ಬೆಂಗಳೂರು ಬುಲ್ಸ್‌ ಪ್ಲೇ ಆಫ್ ಆಸೆ ಜೀವಂತ

ಬೆಂಗಳೂರು: ತನ್ನ ಕೊನೆಯ ಪ್ರೊ ಕಬಡ್ಡಿ ಲೀಗ್‌ ಪಂದ್ಯದಲ್ಲಿ ಹರ್ಯಾಣ ಸ್ಟೀಲರ್ ವಿರುದ್ಧ 46-24 ಅಂತರದ ಗೆಲುವು ಸಾಧಿಸಿದ ಬೆಂಗಳೂರು ಬುಲ್ಸ್‌ನ ಪ್ಲೇ ಆಫ್ ಸುತ್ತಿನ ಅವಕಾಶ ಜೀವಂತವಾಗಿದೆ. ಬುಲ್ಸ್‌ 22 ಪಂದ್ಯಗಳಿಂದ 11 ಜಯ ಗಳಿಸಿ ಒಟ್ಟು ಅಂಕವನ್ನು 66ಕ್ಕೆ ಏರಿಸಿದೆ. ಸದ್ಯ ಅಂಕಪಟ್ಟಿಯಲ್ಲಿ ಅಗ್ರ ಆರರಲ್ಲಿದ್ದರೂ ಉಳಿದ ಪಂದ್ಯಗಳ ಫ‌ಲಿತಾಂಶ ಬುಲ್ಸ್‌ ಭವಿಷ್ಯವನ್ನು ನಿರ್ಧರಿಸಬೇಕಿದೆ.

ಬುಲ್ಸ್‌ನ “ಮಸ್ಟ್‌ ವಿನ್‌’ ಪಂದ್ಯದಲ್ಲಿ ಮಿಂಚಿದವರು ರೈಡರ್‌ ಪವನ್‌ ಸೆಹ್ರಾವತ್‌. ಅವರು ಆಲ್‌ರೌಂಡ್‌ ಆಟದ ಮೂಲಕ 20 ಅಂಕ ಗಳಿಸಿದರು. ಇದರಲ್ಲಿ 7 ಟ್ಯಾಕಲ್‌ ಅಂಕ ಸೇರಿದೆ. ರೈಡರ್‌ ಭರತ್‌ (8), ಡಿಫೆಂಡರ್‌ ಅಮಾನ್‌ (4) ಕೂಡ ಉತ್ತಮ ಪ್ರದರ್ಶನವಿತ್ತರು. ಹರ್ಯಾಣ ಎಲ್ಲ ವಿಭಾಗಗಳಲ್ಲೂ ವೈಫ‌ಲ್ಯ ಕಂಡಿತು.

ಮುಂಬಾಗೆ ಹ್ಯಾಟ್ರಿಕ್‌ ಸೋಲು :

ದಿನದ ಮೊದಲ ಪಂದ್ಯದಲ್ಲಿ ಯುಪಿ ಯೋಧ 35-28 ಅಂಕಗಳಿಂದ ಯು ಮಂಬಾವನ್ನು ಕೆಡವಿತು. ಹ್ಯಾಟ್ರಿಕ್‌ ಹಾಗೂ ಒಟ್ಟಾರೆ 10ನೇ ಸೋಲುಂಡ ಮುಂಬಾ 9ನೇ ಸ್ಥಾನಕ್ಕೆ ಕುಸಿದಿದ್ದು, ಮುಂದಿನ ಸುತ್ತಿನ ರೇಸ್‌ನಿಂದ ಬಹುತೇಕ ಹೊರಬಿದ್ದಿದೆ.