Pro Kabaddi: ಪಾಟ್ನಾ ಪೈರೇಟ್ಸ್‌ ವಿರುದ್ಧ ಪುನೇರಿ 6ನೇ ಜಯಭೇರಿ

ಚೆನ್ನೈ: ಹತ್ತನೇ ಪ್ರೊ ಕಬಡ್ಡಿ ಸೀಸನ್‌ನಲ್ಲಿ ಪುನೇರಿ ಪಲ್ಟಾನ್‌ ಪರಾಕ್ರಮ ಮುಂದುವರಿದಿದೆ. ಮಂಗಳವಾರದ ಮುಖಾಮುಖೀಯಲ್ಲಿ ಅದು ಪಾಟ್ನಾ ಪೈರೇಟ್ಸ್‌ ವಿರುದ್ಧ 46-28 ಅಂತರದ ಭರ್ಜರಿ ಗೆಲುವು ಸಾಧಿಸಿತು.

ಇದು 7 ಪಂದ್ಯಗಳಲ್ಲಿ ಪುನೇರಿ ಸಾಧಿಸಿದ 6ನೇ ಜಯ. ಇನ್ನೊಂದೆಡೆ ಪಾಟ್ನಾ 7 ಪಂದ್ಯಗಳಲ್ಲಿ 4ನೇ ಸೋಲನುಭವಿಸಿತು.

ಪುನೇರಿ ಪರ ರೈಡರ್‌ ಪಂಕಜ್‌ ಮೋಹಿತೆ ಅಮೋಘ ಪ್ರದರ್ಶನ ನೀಡಿ 11 ಅಂಕ ಗಳಿಸಿದರು. ಇದರಲ್ಲಿ 10 ಟಚ್‌ ಪಾಯಿಂಟ್‌ಗಳಾಗಿದ್ದವು. ಒಂದಂಕ ಟ್ಯಾಕಲ್‌ ಮೂಲಕ ಬಂತು.
ರೈಡರ್‌ ಮೋಹಿತ್‌ ಗೋಯತ್‌ (9 ಅಂಕ), ನಾಯಕ ಅಸ್ಲಾಮ್‌ ಮುಸ್ತಾಫಾ ಮತ್ತು ಆಲ್‌ರೌಂಡರ್‌ ಮೊಹಮ್ಮದ್‌ ರೇಝ ತಲಾ 6 ಅಂಕ ಗಳಿಸಿದರು.

ಪಾಟ್ನಾ ಪರ ರೈಡರ್‌ ಸಚಿನ್‌ ಅತ್ಯಧಿಕ 8 ಅಂಕ ಗಳಿಸಿದರೆ, ಸುಧಾಕರ್‌ ಎಂ. 5 ಅಂಕ ತಂದಿತ್ತರು.