ಫಿಫಾ ವಿಶ್ವಕಪ್‌: ಪ್ರಿ-ಕ್ವಾರ್ಟರ್‌ ಫೈನಲ್‌ಗೆ ನೆದರ್ಲೆಂಡ್ಸ್‌ , ಸೆನೆಗಲ್‌

ದೋಹಾ: ಫಿಫಾ ವಿಶ್ವಕಪ್‌ ಪಂದ್ಯಾವಳಿಯಲ್ಲಿ “ಎ’ ವಿಭಾಗದ ಲೆಕ್ಕಾಚಾರ ಮುಗಿದಿದೆ. ನೆದರ್ಲೆಂಡ್ಸ್‌ ಮತ್ತು ಸೆನೆಗಲ್‌ ತಂಡಗಳು ಪ್ರಿ-ಕ್ವಾರ್ಟರ್‌ ಫೈನಲ್‌ ಸುತ್ತಿಗೆ ಲಗ್ಗೆ ಹಾಕಿವೆ.

ಮಂಗಳವಾರ ರಾತ್ರಿ ಏಕಕಾಲಕ್ಕೆ ಮೊದಲ್ಗೊಂಡ ಎರಡು ಮುಖಾಮುಖೀಗಳಲ್ಲಿ ನೆದರ್ಲೆಂಡ್ಸ್‌ 2-0 ಅಂತರದಿಂದ ಆತಿಥೇಯ ಕತಾರ್‌ಗೆ ಹೊಡೆತವಿಕ್ಕಿತು.

ಈಗಾಗಲೇ ಕೂಟದಿಂದ ನಿರ್ಗಮಿಸಿರುವ ಕತಾರ್‌ ಹ್ಯಾಟ್ರಿಕ್‌ ಸೋಲಿನೊಂದಿಗೆ ತನ್ನ ವಿಶ್ವಕಪ್‌ ಆಟವನ್ನು ಅತ್ಯಂತ ನೀರಸವಾಗಿ ಮುಗಿಸಿತು. ಡಚ್‌ ಗೋಲುವೀರರೆಂದರೆ ಕೋಡಿ ಗಾಪ್ಕೊ (26ನೇ ನಿಮಿಷ) ಹಾಗೂ ಫ್ರೆಂಕಿ ಡಿ ಜಾಂಗ್‌ (49ನೇ ನಿಮಿಷ). ಒಂದು ಡ್ರಾ, 2 ಜಯದೊಂದಿಗೆ 7 ಅಂಕ ಗಳಿಸಿದ ನೆದರ್ಲೆಂಡ್ಸ್‌ “ಎ’ ವಿಭಾಗದ ಅಗ್ರಸ್ಥಾನ ಅಲಂಕರಿಸಿತು.

ಸೆನೆಗಲ್‌ ಗೆಲುವು
ಈಕ್ವಡಾರ್‌-ಸೆನೆಗಲ್‌ ಪಂದ್ಯ ಹೆಚ್ಚು ಪೈಪೋಟಿಯಿಂದ ಕೂಡಿತ್ತು. ಇದನ್ನು ಸೆನೆಗಲ್‌ 2-1ರಿಂದ ಜಯಿಸಿತು. ಇದು ಸೆನೆಗಲ್‌ಗೆ ಒಲಿದ 2ನೇ ಜಯ. ಅದು ಒಟ್ಟು 6 ಅಂಕ ಗಳಿಸಿ ದ್ವಿತೀಯ ಸ್ಥಾನಿಯಾಯಿತು. ಸೆನೆಗಲ್‌ ಪರ ಇಸ್ಮಾಯಿಲ್‌ ಸರ್ರ (44ನೇ ನಿಮಿಷ) ಮತ್ತು ಕಲಿದು ಕಲಿಬಲಿ (70ನೇ ನಿಮಿಷ) ಗೋಲು ಬಾರಿಸಿದರು. ಈಕ್ವಡಾರ್‌ನ ಏಕೈಕ ಗೋಲನ್ನು 67ನೇ ನಿಮಿಷದಲ್ಲಿ ಮೊಸಸ್‌ ಕೈಸೆಡೊ ಹೊಡೆದರು.