ಕುಪ್ಪೆಪದವು: ಬಿರುಗಾಳಿಯಿಂದ ಎರಡು ಮನೆಗಳಿಗೆ ವ್ಯಾಪಕ ಹಾನಿ

ಎಡಪದವು: ಮುತ್ತೂರು ಪಂಚಾಯತ್‌ ವ್ಯಾಪ್ತಿಯ ಎರಡು ಮನೆಗಳಿಗೆ ಮಂಗಳವಾರ ರಾತ್ರಿ ಬೀಸಿದ ಭಾರೀ ಗಾಳಿ ಮಳೆಗೆ ಹಾನಿಯಾಗಿದೆ. ಕುಳವೂರು ಗ್ರಾಮದ ಅಟ್ಟೆಪದವಿನ ರಾಮ ಪೂಜಾರಿ ಎಂಬವರ ಹೆಂಚಿನ ಮನೆಗೆ ಸೇರಿಸಿ ಕಟ್ಟಿದ ಸಿಮೆಂಟ್‌ ಶೀಟ್‌ಗಳು ಗಾಳಿಗೆ ಹಾರಿ ಹೋಗಿದ್ದು, ಮನೆ ಜಖಂಗೊಂಡಿದೆ.

ಇದರಿಂದ ರಾಮ ಪೂಜಾರಿಯವರಿಗೆ ಅಂದಾಜು ಸುಮಾರು ನಾಲ್ಕೂವರೆ ಲಕ್ಷ ರೂ. ನಷ್ಟ ಉಂಟಾಗಿದೆ ಎಂದು ಆಂದಾ ಜಿಸಲಾಗಿದೆ.ಕುಳವೂರಿನ ಬಳ್ಳಾಜೆ ಎಂಬಲ್ಲಿ ರವಿರಾಜ್‌ ಆಚಾರ್ಯ ಎಂಬವರ ಮನೆಯ ಮೇಲೆ ಆಲದ ಮರ ಉರುಳಿಬಿದ್ದು, ಮನೆ ಭಾಗಶಃ ಜಖಂಗೊಂಡಿದೆ. ರಾತ್ರಿ ಬೀಸಿದ ಬಿರುಗಾಳಿಯಿಂದ ಮನೆಯ ಮುಂಭಾಗದಲ್ಲಿದ್ದ ಆಲದ ಮರ ಮನೆಯ ಮೇಲೆ ಬಿದ್ದು ಹಾನಿ ಸಂಭವಿಸಿದ್ದು, ಅಂದಾಜು 60,000 ರೂ. ನಷ್ಟ ಉಂಟಾಗಿದೆ.

ತಾ.ಪಂ. ಸದಸ್ಯ ನಾಗೇಶ್‌ ಶೆಟ್ಟಿ ಪುತ್ತೂರು, ಗ್ರಾ.ಪಂ. ಸದಸ್ಯರಾದ ಸತೀಶ್‌ ಬಳ್ಳಾಜೆ, ಪ್ರವೀಣ್‌ ಆಳ್ವ, ಗುಂಡ್ಯ ಗ್ರಾಮಕರಣಿಕ ದೇವರಾಯ ಮೊದಲಾದವರು ಭೇಟಿ ನೀಡಿದ್ದು, ಪರಿಹಾರ ಒದಗಿಸುವ ಭರವಸೆ ನೀಡಿದ್ದಾರೆ.