ಲಿಂ|ರಾಚೋಟೇಶ್ವರ ಸ್ವಾಮೀಜಿ ಪುಣ್ಯಾರಾಧನೆ

ಕುಂದಗೋಳ: ಲಿಂ| ರಾಚೋಟೇಶ್ವರ ಶ್ರೀಗಳು ಈ ಭಾಗದಲ್ಲಿ ಬಸವಾದಿ ಶರಣರ ತತ್ವಗಳನ್ನು ಜನರಿಗೆ ಬೋಧಿಸುವ ಮೂಲಕ ಲೋಕಕಲ್ಯಾಣಕ್ಕೆ ತಮ್ಮದೇಯಾದ ಕೊಡುಗೆ ನೀಡಿದ್ದಾರೆ. ಈ ಮಠದ ಶ್ರೇಯೋಭಿವೃದ್ಧಿಗಾಗಿ ಒಂದು ಲಕ್ಷ ರೂ. ನೀಡುವುದಾಗಿ ಚಿತ್ರದುರ್ಗದ ಬೃಹನ್ಮಠದ ಡಾ| ಶಿವಮೂರ್ತಿ ಮುರುಘಾ ಶರಣರು ಹೇಳಿದರು.

ಕಮಡೊಳ್ಳಿಯಲ್ಲಿ ಶನಿವಾರ ಗುರುಲೋಚನೇಶ್ವರ ವಿರಕ್ತಮಠದ ಲಿಂ| ಶ್ರೀ ರಾಚೋಟೇಶ್ವರ ಮಹಾಸ್ವಾಮಿಗಳ ಪುಣ್ಯಾರಾಧನೆ ಕಾರ್ಯಕ್ರಮದ ಸಾನ್ನಿಧ್ಯವಹಿಸಿ ಆಶೀರ್ವಚನ ನೀಡಿದರು.

ಮೊದಲಿನ ಶ್ರೀಗಳಿಗೆ ಭಕ್ತರು ನೀಡಿದಸಹಕಾರವನ್ನು ಮಠದ ಉತ್ತರಾ ಧಿಕಾರಿಯಾಗಿರುವ ಶ್ರೀ ರಾಚೋಟೇಶ್ವರ ದೇವರು ಅವರಿಗೂ ನೀಡುವಂತೆ ಭಕ್ತರಿಗೆ ಹೇಳಿದರು. ಧಾರವಾಡದ ಮುರುಘಾ ಮಠದ ಶ್ರೀ ಮಲ್ಲಿಕಾರ್ಜುನ ಸ್ವಾಮೀಜಿ ಮಾತನಾಡಿ, ಈ ಮಠದ ಶ್ರೀಗಳು ಅಗಾಧ ಪಾಂಡಿತ್ಯ ಹೊಂದಿದ್ದು ತಮ್ಮ ಪ್ರವಚನದ ಮೂಲಕ ಅಜ್ಞಾನ ಹೋಗಲಾಡಿಸಿ ಭಕ್ತರಿಗೆ ಸನ್ಮಾರ್ಗ ನೀಡಿದ್ದಾರೆ ಎಂದರು.

ಶಿರಹಟ್ಟಿಯ ಶ್ರೀ ಫಕ್ಕೀರ ಸಿದ್ದರಾಮ ಸ್ವಾಮೀಜಿ ಮಾತನಾಡಿ, ಮಠಗಳಿಗೆ ಭಕ್ತರೇ ಆಸ್ತಿಯಾಗಿದ್ದು ಲಿಂ| ಶ್ರೀಗಳು ಮಾಡಿರುವ ಕಾರ್ಯಗಳನ್ನು ನೆನೆದರು. ಶ್ರೀ ಶಿವಯೋಗಿ ಸ್ವಾಮೀಜಿ, ಶ್ರೀ ಶಿವಬಸವ ಸ್ವಾಮೀಜಿ, ಶ್ರೀ ಶಿವಲಿಂಗೇಶ್ವರ ಸ್ವಾಮೀಜಿ, ಶ್ರೀ ಸಿದ್ಧಲಿಂಗೇಶ್ವರ ಸ್ವಾಮೀಜಿ, ಶ್ರೀ ಬಸವಣ್ಣಜ್ಜನವರು, ಶ್ರೀ ಚನ್ನಬಸವ ದೇವರು, ಶ್ರೀ ಮಹಾಂತ ಸ್ವಾಮೀಜಿ, ಡಾ| ಸಿದ್ದರಾಮ ಶಿವಯೋಗಿಗಳು, ಮಹಾಂತ ಶ್ರೀಗಳು, ಮಾತೋಶ್ರೀ ಪ್ರಮೀಳಾ ತಾಯಿಯರು ಪಾಲ್ಗೊಂಡಿದ್ದರು. ಈರಣ್ಣ ಕೋಡಿ ಪ್ರಾಸ್ತಾವಿಕ ಮಾತನಾಡಿದರು.

ಚಂದ್ರಶೇಖರ ಜುಟ್ಟಲ ಸ್ವಾಗತಿಸಿದರು. ಶಿಕ್ಷಕ ಜಿ.ಸಿ. ಹಂಚಿನಾಳ ನಿರೂಪಿಸಿ, ವಂದಿಸಿದರು. ಇದಕ್ಕೂ ಮುನ್ನ 9ನೇ ಲಿಂ| ರಾಚೋಟೇಶ್ವರ ಸ್ವಾಮೀಜಿಗಳ ಗದ್ದುಗೆಗೆ ವಿಶೇಷ ಪೂಜೆ ವಿಧಿ-ವಿಧಾನಗಳು ಮುಂಜಾನೆ ನೆರವೇರಿದವು. ಮಠದ ಭಕ್ತರು ಗದ್ದುಗೆಗೆ ಹಣ್ಣು ಕಾಯಿ ಅರ್ಪಿಸಿ ನಮನ ಸಲ್ಲಿಸಿದರು.