ಪ್ರೊ ಕಬಡ್ಡಿ ಲೀಗ್‌: ಮೊದಲೆರಡು ಪಂದ್ಯ ರೋಚಕ ಟೈ

ಬೆಂಗಳೂರು: ಇಲ್ಲಿನ ಕಂಠೀರವ ಒಳಾಂಗಣದಲ್ಲಿ ನಡೆಯುತ್ತಿರುವ 9ನೇ ಆವೃತ್ತಿ ಪ್ರೊ ಕಬಡ್ಡಿ ಲೀಗ್‌ನ 2ನೇ ದಿನದ ಮೊದಲೆರಡು ಪಂದ್ಯಗಳು ರೋಚಕ ಟೈಯಲ್ಲಿ ಅಂತ್ಯಗೊಂಡಿವೆ. ಮೂರು ಬಾರಿಯ ಚಾಂಪಿಯನ್‌ ಪಟ್ನಾ ಪೈರೇಟ್ಸ್‌ ಮತ್ತು ಪುನೇರಿ ಪಲ್ಟಾನ್‌ ನಡುವಣ ಪಂದ್ಯ 34-34 ಅಂಕಗಳಿಂದ ಟೈಗೊಂಡಿತು.

ದ್ವಿತೀಯ ಪಂದ್ಯದಲ್ಲಿ ಗುಜರಾತ್‌ ಜೈಂಟ್ಸ್‌ ಆರಂಭದಲ್ಲಿ ಭರ್ಜರಿಯಾಗಿ ಆಡಿ ಮೊದಲ ಅವಧಿಯಲ್ಲಿ ಮುನ್ನಡೆ ಸಾಧಿಸಿತ್ತು. ಆದರೆ ದ್ವಿತೀಯ ಅವಧಿಯಲ್ಲಿ ತಿರುಗಿ ಬಿದ್ದ ತಮಿಳು ತಲೈವಾಸ್‌ ಮುನ್ನಡೆ ಸಾಧಿಸಿತಲ್ಲದೇ ಅಂತಿಮವಾಗಿ ಪಂದ್ಯವನ್ನು 31-31 ಅಂಕಗಳಿಂದ ಟೈಗೊಳಿಸಲು ಯಶಸ್ವಿಯಾಯಿತು. ಇದು ಈ ಋತುವಿನ ಮೊದಲ ಎರಡು ಟೈ ಪಂದ್ಯಗಳಾಗಿವೆ.

ಪಾಟ್ನಾ-ಪುನೇರಿ ಪಂದ್ಯ ರೋಚಕ ಟೈ
ಪಾಟ್ನಾ ಪರ ಖ್ಯಾತ ದಾಳಿಗಾರ ಸಚಿನ್‌ ಉತ್ತಮ ದಾಳಿ ನಡೆಸಿದರು. ಅವರು 21 ಬಾರಿ ಎದುರಾಳಿಯ ಅಂಕಣದೊಳಗೆ ದಾಳಿ ಮಾಡಿದರು. ಈ ಪೈಕಿ ಸ್ಪರ್ಶದಿಂದ 7, ಬೋನಸ್‌ ರೂಪದಲ್ಲಿ 1 ಅಂಕ ಪಡೆದರು. ಒಟ್ಟಾರೆ ಅವರ ಅಂಕ 8. ಇವರಿಗೆ ಆಲ್‌ರೌಂಡರ್‌ ರೋಹಿತ್‌ ಗುಲಿಯ ಉತ್ತಮ ನೆರವು ನೀಡಿದರು. 11 ಬಾರಿ ದಾಳಿ ಮಾಡಿದ ರೋಹಿತ್‌ ಒಟ್ಟು 6 ಅಂಕಗಳನ್ನು ಪಡೆದರು. ಎರಡು ಬಾರಿ ಕ್ಯಾಚ್‌ ಯತ್ನ ನಡೆಸಿದರೂ ಅದರಲ್ಲಿ ಯಶಸ್ವಿಯಾಗಲಿಲ್ಲ. ಎಸ್‌.ವಿಶ್ವಾಸ್‌ 4 ಅಂಕ ಪಡೆದು, ದಾಳಿಯಲ್ಲಿ ಯಶಸ್ವಿಯೆನಿಸಿಕೊಂಡರು.

ಪುನೇರಿ ಪರ ಮೂವರು ಉತ್ತಮ ದಾಳಿ ನಡೆಸಿದರು. ನಾಯಕ ಅಸ್ಲಾಮ್‌ ಇನಾಮಾªರ್‌ 13 ಬಾರಿ ಎದುರಾಳಿಗಳ ಕೋಟೆಯೊಳಗೆ ನುಗ್ಗಿ 7 ಅಂಕ ಗಳಿಸಿದರು. ಖ್ಯಾತ ದಾಳಿಗಾರ ಮೋಹಿತ್‌ ಗೋಯತ್‌ 15 ಬಾರಿ ಎದುರಾಳಿಗಳ ಅಂಕಣಕ್ಕೆ ನುಗ್ಗಿ 7 ಅಂಕ ಗಳಿಸಿದರು. ವಿಶೇಷವೆಂದರೆ ರಕ್ಷಣೆಯಲ್ಲೂ ಯಶಸ್ವಿಯಾದ ಅವರು 1 ಅಂಕ ಪಡೆದರು.

ಆಕಾಶ್‌ ಶಿಂದೆ 11 ಬಾರಿ ದಾಳಿ ನಡೆಸಿ, ಸ್ಪರ್ಶದ ಮೂಲಕ 3, ಬೋನಸ್‌ ರೂಪದಲ್ಲಿ 3 ಅಂಕ ಪಡೆದರು. ಎರಡೂ ತಂಡಗಳ ಆಟಗಾರರು ರಕ್ಷಣೆಯಲ್ಲಿ ಪ್ರಬಲ ಕೋಟೆ ಕಟ್ಟಿರುವುದು ಪಂದ್ಯದ ವಿಶೇಷವಾಗಿತ್ತು. ಇದರಿಂದ ಎದುರಾಳಿಗಳು ನಿರೀಕ್ಷಿತ ರೀತಿಯಲ್ಲಿ ಅಂಕಗಳನ್ನು ಗಳಿಸಲು ಸಾಧ್ಯವಾಗದಂತೆ ಮಾಡಿದರು. ಹಾಗಾಗಿ ಪಂದ್ಯ ಟೈಗೊಳ್ಳಲು ಸಾಧ್ಯವಾಯಿತು.