ಪುಟ್ಟಗೌರಿ ಸಿನಿ ಪಯಣ

ಕಿರುತೆರೆಯ ಪ್ರೇಕ್ಷಕರಿಗೆ ಪುಟ್ಟಗೌರಿ ಮದುವೆ ಧಾರಾವಾಹಿಯ ಖ್ಯಾತಿಯ ರಂಜನಿ ರಾಘವನ್‌ ಚಿರಪರಿಚಿತ ನಟಿ. ಪುಟ್ಟಗೌರಿ ಮದುವೆ ಧಾರಾವಾಹಿಯ ನಂತರ ನಿಧಾನವಾಗಿ ಕಿರುತೆರೆಯಿಂದ ಬೆಳ್ಳಿತೆರೆಯತ್ತ ಮುಖ ಮಾಡಿದ ರಂಜನಿ ರಾಜಹಂಸ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ನಾಯಕಿಯಾಗಿ ಪರಿಚಯವಾದರು. ಅದಾದ ನಂತರ ಛಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಸೋದರ ಸಂಬಂಧಿ ಮನೋಜ್‌ ಅಭಿನಯದ ಚೊಚ್ಚಲ ಚಿತ್ರ ಟಕ್ಕರ್‌ನಲ್ಲೂ ರಂಜನಿ ನಾಯಕಿಯಾಗಿ ಕಾಣಿಸಿಕೊಳ್ಳುತ್ತಿದ್ದು, ಶೀಘ್ರದಲ್ಲಿಯೇ ಆ ಚಿತ್ರ ಕೂಡ ತೆರೆಗೆ ಬರಲು ಸಿದ್ಧವಾಗುತ್ತಿದೆ.

ಇದರ ನಡುವೆಯೇ ರಂಜನಿ ರಾಘವನ್‌ ತೆಲುಗು ಚಿತ್ರರಂಗಕ್ಕೂ ಅಡಿಯಿಡುವ ತಯಾರಿ ನಡೆಸುತ್ತಿದ್ದಾರೆ. ಕನ್ನಡ ಮತ್ತು ತೆಲುಗು ಭಾಷೆಯಲ್ಲಿ ಏಕಕಾಲಕ್ಕೆ ನಿರ್ಮಾಣವಾಗುತ್ತಿರುವ ಸತ್ಯಂ ಚಿತ್ರಕ್ಕೆ ರಂಜನಿ ರಾಘವನ್‌ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಸಂತೋಷ್‌ ನಾಯಕನಾಗಿ ಕಾಣಿಸಿಕೊಳ್ಳುತ್ತಿರುವ ಈ ಚಿತ್ರಕ್ಕೆ ಅಶೋಕ್‌ ಕೆ. ಕಡಬ ಆ್ಯಕ್ಷನ್‌-ಕಟ್‌ ಹೇಳುತ್ತಿದ್ದಾರೆ. ರವಿ ಬಸ್ರೂರು ಚಿತ್ರಕ್ಕೆ ಸಂಗೀತ ಸಂಯೋಜನೆ ಮಾಡುತ್ತಿದ್ದಾರೆ.

ಉಳಿದಂತೆ ಈ ಚಿತ್ರದಲ್ಲಿ ವಿನಯಾ ಪ್ರಸಾದ್‌, ಪವಿತ್ರ ಲೋಕೇಶ್‌, ದತ್ತಣ್ಣ, ಸುಮನ್‌,ಅವಿನಾಶ್‌ ಮೊದಲಾದ ಕನ್ನಡ ಮತ್ತು ತೆಲುಗಿನ ಅನೇಕ ಕಲಾವಿದರು ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ.
ಇನ್ನು ಸತ್ಯಂ ಚಿತ್ರದ ಕಥೆ ಕೇಳಿ ಇಂಪ್ರಸ್‌ ಆದ ರಂಜಿನಿ ಈ ಚಿತ್ರ ಮಾಡಲು ಒಪ್ಪಿಕೊಂಡಿದ್ದಾರಂತೆ. ಕನ್ನಡ ಮತ್ತು ತೆಲುಗು ಎರಡೂ ನೇಟಿವಿಟಿಗೂ ಹೊಂದಾಣಿಕೆಯಾಗುವಂಥ ಕಥೆ ಈ ಚಿತ್ರದಲ್ಲಿರುವುದರಿಂದ ಕನ್ನಡ-ತೆಲುಗು ಎರಡೂ ಭಾಷೆಯ ಪ್ರೇಕ್ಷಕರಿಗೂ ಈ ಚಿತ್ರ ಇಷ್ಟವಾಗುತ್ತದೆ ಅನ್ನೋ ನಂಬಿಕೆ ರಂಜನಿ ಅವರದ್ದು.

