ಪ್ರೊ ಕಬಡ್ಡಿ : ಮುಂಬಾ-ತಮಿಳ್‌ ಟೈ ; ಯುಪಿ ಯೋಧಾ ಎದುರು ಜೈಪುರ ಜಯ

ಬೆಂಗಳೂರು : ಸೋಮವಾರದ ಪ್ರೊ ಕಬಡ್ಡಿ ಮುಖಾಮುಖೀಯಲ್ಲಿ ಜೈಪುರ್‌ ಪಿಂಕ್‌ ಪ್ಯಾಂಥರ್ ಗೆಲುವಿನ ಸಂಭ್ರಮ ಆಚರಿಸಿದೆ. ಅದು ಯುಪಿ ಯೋಧಾ ತಂಡವನ್ನು 32-29 ಅಂತರದಿಂದ ಮಣಿಸಿ ಎರಡನೇ ಜಯ ಸಾಧಿಸಿತು. ರೈಡರ್‌ ಅರ್ಜುನ್‌ ದೇಶ್ವಾಲ್‌ (11 ಅಂಕ), ಆಲ್‌ರೌಂಡರ್‌ಗಳಾದ ದೀಪಕ್‌ ಹೂಡಾ (9 ಅಂಕ) ಮತ್ತು ನಿತಿನ್‌ ರಾವಲ್‌ (4 ಅಂಕ) ಜೈಪುರ್‌ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದರು.

ಯುಪಿ ಯೋಧಾ ಸಾಂ ಕವಾಗಿ ಹೋರಾಡಲು ವಿಫ‌ಲವಾಯಿತು. ರೈಡರ್‌ ಸುರೇಂದರ್‌ ಗಿಲ್‌ ಏಕಾಂಗಿಯಾಗಿ ಹೋರಾಡಿ 10 ಅಂಕ ಗಳಿಸಿಕೊಟ್ಟರು. ರೈಡರ್‌ ಪ್ರದೀಪ್‌ ನರ್ವಾಲ್‌ ಯಶಸ್ಸು ಕಾಣಲಿಲ್ಲ (3 ಅಂಕ). ಈ ಜಯದೊಂದಿಗೆ ಜೈಪುರ್‌ ಅಂಕಪಟ್ಟಿಯಲ್ಲಿ 3ನೇ ಸ್ಥಾನಕ್ಕೆ ನೆಗೆಯಿತು.
3 ಪಂದ್ಯಗಳಲ್ಲಿ 2 ಸೋಲನುಭವಿಸಿದ ಯೋಧಾ 7ನೇ ಸ್ಥಾನಿಯಾಯಿತು.

ರೋಚಕ ಮುಖಾಮುಖೀ
ಮೊದಲ ಪಂದ್ಯದ ರಭಸ ಕಂಡಾಗ ತಮಿಳ್‌ ದೊಡ್ಡ ಅಂತರದಲ್ಲಿ ಗೆಲ್ಲುವ ಸೂಚನೆ ಲಭಿಸಿತ್ತು. ಬಳಿಕ ಮುಂಬಾ ತಿರುಗಿ ಬಿತ್ತು. ಗೆಲುವಿನ ಹಂತಕ್ಕೂ ಬಂತು. ಆದರೆ ಅಂತಿಮ ಫ‌ಲಿತಾಂಶ 30-30 ಅಂತರದಿಂದ ಟೈ ಆಯಿತು!

ತಮಿಳ್‌ ತಲೈವಾಸ್‌ ಆರಂಭದಿಂದಲೇ ಆಕ್ರಮಣಕಾರಿ ಆಟಕ್ಕಿಳಿಯಿತು. ಇದನ್ನು ತಡೆದುಕೊಳ್ಳಲು ಮುಂಬಾಗೆ ಸಾಧ್ಯವಾಗಲಿಲ್ಲ. ರೈಡರ್‌ ಮನ್‌ಜಿàತ್‌, ನಾಯಕ ಸುರ್ಜೀತ್‌ ಸಿಂಗ್‌ ತಲೈವಾಸ್‌ಗೆ ಉತ್ತಮ ಮುನ್ನಡೆ ತಂದಿತ್ತರು. ಆದರೂ ವಿರಾಮದ ವೇಳೆ ಇದನ್ನು 17-14ಕ್ಕೆ ಇಳಿಸುವಲ್ಲಿ ಮುಂಬಾ ಯಶಸ್ವಿಯಾಯಿತು.

ದ್ವಿತೀಯಾರ್ಧದಲ್ಲಿ ಯು ಮುಂಬಾ ತಿರುಗಿ ಬಿತ್ತು. ರೈಡರ್‌ ವಿ. ಅಜಿತ್‌ ಪರಾಕ್ರಮದಿಂದ ಮುನ್ನಡೆ ಸಾಧಿಸುವಲ್ಲಿ ಯಶಸ್ವಿಯಾಯಿತು. ಅವರು 15 ಅಂಕ ತಂದಿತ್ತರು. ಅವರ 22 ರೈಡ್‌ಗಳಲ್ಲಿ 12 ರೈಡ್‌ ಯಶಸ್ವಿಯಾಗಿತ್ತು. ಆದರೆ ಕೊನೆಯ ಕ್ಷಣದಲ್ಲಿ ಎಡವಟ್ಟು ಮಾಡಿಕೊಂಡು ಗೆಲುವಿನ ಅವಕಾಶವನ್ನು ಕೈಚೆಲ್ಲಿದರು.