ಮಂತ್ರಾಲಯಕ್ಕೆ ನಟ ಪುನೀತ್‌ ದಂಪತಿ ಭೇಟಿ 

ರಾಯಚೂರು: ಚಿತ್ರನಟ ಪುನೀತ್‌ ರಾಜಕುಮಾರ್‌ ಪತ್ನಿ ಅಶ್ವಿ‌ನಿ ಸಮೇತರಾಗಿ ಮಂತ್ರಾಲಯದ ಶ್ರೀ ರಾಘವೇಂದ್ರ ಸ್ವಾಮಿ ಮಠಕ್ಕೆ ಗುರುವಾರ ಭೇಟಿ ನೀಡಿ ಗುರುರಾಯರ ದರ್ಶನ ಪಡೆದರು.

ಮಧ್ಯಾಹ್ನ 12:30ರ ಸುಮಾರಿಗೆ ಶ್ರೀಮಠಕ್ಕೆ ಬಂದ ಅವರು, ಮೊದಲಿಗೆ ಮಂಚಾಲಮ್ಮ ದೇವಿಗೆ ವಿಶೇಷ ಅರ್ಚನೆ ಮಾಡಿಸಿದರು. ಬಳಿಕ ನೇರವಾಗಿ ಶ್ರೀಮಠದ ಪೀಠಾ ಧಿಪತಿ ಶ್ರೀ ಸುಬುಧೇಂದ್ರ ತೀರ್ಥರ ಬಳಿ ತೆರಳಿ ಕುಶಲೋಪರಿ ವಿಚಾರಿಸಿದರು. ಈ ವೇಳೆ ಪುನೀತ್‌ ರಾಜಕುಮಾರ್‌ ದಂಪತಿಯನ್ನು ಸನ್ಮಾನಿಸಿದ ಶ್ರೀಗಳು, ಡಾ. ರಾಜಕುಮಾರ್‌ ಅವರೊಂದಿಗಿನ ಮಠದ ಒಟನಾಟದ ಕುರಿತು ಸ್ಮರಿಸಿದರು.

ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಪುನೀತ್‌ ರಾಜಕುಮಾರ್‌, ಬಹಳ ದಿನಗಳ ನಂತರ ಮಂತ್ರಾಲಯಕ್ಕೆ ಬಂದಿದ್ದೇನೆ. ಈಗ ರಾಯರ ದರ್ಶನಕ್ಕೆ ಅವಕಾಶ ಸಿಕ್ಕಿದೆ. ಮುಂದಿನ ತಿಂಗಳು ನಟ ಸಾರ್ವಭೌಮ ಸಿನಿಮಾ ಬಿಡುಗಡೆ ಆಗಲಿದೆ. ಸಾಕಷ್ಟು ನಿರೀಕ್ಷೆಗಳಿವೆ. ಐಟಿ ದಾಳಿ ಮುಗಿದ ವಿಚಾರ ಎಂದು ನುಡಿದರು.