ಮೋದಿ ಜೀ, ನಿಮಗೆ ನಗರ ಕಟ್ಟುವುದು ಕಷ್ಟ,ಸುಳ್ಳು ಕಟ್ಟುವುದು ಸುಲಭ:ರಾಗಾ

ಹೊಸದಿಲ್ಲಿ : “ಪ್ರಧಾನಿ ನರೇಂದ್ರ ಮೋದಿಯವರೇ ನಗರಗಳನ್ನು ಕಟ್ಟುವುದಕ್ಕಿಂತ ಸುಳ್ಳುಗಳನ್ನು ಕಟ್ಟುವುದೇ ಸುಲಭ ಎಂಬುದನ್ನು ನೀವು ಚೆನ್ನಾಗಿ ತಿಳಿದುಕೊಂಡಿದ್ದೀರಿ. ಆದರೆ ಸತ್ಯಾಂಶಗಳು ನೀವು ಕಟ್ಟುವ ಸುಳ್ಳುಗಳನ್ನು ಅನಾವರಣ ಮಾಡುತ್ತಿವೆ’ ಎಂದು ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಪ್ರಧಾನಿ ಮೋದಿ ವಿರುದ್ಧ ಹರಿಹಾಯ್ದಿದ್ದಾರೆ.

ಕಂಪ್ಯೂಟರ್‌ ಕ್ಯಾಪಿಟಲ್‌ ಆಗಿದ್ದ  ಕರ್ನಾಟಕವನ್ನು ಕಾಂಗ್ರೆಸ್‌ ಸರಕಾರ ಕ್ರೈಮ್‌ ಕ್ಯಾಪಿಟಲ್‌ ಆಗಿ ಪರಿವರ್ತಿಸಿದೆ; ಅಂತೆಯೇ ಸಿಲಿಕಾನ್‌ ವ್ಯಾಲಿ ಎನಿಸಿಕೊಂಡಿದ್ದ ಬೆಂಗಳೂರನ್ನು  ಕಾಂಗ್ರೆಸ್‌ ಸರಕಾರ “ಸಿನ್‌ ವ್ಯಾಲಿ’ಯನ್ನಾಗಿ ಮಾಡಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ನಿನ್ನೆ ಗುರುವಾರದ ತಮ್ಮ ಚುನಾವಣಾ ಪ್ರಚಾರದ ಭಾಷಣದಲ್ಲಿ ಹೇಳಿದ್ದರು. 

ಇದಕ್ಕೆ ಉತ್ತರವೆಂಬಂತೆ ರಾಹುಲ್‌ ಗಾಂಧಿ ಅವರು, “ಪ್ರಧಾನಿಯವರೇ ಕರ್ನಾಟಕ ಮತ್ತು ಬೆಂಗಳೂರಿನ ಮಾನ ಮರ್ಯಾದೆಯನ್ನು ಈ ರೀತಿಯಾಗಿ ಕಳೆಯುವುದು ನಿಜಕ್ಕೂ ನಿಮಗೆ  ಅವಮಾನಕರ. ಗಾರ್ಡನ್‌ ಸಿಟಿ ಎಂಬ ಹೆಮ್ಮೆಯ ನಗರವಾಗಿರುವ ಬೆಂಗಳೂರನ್ನು ಗಾರ್‌ಬೇಜ್‌ ಸಿಟಿ ಎಂದು ಕರೆಯುವುದು ಅವಮಾನಕರ ಎಂದು ರಾಹುಲ್‌, ಪ್ರಧಾನಿ ಮೋದಿ ಅವರನ್ನು ಟ್ವಿಟರ್‌ನಲ್ಲಿ ತರಾಟೆಗೆ ತೆಗೆದುಕೊಂಡಿದ್ದಾರೆ. 

ಯುಪಿಎ ಸರಕಾರ ಕರ್ನಾಟಕ್ಕೆ 6,570 ಕೋಟಿ ರೂ.ಗಳನ್ನು ಒದಗಿಸಿತ್ತು. ಅದೇ ಕೇಂದ್ರದಲ್ಲಿನ ಬಿಜೆಪಿ ಸರಕಾರ ಕರ್ನಾಟಕಕ್ಕೆ ಕೊಟ್ಟದ್ದು ಕೇವಲ 598 ಕೋಟಿ ರೂ. ಎಂದರೆ 1500 ಶೇಕಡಾ ವ್ಯತ್ಯಾಸವಿರುವುದು ಗೊತ್ತಾಗುತ್ತದೆ ಎಂದು ರಾಹುಲ್‌ ಹೇಳಿದ್ದಾರೆ.