ರಾಯಚೂರು: ಕಳೆದ ವಿಧಾನಸಭೆ ಚುನಾವಣೆಯಲ್ಲಿ 2 ಲಕ್ಷಕ್ಕೂ ಅಧಿಕ ಮತ ಪಡೆದಿದ್ದ ಜೆಡಿಎಸ್‌ ಬೆಂಬಲದೊಂದಿಗೆ ಕಣಕ್ಕಿಳಿದ ಹಾಲಿ ಸಂಸದ ಬಿ.ವಿ.ನಾಯಕರಿಗೆ ಹೀನಾಯ ಸೋಲಾಗಿದೆ. ಅಂದುಕೊಂಡ ಮಟ್ಟಿಗೆ ಮೈತ್ರಿ ಯಶಸ್ವಿಯಾಗಿಲ್ಲ ಎಂಬುದು ಒಂದೆಡೆಯಾದರೆ, ಸ್ವಂತ ಪಕ್ಷದ ನಾಯಕರೇ ಕೈ ಹಿಡಿದಿಲ್ಲ ಎನ್ನುವುದು ಮೇಲ್ನೋಟಕ್ಕೆ ಗೊತ್ತಾಗುತ್ತಿದೆ.
ಹೇಳಿದ್ದೊಂದು ಮಾಡಿದ್ದಿನ್ನೊಂದು ಎನ್ನುವಂತೆ ಜೆಡಿಎಸ್‌ ಕಾಂಗ್ರೆಸ್‌ ಕಾರ್ಯಕರ್ತರು ಮೈತ್ರಿ ಹೆಸರಿನಲ್ಲಿ ನಡೆಸಿದ ಪ್ರಹಸನ ಬಯಲಾಗಿದೆ. ಈ ಫಲಿತಾಂಶ ಬಿಜೆಪಿಯವರು ಬೀಗುವಂತೆ ಮಾಡಿದರೆ ಜೆಡಿಎಸ್‌ ಕಾಂಗ್ರೆಸ್‌ ನಾಯಕರು ತಲೆ ತಗ್ಗಿಸುವಂತೆ ಮಾಡಿದೆ. ಮೇಲ್ನೋಟಕ್ಕೆ ನಾಯಕರು ಸಮಜಾಯಿಷಿ ನೀಡಿ ನುಣುಚಿಕೊಳ್ಳುತ್ತಿದ್ದರೂ ಒಳಗೊಳಗೆ ಹೇಳಿಕೊಳ್ಳಲಾಗದ ತಳಮಳ ಅನುಭವಿಸುತ್ತಿರುವುದಂತೂ ಸತ್ಯ.
ಬಿ.ವಿ.ನಾಯಕರ ಪರ ಕಾಂಗ್ರೆಸ್‌ನ ಕೆಲ ನಾಯಕರು ಶ್ರದ್ಧೆ ವಹಿಸಿ ಕೆಲಸ ಮಾಡಿದ್ದರೆ ಸೋಲಿನ ಪ್ರಮಾಣ ಇಷ್ಟೊಂದು ತೀವ್ರವಾಗಿ ಇರುತ್ತಿರಲಿಲ್ಲವೇನೋ. ಆದರೆ, ನಂಬಿದ ಶಕ್ತಿಗಳೇ ಕೈ ಕೊಟ್ಟಿರುವ ಲಕ್ಷಣ ನಿಚ್ಚಳವಾಗಿ ಕಾಣುತ್ತಿದೆ. ಅದರಲ್ಲೂ ಕಾಂಗ್ರೆಸ್‌ ಕೈ ಹಿಡಿಯಬೇಕಿದ್ದ ಕ್ಷೇತ್ರಗಳೇ ಕೈ ತಪ್ಪಿರುವುದು ಹೇಳಿಕೊಳ್ಳಲಾಗದ ವೇದನೆ ಸೃಷ್ಟಿಸಿರುವುದಂತೂ ಸತ್ಯ.
ರಾಯಚೂರು ಲೋಕಸಭೆ ಕ್ಷೇತ್ರ ಎಂಟು ವಿಧಾನಸಭೆ ಕ್ಷೇತ್ರಗಳನ್ನು ಒಳಗೊಂಡಿದೆ. ಎಂಟರಲ್ಲಿ ನಾಲ್ಕರಲ್ಲಿ ಬಿಜೆಪಿ ಶಾಸಕರಿದ್ದರೆ, ಉಳಿದ ಮೂರರಲ್ಲಿ ಕಾಂಗ್ರೆಸ್‌ ಹಾಗೂ ಒಂದರಲ್ಲಿ ಜೆಡಿಎಸ್‌ ಅಧಿಕಾರದಲ್ಲಿದೆ. ಬಿಜೆಪಿ ಶಾಸಕ ಇರುವ ದೇವದುರ್ಗ ಕ್ಷೇತ್ರದಲ್ಲಿ ಕಾಂಗ್ರೆಸ್‌ ಮುನ್ನಡೆ ಸಾಸಿದ್ದು ಬಿಟ್ಟರೆ ಉಳಿದ ಏಳು ಕ್ಷೇತ್ರಗಳಲ್ಲಿ ಬಿಜೆಪಿಯೇ ಮುನ್ನಡೆ ಸಾಧಿಸಿದೆ.
