ಸಿಎಂಗಾಗಿ ಕಾದು ಕುಳಿತ ಆರ್‌.ಶಂಕರ್‌

ಬೆಂಗಳೂರು: ಸಮ್ಮಿಶ್ರ ಸರ್ಕಾರಕ್ಕೆ ನೀಡಿದ್ದ ಬೆಂಬಲ ವಾಪಸ್‌ ಪಡೆದಿದ್ದೇನೆ ಎಂದು ರಾಜ್ಯಪಾಲರಿಗೆ ಪತ್ರ ಕೊಟ್ಟು ವಿಶೇಷ ವಿಮಾನ ಏರಿದ್ದ ಅನರ್ಹಗೊಂಡಿರುವ ಶಾಸಕ ಆರ್‌.ಶಂಕರ್‌ ರಾಜಭವನದಲ್ಲಿ ಬುಧವಾರ ಮುಖ್ಯಮಂತ್ರಿ ಬಿ.ಎಸ್‌.ಯಡಿಯೂರಪ್ಪ ಅವರ ಭೇಟಿಗಾಗಿ ಕಾದು ಕುಳಿತಿದ್ದರು. ರಾಜಭವನದಲ್ಲಿ ಉತ್ತಮ ಸೇವೆ ಸಲ್ಲಿಸಿದ ಪೊಲೀಸ್‌ ಅಧಿಕಾರಿಗಳಿಗೆ ನೀಡುವ ರಾಷ್ಟ್ರಪತಿಗಳ ಪದಕ ಪ್ರದಾನ ಸಮಾರಂಭದಲ್ಲಿ ಮುಖ್ಯಮಂತ್ರಿ ಯಡಿಯೂರಪ್ಪ ಅವರು ಪಾಲ್ಗೊಳ್ಳುವುದು ನಿಗದಿಯಾಗಿತ್ತು.

ಈ ಮಾಹಿತಿ ಆಧರಿಸಿ ಆರ್‌. ಶಂಕರ್‌ ಸಂಜೆ ನಾಲ್ಕು ಗಂಟೆ ಸುಮಾರಿಗೆ ರಾಜಭವನಕ್ಕೆ ಆಗಮಿಸಿದ್ದರು. ಪೊಲೀಸ್‌ ಅಧಿಕಾರಿಗಳು ಕುಳಿತಿದ್ದ ಹಿಂಭಾಗದ ಸಾಲಿನಲ್ಲಿ ಏಕಾಂಗಿಯಾಗಿ ಕುಳಿತಿದ್ದರು. ಜೆಡಿಎಸ್‌ನ ವಿಧಾನಪರಿಷತ್‌ ಸದಸ್ಯ ರಮೇಶ್‌ಗೌಡ ಅವರು ಬಂದ ಬಳಿಕ ಅವರ ಜತೆ ಮಾತುಕತೆಯಲ್ಲಿ ತಲ್ಲೀನರಾದರು.

ನಂತರ ಮುಖ್ಯಮಂತ್ರಿ ಯಡಿಯೂರಪ್ಪನವರು ಕಾರ್ಯಕ್ರಮಕ್ಕೆ ಆಗಮಿಸುತ್ತಿದ್ದಂತೆ ತೆರಳಿ ನಮಸ್ಕರಿಸಿದ ಶಂಕರ್‌ ಬಳಿಕ ಶಾಸಕ ಆರ್‌. ಅಶೋಕ ಜತೆ ಕುಳಿತು ಕಾರ್ಯಕ್ರಮ ಮುಗಿಯುವ ತನಕವೂ ಅವರ ಜತೆಯಲ್ಲಿದ್ದರು. ನಂತರ ಮುಖ್ಯಮಂತ್ರಿ ಯಡಿಯೂರಪ್ಪ ಅವರ ಜತೆ ಮಾತುಕತೆಗೆ ಶಂಕರ್‌ ಒಂದೆರಡು ನಿಮಿಷ ಮಾತನಾಡಿದರು. ಯಡಿಯೂರಪ್ಪ ಹಾಗೂ ಆರ್‌.ಅಶೋಕ್‌ ಅವರು ರಾಜಭವನದಿಂದ ನಿರ್ಗಮಿಸಿದ ನಂತರವೂ ಶಂಕರ್‌, ರಾಜಭವನದ ಉದ್ಯಾನವನದಲ್ಲಿ ಕೆಲ ಕಾಲ ಏಕಾಂಗಿಯಾಗಿದ್ದದ್ದು ಕಂಡು ಬಂತು.