ಕತಾರ್‌ ಓಪನ್‌ ಟೆನಿಸ್‌: ಜೊಕೋಗೆ ಅಘಾತವಿಕ್ಕಿದ ಅಗುಟ್‌

ದೋಹಾ: ಹೊಸ ವರ್ಷವನ್ನು ಜಯದಿಂದ ಪ್ರಾರಂಭಿಸಬೇಕು ಎಂಬ ಆಸೆಯಲ್ಲಿದ್ದ ವಿಶ್ವದ ನಂ. ವನ್‌ ಟೆನಿಸಿಗ ನೊವಾಕ್‌ ಜೊಕೋವಿಕ್‌ “ಕತಾರ್‌ ಓಪನ್‌’ ಪಂದ್ಯಾವಳಿಯ ಸೆಮಿಫೈನಲ್‌ನಲ್ಲಿ ಸೋತು ಹೊರಬಿದ್ದಿದ್ದಾರೆ.

ಶುಕ್ರವಾರ ರಾತ್ರಿಯ ಮುಖಾಮುಖೀಯಲ್ಲಿ ಜೊಕೋವಿಕ್‌ ಸ್ಪೇನಿನ ರಾಬರ್ಟೊ ಬಟಿಸ್ಟ ಅಗುಟ್‌ ವಿರುದ್ಧ 6-3, 6-7 (6-8), 4-6 ಸೆಟ್‌ಗಳಿಂದ ಸೋತರು. ಗೆಲುವಿನಿಂದಲೇ ಖಾತೆ ತೆರೆದ ಜೊಕೋವಿಕ್‌ಗೆ ಅನಂತರ ಇದೇ ಲಯವನ್ನು ಕಾಯ್ದುಕೊಂಡು ಹೋಗಲು ಸಾಧ್ಯವಾಗಲಿಲ್ಲ. ಇವರಿಬ್ಬರ ಹೋರಾಟ 2 ಗಂಟೆ, 35 ನಿಮಿಷಗಳ ವರೆಗೆ ನಡೆಯಿತು.ಅಗುಟ್‌ ಪ್ರಶಸ್ತಿ ಸುತ್ತಿನಲ್ಲಿ ಚೆಕ್‌ ಗಣರಾಜ್ಯದ ಥಾಮಸ್‌ ಬೆರ್ಡಿಶ್‌ ಅವರನ್ನು ಎದುರಿಸಲಿದ್ದಾರೆ. 

ಇನ್ನೊಂದು ಉಪಾಂತ್ಯದಲ್ಲಿ ಬೆರ್ಡಿಶ್‌ ಇಟೆಲಿಯ ಮಾರ್ಕೊ ಸೆಶಿನಾಟೊ ವಿರುದ್ಧ 7-6 (6), 6-3 ಅಂತರದ ಜಯ ಸಾಧಿಸಿದರು.

“ಈ ಪಂದ್ಯವನ್ನು ಎಂದಿಗೂ ಮರೆಯುವುದಿಲ್ಲ. ನಂಬಲಾಗದ ವಾತಾವರಣ ಇಲ್ಲಿ ಸೃಷ್ಟಿಯಾಗಿತ್ತು. ಇಂತಹ ಆಟವನ್ನಾಡಲು ನಾನು ದಿನಂಪ್ರತಿ ಕಠಿನ ಅಭ್ಯಾಸ ಮಾಡುತ್ತಿದ್ದೆ. ಇಲ್ಲಿ ಆಡುವುದು ಎಷ್ಟು ಕಷ್ಟ ಎಂದು ನನಗೆ ಗೊತ್ತಿದೆ. ಹೀಗಾಗಿ ಜೊಕೋವಿಕ್‌ ವಿಶ್ವ ರ್‍ಯಾಂಕಿಂಗ್‌ನಲ್ಲಿ ಅಗ್ರಸ್ಥಾನಿಯಾಗಿದ್ದಾರೆ’ ಎಂದು ಅಗುಟ್‌ ಪ್ರತಿಕ್ರಿಯಿಸಿದರು. ಅವರೀಗ 9ನೇ ಎಟಿಪಿ ಪ್ರಶಸ್ತಿ ಜಯಿಸಲು ಕಾತುರರಾಗಿದ್ದಾರೆ.