ಈ ಬಗ್ಗೆ ಮಾತನಾಡುವ ರಂಜನಿ, “ನಾನು ಎಷ್ಟು ಸಿನಿಮಾಗಳಲ್ಲಿ ಅಭಿನಯಿಸಿದ್ದೇನೆ ಅನ್ನೋದಕ್ಕಿಂತ, ಎಷ್ಟು ಒಳ್ಳೆಯ ಪಾತ್ರಗಳಲ್ಲಿ, ಎಷ್ಟು ಒಳ್ಳೆಯ ಕಥೆಯಲ್ಲಿ ಕಾಣಿಸಿಕೊಂಡಿದ್ದೇನೆ ಅನ್ನೋದು ನನಗೆ ತುಂಬ ಮುಖ್ಯ. ಸಂಖ್ಯೆಗಿಂತ ಸಿಗುವ ಚಿತ್ರಗಳು ಮತ್ತು ಒಳ್ಳೆಯ ಪಾತ್ರಗಳು ಮುಖ್ಯ. ಇಲ್ಲಿಯವರೆಗೆ ಅನೇಕ ಸಿನಿಮಾಗಳ ಕಥೆ ಕೇಳಿದ್ದರೂ, ನಾನು ಇಲ್ಲಿಯವರೆಗೆ ಒಪ್ಪಿಕೊಂಡಿದ್ದು, ಕೇವಲ ಎರಡು-ಮೂರು ಚಿತ್ರಗಳನ್ನ ಮಾತ್ರ. ಮುಂದೆಯೂ ಅಷ್ಟೇ, ಒಳ್ಳೆಯ ಚಿತ್ರಗಳು ಮತ್ತು ಪಾತ್ರಗಳು ಸಿಕ್ಕರೆ ಮಾತ್ರ ಅಭಿನಯಿಸುತ್ತೇನೆ’ ಎನ್ನುತ್ತಾರೆ.

ಒಟ್ಟಾರೆ ಇಲ್ಲಿಯವರೆಗೆ ಕನ್ನಡ ಕಿರುತೆರೆ ಲೋಕದಲ್ಲಿ ಸಂಚಲನ ಮೂಡಿಸಿದ್ದ ಪುಟ್ಟ ಗೌರಿ ಮದುವೆ ಧಾರಾವಾಹಿ ಮೂಲಕ ಕನ್ನಡಿಗರಿಗೆ ಪರಿಚಿತವಾದ ನಟಿ ರಂಜಿನಿ ರಾಘವನ್‌ ಅಭಿನಯ ಯಾನ ಈಗ ತೆಲುಗಿನತ್ತ ಸಾಗಿದ್ದು, ತೆಲುಗು ಪ್ರೇಕ್ಷಕರು “ಪುಟ್ಟಗೌರಿ’ ಅಭಿನಯಕ್ಕೆ ಎಷ್ಟರ ಮಟ್ಟಿಗೆ ಫಿದಾ ಆಗಲಿದ್ದಾರೆ ಅನ್ನೋದು ಮುಂದಿನ ವರ್ಷದ ಮಧ್ಯ ಭಾಗದಲ್ಲಿ ಗೊತ್ತಾಗಲಿದೆ.