ಎಷ್ಟೇ ಸಿನಿಮಾ ಮಾಡಿದ ನಟನಿಗೂ ತನ್ನ ಸಿನಿಮಾ ಬಿಡುಗಡೆಯಾಗುತ್ತದೆ ಎಂದಾಗ ಸಣ್ಣದೊಂದು ಭಯ, ಕಾತರ, ಖುಷಿ ಎಲ್ಲವೂ ಆಗುತ್ತದೆ. ಹೀಗಿರುವಾಗ ಈಗಷ್ಟೇ ಗಾಂಧಿನಗರದಲ್ಲಿ ಬೆಳೆಯುತ್ತಿರುವ ನಟನಿಗೆ ತನ್ನ ಸಿನಿಮಾ ಬಿಡುಗಡೆಯಾಗುವ ಕ್ಷಣ ಹೇಗಿರಬಹುದು ಹೇಳಿ. ಈಗ ರಘು ಭಟ್‌ ಅಂತಹ ಸಂದರ್ಭದಲ್ಲಿದ್ದಾರೆ. ಯಾವ ರಘು ಭಟ್‌ ಎಂದರೆ “ಅನ್ವೇಷಿ’ ಸಿನಿಮಾ ಬಗ್ಗೆ ಹೇಳಬೇಕು.
ಈ ವಾರ ತೆರೆಕಾಣುತ್ತಿರುವ “ಅನ್ವೇಷಿ’ ಚಿತ್ರದಲ್ಲಿ ಪ್ರಮುಖ ಪಾತ್ರ ಮಾಡಿದ್ದಾರೆ ರಘು ಭಟ್‌. ಹಾಗಾಗಿ, ಚಿತ್ರದ ಬಗ್ಗೆ ಸಾಕಷ್ಟು ನಿರೀಕ್ಷೆಯೊಂದಿಗೆ ಎದುರು ನೋಡುತ್ತಿದ್ದಾರೆ. ಈ ಚಿತ್ರವನ್ನು ವೇಮಗಲ್‌ ಜಗನ್ನಾಥ್‌ ನಿರ್ದೇಶಿಸಿದ್ದಾರೆ. ಅಂದಹಾಗೆ, ರಘು ಭಟ್‌ ಮೂಲತಃ ಕಾಸರಗೋಡಿನವರು. ಆದರೆ, ಸಿನಿಮಾದ ಆಸಕ್ತಿಯಿಂದ ಈಗ ಗಾಂಧಿನಗರಕ್ಕೆ ಬಂದಿದ್ದಾರೆ.
ಶಿವರಾಜಕುಮಾರ್‌ ಅವರ “ಕೃಷ್ಣಲೀಲೆ’ ಚಿತ್ರದಲ್ಲಿ ಬಾಲನಟರಾಗಿ ನಟಿಸಿದ್ದ ರಘು ಈಗ ಈಗ ಸಾಕಷ್ಟು ಸಿನಿಮಾದಲ್ಲಿ ನಟಿಸಿದ್ದಾರೆ. ಇದೊಂದು ಥ್ರಿಲ್ಲರ್‌ ಸಿನಿಮಾವಾಗಿದ್ದು, ಜನರಿಗೆ ಇಷ್ಟವಾಗುತ್ತದೆ ಎಂಬ ವಿಶ್ವಾಸ ರಘು ಅವರಿಗಿದೆ. ಈಗಾಗಲೇ ಚಿತ್ರದ ಟ್ರೇಲರ್‌ ಹಾಗೂ ಹಾಡುಗಳಿಗೆ ಮೆಚ್ಚುಗೆ ವ್ಯಕ್ತವಾಗುವ ಮೂಲಕ ರಘು ಅವರಿಗೆ ಸಿನಿಮಾ ಬಗ್ಗೆ ವಿಶ್ವಾಸ ಹೆಚ್ಚಿದೆ.
ರಘು ಈಗಾಗಲೇ ತೆರೆಕಂಡಿರುವ “ದಾದಾ ಇಸ್‌ ಬ್ಯಾಕ್‌’, “ಕರ್ವ’, “ಡ್ರೀಮ್‌ ಗರ್ಲ್’ ಚಿತ್ರಗಳಲ್ಲೂ ನಟಿಸಿದ್ದಾರೆ. “ಅನ್ವೇಷಿ’ ಹೊರತಾಗಿ ರಘು ಅವರು ರಾಗಿಣಿ ಪ್ರಮುಖ ಪಾತ್ರ ನಿರ್ವಹಿಸಿರುವ “ಎಂ ಎಂ ಸಿ ಹೆಚ್‌’, “ಲವ್‌ ಯೂ 2′, “ಚಿತ್ರಾಲಿ’ ಹಾಗೂ “ರಘುವೀರ’ ಚಿತ್ರಗಳಲ್ಲಿ ರಘು ನಟಿಸಿದ್ದು, ಆ ಚಿತ್ರಗಳಿಗಾಗಿ ಎದುರು ನೋಡುತ್ತಿದ್ದಾರೆ ರಘು.
