ಹೈದರಾಬಾದ್: ಅಲ್ಲು ಅರ್ಜುನ್ ಅವರ ʼಪುಷ್ಪ-2ʼ ಸಿನಿಮಾ ರಿಲೀಸ್‌ ಗೆ ಇನ್ನು ಕೆಲ ತಿಂಗಳು ಬಾಕಿಯಿದೆ. ಆದರೂ ಸಿನಿಮಾದ ಬಗೆಗಿನ ನಿರೀಕ್ಷೆ ದಿನಕಳೆದಂತೆ ಹೆಚ್ಚಾಗುತ್ತಿದೆ.
ಇತ್ತೀಚೆಗೆ ಅಲ್ಲು ಅರ್ಜುನ್ ಅವರ ಹುಟ್ಟುಹಬ್ಬಕ್ಕೆ ʼಪುಷ್ಪ-2ʼ ಚಿತ್ರತಂಡ ಕ್ಯಾರೆಕ್ಟರ್‌ ಟೀಸರ್‌ ರಿಲೀಸ್‌ ಮಾಡಿತ್ತು. ಇದಾದ ಬಳಿಕ ಸಿನಿಮಾ ಮೊದಲ ಹಾಡನ್ನು ರಿಲೀಸ್‌ ಮಾಡಲಾಗಿದೆ.
ʼಪುಷ್ಪರಾಜ್‌ʼ ಮ್ಯಾನೇರಿಸಂ ತೋರಿಸುವ ʼಪುಷ್ಪ ಪುಷ್ಪʼ ಹಾಡು ಟಾಲಿವುಡ್‌ ಹಾಗೂ ಅಲ್ಲು ಅರ್ಜುನ್ ಪ್ಯಾನ್‌ ಇಂಡಿಯಾ ಫ್ಯಾನ್ಸ್‌ ಗಳಲ್ಲಿ ಸಖತ್‌ ಕ್ರೇಜ್‌ ಹುಟ್ಟಿಸಿದೆ. ಸಿನಿಮಾದ ಮೇಲಿನ ನಿರೀಕ್ಷೆ ಎಷ್ಟಿದೆ ಎನ್ನುವುದು ಹಾಡು ರಿಲೀಸ್‌ ಆಗಿ ಬಂದಿರುವ ವೀವ್ಸ್‌ ನೋಡಿದರೆ ಗೊತ್ತಾಗುತ್ತದೆ.
ʼಪುಷ್ಪ ಪುಷ್ಪʼ ಹಾಡು ಟ್ರೆಂಡ್‌ ನಲ್ಲಿರುವಾಗಲೇ ಹೊಸ ದಾಖಲೆ ಬರೆದಿದೆ. ʼಪುಷ್ಪ ಪುಷ್ಪʼ ಹಾಡು ಈಗ 6 ಭಾಷೆಗಳಲ್ಲಿ 50 ಮಿಲಿಯನ್ ಯೂಟ್ಯೂಬ್ ವೀಕ್ಷಣೆಗಳನ್ನು ತಲುಪಿದೆ. ಈ ಮೂಲಕ ಅತ್ಯಂತ ವೇಗದಲ್ಲಿ ಅತೀ ಹೆಚ್ಚು ವೀಕ್ಷಣೆ ಕಂಡಿರುವ ಹಾಡಾಗಿ ಮೂಡಿ ಬಂದಿದೆ. ಸದ್ಯ ಈ ಹಾಡು 15 ದೇಶಗಳಲ್ಲಿ ಟ್ರೆಂಡಿಂಗ್ ಆಗಿದ್ದು, ಇನ್ಸ್ಟಾಗ್ರಾಮ್ ನಲ್ಲಿ ಈ ಹಾಡಿನಲ್ಲಿ 100K ರೀಲ್ಸ್‌ ಗಳಾಗಿದೆ.
ʼಪುಷ್ಪ ಪುಷ್ಪʼ ಎಂಬ ಶೀರ್ಷಿಕೆಯಡಿ ಬಂದಿರುವ ಹಾಡಿನ ಸಾಹಿತ್ಯವನ್ನು ಚಂದ್ರ ಬೋಸ್ ಬರೆದಿದ್ದಾರೆ. ನಕಾಶ್ ಅಜೀಜ್ ,ದೀಪಕ್ ಬ್ಲೂ ಹಾಡಿಗೆ ಧ್ವನಿಯಾಗಿದ್ದಾರೆ. ದೇವಿ ಶ್ರೀ ಪ್ರಸಾದ್ ಹಾಡನ್ನು ಸಂಯೋಜಿಸಿದ್ದಾರೆ.
ಸುಕುಮಾರ್ ನಿರ್ದೇಶನದ ʼಪುಷ್ಪ 2: ದಿ ರೂಲ್ʼ ಚಿತ್ರದಲ್ಲಿ ಅಲ್ಲು, ರಶ್ಮಿಕಾ ಮತ್ತು ಫಾಹದ್ ಫಾಸಿಲ್‌ ಮುಂತಾದ ಪ್ರಮುಖರು ಕಾಣಿಸಿಕೊಳ್ಳಲಿದ್ದಾರೆ. ಇದೇ ವರ್ಷದ ಆಗಸ್ಟ್ 15 ರಂದು ಚಿತ್ರ ಬಿಡುಗಡೆಯಾಗಲಿದೆ.
