“ತೂಗುದೀಪ ದರ್ಶನ’ಕ್ಕೆ ಪುನೀತ್‌ ಸಾಥ್‌

ತೂಗುದೀಪ ಫ್ಯಾಮಿಲಿ ಕುರಿತಾದ “ತೂಗುದೀಪ ದರ್ಶನ’ ಎಂಬ ಪುಸ್ತಕವೊಂದು ಸಿದ್ಧವಾಗಿದೆ. ಪತ್ರಕರ್ತ ವಿನಾಯಕರಾಮ್‌ ಕಲಗಾರು ಅವರು ಬರೆದಿರುವ ಈ ಪುಸ್ತಕದ ಮುಖಪುಟವನ್ನು ಇತ್ತೀಚೆಗೆ ನಟ ಪುನೀತ್‌ ರಾಜ್‌ಕುಮಾರ್‌ ಅವರು ಬಿಡುಗಡೆ ಮಾಡಿ ಶುಭಕೋರಿದ್ದಾರೆ.

ಈ ಪುಸ್ತಕದಲ್ಲಿ ಮೀನಾ ತೂಗುದೀಪ ಅವರು ತಮ್ಮ ಕಲಾ ಕುಟುಂಬದ ಆರಂಭದ ದಿನಗಳಿಂದ ಹಿಡಿದು ಹಲವು ಅಪರೂಪದ ಹಾಗು ಅಚ್ಚರಿಯ ವಿಷಯಗಳನ್ನು ಹಂಚಿಕೊಂಡಿದ್ದಾರೆ. ತೂಗುದೀಪ ಶ್ರೀನಿವಾಸ್‌ ಅವರ ಕುರಿತಾದ ಅಪರೂಪದ ಘಟನೆಗಳು, ದರ್ಶನ್‌ ಅವರ ಸಿನಿಮಾ ಹಾದಿ, ಆ ಹಾದಿ ಯಲ್ಲಿ ಎದುರಾದ ಸವಾಲುಗಳು, ಸಮಸ್ಯೆಗಳು … ಹೀಗೆ ಹಲವು ಅಂಶಗಳನ್ನು ಈ ಪುಸ್ತಕದಲ್ಲಿ ದಾಖಲಿಸಲಾಗಿದೆ.

ಇದು ಮೊದಲ ವರ್ಶನ್‌ ಆಗಿದ್ದು, ಶೀಘ್ರದಲ್ಲೇ ಬಿಡುಗಡೆಯಾಗಲಿದೆ. ಇದರ ಬೆನ್ನಿಗೆ ಮತ್ತೂಂದು ವರ್ಶನ್‌ ತರುವ ತಯಾರಿಯಲ್ಲಿದ್ದಾರೆ ಲೇಖಕ ವಿನಾಯಕರಾಮ್‌ ಕಲಗಾರು. ಅಂದಹಾಗೆ, ಈ ಪುಸ್ತಕ ಶ್ರೀನಿವಾಸ್‌ ಅವರ ಜೋಹಾರ್‌ ಪ್ರಕಾಶನದಿಂದ ಹೊರಬರುತ್ತಿರುವುದು ವಿಶೇಷ. ಈಗಾಗಲೇ ಸಾಕಷ್ಟು ಸಿನಿಮಾ ಗಣ್ಯರು, ನಟರು, ಪುಸ್ತಕ ಬಗ್ಗೆ ಮಾತನಾಡಿದ್ದು, ದರ್ಶನ್‌ ಅಭಿಮಾನಿಗಳಲ್ಲಿ ಪುಸ್ತಕ ಸಾಕಷ್ಟು ಕುತೂಹಲ ಕೆರಳಿಸಿರುವುದಂತೂ ನಿಜ.