ಇದರಿಂದ ಗೆಲುವಿನ ಹೊಣೆ ಹೊರಬೇಕಾದ ಆಯಾ ಕ್ಷೇತ್ರಗಳ ಶಾಸಕರು ಜವಾಬ್ದಾರಿಯಿಂದ ನುಣುಚಿಕೊಳ್ಳುವ ಯತ್ನದಲ್ಲಿದ್ದಾರೆ. ಚುನಾವಣೆ ಪೂರ್ವದಲ್ಲಿ ಬೇರೆಯದ್ದೇ ಲೆಕ್ಕಾಚಾರದಲ್ಲಿದ್ದ ನಾಯಕರು ಈಗ ಮಗ್ಗಲು ಬದಲಿಸಿ ಮಾತನಾಡುತ್ತಿದ್ದಾರೆ. ಎಲ್ಲ ಕಡೆ ಇಂಥದ್ದೇ ಫಲಿತಾಂಶ ಬಂದಿದೆ ಎಂದು ಸಮಜಾಯಿಷಿ ನೀಡುತ್ತಿದ್ದಾರೆ. ಹಿಂದಿನ ವಿಧಾನಸಭೆ ಚುನಾಣೆಯಲ್ಲಿ ಜೆಡಿಎಸ್‌ಗೆ ಎರಡು ಲಕ್ಷಕ್ಕಿಂತ ಅಧಿಕ ಮತ ಲಭಿಸಿದ್ದವು. ಮಾನ್ವಿ, ಲಿಂಗಸೂಗೂರು, ಗ್ರಾಮೀಣ ಹಾಗೂ ದೇವದುರ್ಗ ಕ್ಷೇತ್ರದಲ್ಲಿ ಆ ಪಕ್ಷದ ಮತಗಳು ಕೈ ಹಿಡಿಯಲಿವೆ ಎಂಬ ನಿರೀಕ್ಷೆ ಹುಸಿಯಾಗಿದೆ. ಇನ್ನೂ ಅಲ್ಪಸಂಖ್ಯಾತ ಮತಗಳು ಹೆಚ್ಚಾಗಿರುವ ರಾಯಚೂರು ನಗರ ಕ್ಷೇತ್ರವೂ ಕೈ ಕೊಟ್ಟಿದೆ. ಪ್ರಭಾವಿ ನಾಯಕ ಎನಿಸಿಕೊಂಡ ಎನ್‌.ಎಸ್‌.ಬೋಸರಾಜ್‌ರ ತವರು ಕ್ಷೇತ್ರವಾದ ಮಾನ್ವಿಯಲ್ಲಿ ಹೀನಾಯ ಸೋಲಾಗಿದೆ. ಅಲ್ಪಸಂಖ್ಯಾತ ಮತಗಳನ್ನು ಸೆಳೆಯಲು ನೆರವಾಗಬೇಕಿದ್ದ ಮಾಜಿ ಶಾಸಕ ಸೈಯ್ಯದ್‌ ಯಾಸಿನ್‌ ಕೂಡ ನಿರೀಕ್ಷಿತ ಮಟ್ಟದಲ್ಲಿ ಕೆಲಸ ಮಾಡಿಲ್ಲ ಎನ್ನುವುದು ಮೇಲ್ನೋಟಕ್ಕೆ ತಿಳಿಯುತ್ತಿದೆ.
ಕಾಂಗ್ರೆಸ್‌ ಪಕ್ಷದೊಳಗಿನ ಆಂತರಿಕೆ ಕಚ್ಚಾಟ ಬಿ.ವಿ.ನಾಯಕ ಭವಿಷ್ಯ ಬಲಿ ಪಡೆದಿರುವುದನ್ನು ಅಲ್ಲಗಳೆಯಲಾಗದು. ಆದರೆ, ಸಂಸದರಾಗಿ ಅವರು ಇನ್ನೂ ಹೆಚ್ಚು ಶ್ರಮ ವಹಿಸಿ ಕೆಲಸ ಮಾಡಿದ್ದರೆ ಸ್ವಂತ ಬಲದಿಂದಲೇ ಹೋರಾಟ ನಡೆಸಬಹುದಿತ್ತು.
