ಏಶ್ಯನ್‌ ಆ್ಯತ್ಲೆಟಿಕ್ಸ್‌ ರಾಜ್ಯದ ಪೂವಮ್ಮ, ಸಹನಾ ಆಯ್ಕೆ

ಹೊಸದಿಲ್ಲಿ: ರಾಜ್ಯದ ಖ್ಯಾತ ಡಿಸ್ಕಸ್‌ಪಟು ವಿಕಾಸ್‌ ಗೌಡ, ಟ್ರ್ಯಾಕ್‌ ಆ್ಯತ್ಲೀಟ್‌ಗಳಾದ ಎಂ.ಆರ್‌. ಪೂವಮ್ಮ, ವಿಜಯಾ ಕುಮಾರಿ, ಸಂಶೀರ್‌, ಸಹನಾ ಕುಮಾರಿ, ರೀನಾ ಜಾರ್ಜ್‌ ಆವರೆಲ್ಲ ಮುಂದಿನ ಗುರುವಾರದಿಂದ ಭುವನೇಶ್ವರದಲ್ಲಿ ಆರಂಭವಾಗಲಿರುವ ಏಶ್ಯನ್‌ ಆ್ಯತ್ಲೆಟಿಕ್ಸ್‌ ಚಾಂಪಿಯನ್‌ಶಿಪ್‌ನಲ್ಲಿ ಪಾಲ್ಗೊಳ್ಳಲಿದ್ದಾರೆ. ಒಟ್ಟು 95 ಮಂದಿ ಆ್ಯತ್ಲೀಟ್‌ಗಳು ಏಶ್ಯನ್‌ ಚಾಂಪಿಯನ್‌ಶಿಪ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಲಿದ್ದಾರೆ.

ಡಿಸ್ಕಸ್‌ ಥ್ರೋನಲ್ಲಿ ವಿಕಾಸ್‌ ಗೌಡ, ಲಾಂಗ್‌ಜಂಪ್‌ನಲ್ಲಿ ಸಂಶೀರ್‌, 400 ಮೀ. ಹಾಗೂ 4/400 ಮೀ. ರಿಲೇನಲ್ಲಿ ಎಂ.ಆರ್‌. ಪೂವಮ್ಮ, ಹೈಜಂಪ್‌ನಲ್ಲಿ ಸಹನಾ ಕುಮಾರಿ, 4/400  ಮೀ. ರಿಲೇನಲ್ಲಿ ವಿಜಯಾ ಕುಮಾರಿ ಹಾಗೂ 4/100 ಮೀ. ರಿಲೇನಲ್ಲಿ ರೀನಾ ಜಾರ್ಜ್‌ ದೇಶವನ್ನು  ಪ್ರತಿನಿಧಿಸಲಿದ್ದಾರೆ.

ಜು. 6ರಿಂದ 9ರ ವರೆಗೆ ಈ ಕೂಟ ನಡೆಯಲಿದೆ. ಇಲ್ಲಿ ಆಯ್ಕೆಯಾದ ಆ್ಯತ್ಲೀಟ್‌ಗಳು ಆಗಸ್ಟ್‌ನಲ್ಲಿ ಲಂಡನ್‌ನಲ್ಲಿ ನಡೆಯಲಿರುವ ವಿಶ್ವ ಚಾಂಪಿಯನ್‌ಶಿಪ್‌ಗೆ ಅರ್ಹತೆ ಪಡೆಯಲಿದ್ದಾರೆ.