ಸುಪ್ರೀಂ ನೊಟೀಸ್‌ಗೆ ಉತ್ತರ: ಚೌಕೀದಾರ್‌ ಹೇಳಿಕೆಗೆ ರಾಹುಲ್‌ ವಿಷಾದ, ಕ್ಷಮೆ ಯಾಚನೆ ಇಲ್ಲ

ಹೊಸದಿಲ್ಲಿ : ರಫೇಲ್‌ ತೀರ್ಪು ಕುರಿತ ತನ್ನ ಹೇಳಿಕೆಗಾಗಿ ನ್ಯಾಯಾಂಗ ನಿಂದನೆ ಕೇಸಿಗೆ ಗುರಿಯಾಗಿ ಸುಪ್ರೀಂ ಕೋರ್ಟ್‌ ನೊಟೀಸಿಗೆ ಇಂದು ಉತ್ತರ ಸಲ್ಲಿಸಿರುವ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ, ಚೌಕೀದಾರ್‌ ಚೋರ್‌ ಹೈ ಎಂಬ ತನ್ನ ಹೇಳಿಕೆಗೆ ವಿಷಾದ ವ್ಯಕ್ತಪಡಿಸಿದ್ದಾರೆ; ಆದರೆ ಅದಕ್ಕಾಗಿ ಕ್ಷಮೆಯಾಚಿಸಿಲ್ಲ.

‘ಚೌಕೀದಾರ್‌ ಚೋರ್‌ ಹೈ ಎಂದು ಸುಪ್ರೀಂ ಕೋರ್ಟ್‌ ಕೂಡ ತನ್ನ ತೀರ್ಪಿನಲ್ಲಿ ಹೇಳಿದೆ’ ಎಂಬ ತನ್ನ ಪ್ರಮಾದಯುಕ್ತ ಹೇಳಿಕೆಯಲ್ಲಿ ಸರ್ವೋಚ್ಚ ನ್ಯಾಯಾಲಯದ ಘನತೆ-ಗೌರವವನ್ನು ಕುಂದಿಸುವ ಅಥವಾ ಅದನ್ನು ರಾಜಕೀಯ ಕದನಕ್ಕೆ ಎಳೆದು ತರುವ ಕಿಂಚಿತ್‌ ದುರುದ್ದೇಶ‌ವಾಗಲೀ, ಹಂಬಲವಾಗಲೀ ಅಥವಾ ಆ ರೀತಿಯ ಆಲೋಚನೆಯಾಗಲೀ ತನಗಿರಲಿಲ್ಲ ಎಂದು ರಾಹುಲ್‌ ಗಾಂಧಿ ತನ್ನ ಲಿಖೀತ ಉತ್ತರದಲ್ಲಿ ಹೇಳಿದ್ದಾರೆ.

ರಫೇಲ್‌ ಕುರಿತಾದ ಸಂಕ್ಷಿಪ್ತ ಹೇಳಿಕೆಯನ್ನು ಮಾಧ್ಯಮದವರಿಗೆ ನೀಡುವ ಮುನ್ನ ತಾನು ಬಿರುಸಿನ ಚುನಾವಣಾ ಪ್ರಚಾರಾಭಿಯಾನದಲ್ಲಿ ತೊಡಗಿಕೊಂಡಿದ್ದ  ಆ ಸಂದರ್ಭದಲ್ಲಿ ಸರ್ವೋಚ್ಚ ನ್ಯಾಯಾಲಯದ ಆದೇಶವನ್ನು ಕಂಡದ್ದಾಗಲೀ, ಓದಿದ್ದಾಗಲೀ, ವಿಶ್ಲೇಷಿಸಿದ್ದಾಗಲೀ ಇಲ್ಲ ಎಂದು ರಾಹುಲ್‌ ತಮ್ಮ ಉತ್ತರದಲ್ಲಿ ಹೇಳಿದ್ದಾರೆ.