ನವದೆಹಲಿ: ಸರ್ಕಾರಿ ಸ್ವಾಮ್ಯದ ಬ್ಯಾಂಕ್‌ಗಳ ಅನುತ್ಪಾದಕ ಆಸ್ತಿ (ಎನ್‌ಪಿಎ) 7.34 ಲಕ್ಷ ಕೋಟಿ ರೂ.ಗೆ ತಲುಪಿದೆ. ಇದು ಸೆಪ್ಟೆಂಬರ್‌ ಅಂತ್ಯದ ವರೆಗಿನ ಮಾಹಿತಿ ಎಂದು ಭಾರತೀಯ ರಿಸರ್ವ್‌ ಬ್ಯಾಂಕ್‌ (ಆರ್‌ಬಿಐ) ದೃಢಪಡಿಸಿದೆ. ಖಾಸಗಿ ಕ್ಷೇತ್ರದ ಬ್ಯಾಂಕ್‌ ಗಳ ಅನುತ್ಪಾದಕ ಆಸ್ತಿಯ ಪ್ರಮಾಣ ಇದೇ ಅವಧಿಯಲ್ಲಿ 1.03 ಲಕ್ಷ ಕೋಟಿ ರೂ. ಆಗಿದೆ. ಆರ್‌ ಬಿಐ ದಾಖಲೆಗಳಿಗೆ ಪೂರಕವಾಗಿ ಕೇಂದ್ರ ಹಣಕಾಸು
ಸಚಿವಾಲಯ ನೀಡಿದ ದಾಖಲೆಗಳೂ ಸ್ಪಷ್ಟವಾಗಿ ಇದೇ ಅಂಶವನ್ನೂ ಸೂಚಿಸಿವೆ.
ಕೇಂದ್ರ ಸರ್ಕಾರವೇ ನೀಡಿದ ಮಾಹಿತಿ ಪ್ರಕಾರ, ಬ್ಯಾಂಕಿಂಗ್‌ ಕ್ಷೇತ್ರದ ಒಟ್ಟು ಎನ್‌ಪಿಎ ಪೈಕಿ ಶೇ.77ರಷ್ಟನ್ನು ಖಾಸಗಿ ಕ್ಷೇತ್ರದ ಪ್ರಮುಖ ಕಂಪನಿಗಳು ಮತ್ತು ಕಾರ್ಪೊರೇಟ್‌ ಸಂಸ್ಥೆಗಳೇ ಹೊಂದಿವೆ.
ಸರ್ಕಾರಿ ಬ್ಯಾಂಕ್‌ಗಳ ಪೈಕಿ ಎಸ್‌ಬಿಐ 1.86 ಲಕ್ಷ ಕೋಟಿ ರೂ, ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ 57,630 ಕೋಟಿ ರೂ., ಬ್ಯಾಂಕ್‌ ಆಫ್ ಇಂಡಿಯಾ 49,307 ಕೋಟಿ ರೂ., ಬ್ಯಾಂಕ್‌ ಆಫ್ ಬರೋಡಾ 46,307 ಕೋಟಿ ರೂ., ಕೆನರಾ ಬ್ಯಾಂಕ್‌ 39, 166 ಕೋಟಿ ರೂ.
ಯೂನಿಯನ್‌ ಬ್ಯಾಂಕ್‌ ಆಫ್ ಇಂಡಿಯಾ 38,286 ಕೋಟಿ ರೂ. ಎನ್‌ಪಿಎ ಹೊಂದಿವೆ. ಖಾಸಗಿ ರಂಗದ ಬ್ಯಾಂಕ್‌ಗಳ ಪೈಕಿ ಐಸಿಐಸಿಐ ಬ್ಯಾಂಕ್‌ 44,237 ಕೋಟಿ ರೂ, ಆ್ಯಕ್ಸಿಸ್‌ ಬ್ಯಾಂಕ್‌ 22,136 ಕೋಟಿ ರೂ. ಮೌಲ್ಯದ ಎನ್‌ಪಿಎ ಹೊಂದಿದೆ.
