ಬೆಂಗಳೂರು: ಯುಪಿ ಯೋಧ ಪಡೆ ಸತತ 4 ಸೋಲುಗಳಿಂದ ತತ್ತರಿಸಿದೆ. ಬುಧವಾರದ ಮೊದಲ ಪ್ರೊ ಕಬಡ್ಡಿ ಮುಖಾಮುಖಿಯಲ್ಲಿ ಅದು ಪಾಟ್ನಾ ಪೈರೇಟ್ಸ್‌ ವಿರುದ್ಧ 35-37 ಅಂತರದ ಆಘಾತಕ್ಕೊಳಗಾಯಿತು.
ಬಲಿಷ್ಠ ಪಾಟ್ನಾ ಪೈರೇಟ್ಸ್‌ಗೆ ಇದು 14ನೇ ಪಂದ್ಯದಲ್ಲಿ ಒಲಿದ 9ನೇ ಗೆಲುವು. ರೈಡರ್‌ ಸಚಿನ್‌ ಅವರ ಅಮೋಘ ಸಾಹಸ (12 ಅಂಕ) ಪಾಟ್ನಾ ಜಯದಲ್ಲಿ ಪ್ರಮುಖ ಪಾತ್ರ ವಹಿಸಿತು. ಉಳಿದಂತೆ ರೈಡರ್‌ ಪ್ರಶಾಂತ್‌ ಕುಮಾರ್‌ ಹಾಗೂ ಆಲ್‌ರೌಂಡರ್‌ ಮೊಹಮ್ಮದ್‌ ರೇಝ (ತಲಾ 5 ಅಂಕ) ಉತ್ತಮ ಪ್ರದರ್ಶನ ನೀಡಿದರು.
ಯುಪಿ ಯೋಧ ಪರ ರೈಡರ್‌ ಸುರೇಂದರ್‌ ಗಿಲ್‌ (10 ಅಂಕ) ಮತ್ತು ಶ್ರೀಕಾಂತ್‌ ಜಾಧವ್‌ (9 ಅಂಕ) ಆಟ ಉನ್ನತ ಮಟ್ಟದಲ್ಲಿತ್ತು. ಆದರೆ ಉಳಿದವರ ಸಾಮಾನ್ಯ ಮಟ್ಟದ ಆಟದಿಂದಾಗಿ ಪಾಟ್ನಾ ಸವಾಲನ್ನು ಮೆಟ್ಟಿ ನಿಲ್ಲಲು ಸಾಧ್ಯವಾಗಲಿಲ್ಲ. ಯೋಧ 16 ಪಂದ್ಯಗಳಲ್ಲಿ ಅನುಭವಿಸಿದ 8ನೇ ಸೋಲು ಇದಾಗಿದೆ.
ಮುಂಬಾಗೆ ಸೋಲು
ದಿನದ ಮತ್ತೊಂದು ಪಂದ್ಯದಲ್ಲಿ ಪುಣೇರಿ ತಂಡ ಮಾಜಿ ಚಾಂಪಿಯನ್‌ ಯು ಮುಂಬಾ ವಿರುದ್ಧ 36-34 ಅಂತರದ ಗೆಲುವು ಸಾಧಿಸಿದೆ. ಇದು ಪುಣೆಗೆ ಒಲಿದ ಸತತ 4ನೇ ಗೆಲುವು.
ಪುಣೇರಿ ಪರ ರೈಡಿಂಗ್‌ನಲ್ಲಿ ಮೋಹಿತ್‌ 9 ಟ್ಯಾಕಲ್‌ನಲ್ಲಿ ಆಸ್ಲಂ 8ಅಂಕ ಗಳಿಸಿದರೆ ಮುಂಬಾ ಪರ ಅಜಿತ್‌ 10, ಅಭಿಷೇಕ್‌ ಸಿಂಗ್‌ 8 ಅಂಕ ಸಂಪಾದಿಸಿದರು.
