ನಾನು ದತ್ತಾತ್ರೇಯ ಗೋತ್ರದ ಕೌಲ ಬ್ರಾಹ್ಮಣ: ರಾಹುಲ್‌ ಬಹಿರಂಗ

ಹೊಸದಿಲ್ಲಿ : ವಿಧಾನಸಭಾ ಚುನಾವಣೆಯತ್ತ ಮುಖ ಮಾಡಿರುವ ರಾಜಸ್ಥಾನದ ಪ್ರಸಿದ್ಧ ಪುಷ್ಕರ್‌ ನಲ್ಲಿನ ಬ್ರಹ್ಮ ದೇವಸ್ಥಾನಕ್ಕೆ ಇಂದು ಸೋಮವಾರ ಭೇಟಿ ನೀಡಿರುವ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ, ತನ್ನದು ದತ್ತಾತ್ರೇಯ ಗೋತ್ರವೆಂದೂ ತಾನು ಕೌಲ ಬ್ರಾಹ್ಮಣ ನೆಂದೂ ಬಹಿರಂಗಪಡಿಸಿದರು.

ಬ್ರಹ್ಮ ದೇವಸ್ಥಾನದಲ್ಲಿ ಇಂದು ಪೂಜೆ ಸಲ್ಲಿಸಿದ ರಾಹುಲ್‌ ಗಾಂಧಿ ತನ್ನ ಗಾಂಧಿ ಕುಟುಂಬದ ಎಲ್ಲ ಸದಸ್ಯರ ಧಾರ್ಮಿಕ ಮಾಹಿತಿ (ಕುಲ, ಗೋತ್ರ, ಪ್ರವರ) ಕುರಿತ ದಾಖಲೆಪತ್ರಗಳನ್ನು ಉಲ್ಲೇಖೀಸಿದರು. 

ಕಳೆದ ಅಕ್ಟೋಬರ್‌ ನಲ್ಲಿ ರಾಹುಲ್‌ ಗಾಂಧಿ ಅವರು ಮಧ್ಯ ಪ್ರದೇಶದ ಉಜ್ಜೆ„ನ್‌ನ ಮಹಾಕಾಲೇಶ್ವರ ದೇವಸ್ಥಾನಕ್ಕೆ ಭೇಟಿ ನೀಡಿದ್ದ ಸಂದರ್ಭದಲ್ಲಿ ಬಿಜೆಪಿ ವಕ್ತಾರ ಪತ್ರಾ ಅವರು “ರಾಹುಲ್‌ ಗಾಂಧಿಯವರು ಜನಿವಾರ ಧರಿಸುತ್ತಾರಾ; ಹೌದಾಗಿದ್ದರೆ ಅವರ ಜನಿವಾರದ ನಮೂನೆ ಯಾವುದು ? ಅವರ ಕುಲ, ಗೋತ್ರ ಯಾವುದು ?’ ಎಂದು ಇಂದೋರ್‌ ನ ರಾಲಿಯಲ್ಲಿ ಪ್ರಶ್ನಿಸಿದ್ದರು. 

ಇಂದು ಪುಷ್ಕರ್‌ ಗೆ ಭೇಟಿ ಕೊಡುವ ಮುನ್ನ ರಾಹುಲ್‌ ಗಾಂಧಿ ಅವರು ಅಜ್‌ಮೇರ್‌ನ ಹದಿಮೂರನೇ ಶತಮಾನದ ಪ್ರಸಿದ್ಧ  ಸೂಫಿ ಸಂತ ಖ್ವಾಜಾ ಮೊಯಿನುದ್ದೀನ್‌ ಚಿಸ್ತಿ  ದರ್ಗಾಕ್ಕೆ ಭೇಟಿ ನೀಡಿ ಅಲ್ಲಿ ಝಿಯಾರತ್‌ ನಿರ್ವಹಿಸಿದ್ದರು. ರಾಹುಲ್‌ ಜತೆಗೆ ಸಚಿನ್‌ ಪೈಲಟ್‌ ಮತ್ತು ಅಶೋಕ್‌ ಗೆಹಲೋತ್‌ ಇದ್ದರು.