ರೆಗಳಲ್ಲಿ ಪೂರಕ ವ್ಯವಸ್ಥೆ ಮಾಡಲಾಗಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ ರೈಲ್ವೇ ಐಸೋಲೇಶನ್‌ ಕೋಚ್‌ ಸಿದ್ಧಪಡಿಸಲಾಗಿದೆ. ಇದನ್ನು ಇಲ್ಲಿ ಬಳಕೆ ಮಾಡಬಹುದು ಅಥವಾ ಹೆಚ್ಚು ಪ್ರಕರಣಗಳಿರುವ ಕೇರಳ, ಕಾಸರಗೋಡಿಗೂ ಕಳುಹಿಸಬಹುದು. ಒಂದು ಕೋಚ್‌ನಲ್ಲಿ ಆಕ್ಸಿಜನ್‌ ವ್ಯವಸ್ಥೆ ಇದೆ. ಒಂದು ಕೋಚ್‌ ಪ್ಯಾರಾ ಮೆಡಿಕಲ್‌ಗೆ ಮೀಸಲಿಡಲಾಗಿದೆ. ರೈಲು ಸೇವೆ ಆರಂಭಗೊಂಡಾಗ ಕಂಕನಾಡಿಯ ಜಂಕ್ಷನ್‌ ರೈಲ್ವೇ ನಿಲ್ದಾಣದಲ್ಲಿ ಪ್ರತ್ಯೇಕ ಸ್ಥಳದಲ್ಲಿ ಇಡುತ್ತೇವೆ ಎಂದು ಹೇಳಿದರು. ರೈಲ್ವೇ ಇಲಾಖೆಯ ಕೋಚಿಂಗ್‌ ಡಿಪೊ ಮ್ಯಾನೇಜರ್‌ ರಾಜೇಶ್‌ ಕುಮಾರ್‌ ಮೀನಾ, ಏರಿಯಾ ಆಫೀಸರ್‌ ಶ್ರೀಧರನ್‌, ಎಸ್‌ಎಂಆರ್‌ ರಾಮಕುಮಾರ್‌, ಎಸ್‌ಎಸ್‌ಇ ಪ್ರವೀಣ್‌ ಉಪಸ್ಥಿತರಿದ್ದರು.

7 ದಿನಗಳಿಂದ ಪಾಸಿಟಿವ್‌ ಇಲ್ಲ
ದೇಶದ ಕೊರೊನಾ ಹೋರಾಟದ ಸಂದರ್ಭದಲ್ಲಿ ಮಂಗಳೂರಿನಲ್ಲಿ ನಾವು ಮೊದಲು ಸಭೆ ಮಾಡಿದ್ದೇವೆ. ವೆನ್ಲಾಕ್ ಆಸ್ಪತ್ರೆಯನ್ನು ಕೊರೊನಾ ಚಿಕಿತ್ಸೆಗಾಗಿ ಮೀಸಲಿಟ್ಟೆವು. ತಲಪಾಡಿ ಗಡಿ ಬಂದ್‌ನಂಥ ಕಠಿನ ಕ್ರಮ ಕೈಗೊಂಡೆವು. ಇದರಿಂದ ಬಹುತೇಕ ನಿಯಂತ್ರಣ ಆಗಿದೆ. ಪಾಸಿಟಿವ್‌ ಆಗಿದ್ದವರು ಡಿಸಾcರ್ಜ್‌ ಆಗುತ್ತಿದ್ದಾರೆ. ಏಳು ದಿನಗಳಿಂದ ಪಾಸಿಟಿವ್‌ ಪ್ರಕರಣಗಳು ಬಂದಿಲ್ಲ. ಇದಕ್ಕಾಗಿ ಎಲ್ಲ ಆಸ್ಪತ್ರೆಗಳ ಮುಖ್ಯಸ್ಥರು, ವೈದ್ಯರು, ನರ್ಸ್‌ಗಳು, ಸಿಬಂದಿ, ಪೊಲೀಸರು ಮತ್ತು ಸಾರ್ವಜನಿಕರಿಗೆ ಅಭಿನಂದನೆ ಎಂದು ಸಂಸದ ನಳಿನ್‌ ಹೇಳಿದರು.

ಸುಸಜ್ಜಿತ ಬೋಗಿ
ಐಸೋಲೇಶನ್‌ ಬೋಗಿಯಲ್ಲಿ ಎಲೆಕ್ಟ್ರಾನಿಕ್‌ ಚಾರ್ಜಿಂಗ್‌ ವ್ಯವಸ್ಥೆ, ಬಟ್ಟೆ, ಕೋಟ್‌, ಔಷಧ, ಬಕೆಟ್‌ ಇಡಲು ಪ್ರತ್ಯೇಕ ವ್ಯವಸ್ಥೆಯಿದ್ದು, ಎಲ್ಲದರಲ್ಲೂ ಡಸ್ಟ್‌ ಬಿನ್‌, ವೈದ್ಯರಿಗೆ ಸೌಲಭ್ಯ, ಔಷಧ ಸಿಂಪಡಿಸಲು ಸೋಡಿಯಂ ಹೈಪೋಕ್ಲೋರೈಡ್‌ ವ್ಯವಸ್ಥೆ, ಎಲ್ಲ ಕಿಟಿಕಿಗಳಿಗೆ ಸೊಳ್ಳೆ ಪರದೆ ಅಳವಡಿಸಲಾಗಿದೆ. ಪ್ಯಾಂಟ್ರಿ ಕಾರ್‌ ಮತ್ತು ಫುಡ್‌ ವಿಭಾಗವೂ ಇದೆ ಎಂದು ನಳಿನ್‌ ಹೇಳಿದರು.