Pro Kabaddi: ಬೆಂಗಳೂರಿಗೆ ಭಾರೀ ಸೋಲು

ಹೈದರಾಬಾದ್‌: ರೈಡಿಂಗ್‌ನಲ್ಲಿ ಹಲವು ಅವಕಾಶ ಕಳೆದುಕೊಂಡ ಬೆಂಗಳೂರು ಬುಲ್ಸ್‌ ತಂಡವು ರವಿವಾರ ನಡೆದ ಪ್ರೊ ಕಬಡ್ಡಿ 10ನೇ ಅವೃತ್ತಿಯ ಪಂದ್ಯದಲ್ಲಿ ತಮಿಳ್‌ ತಲೈವಾಸ್‌ ವಿರುದ್ಧ 28-45 ಅಂಕಗಳಿಂದ ಭಾರೀ ಸೋಲನ್ನು ಕಂಡಿದೆ.ದಿನದ ಇನ್ನೊಂದು ಪಂದ್ಯದಲ್ಲಿ ಪುನೇರಿ ಪಲ್ಟಾನ್ಸ್‌ ತಂಡವು ಗುಜರಾತ್‌ ಜೈಂಟ್ಸ್‌ ತಂಡವನ್ನು 34-24 ಅಂಕಗಳಿಂದ ಸೋಲಿಸಿತು. ಪುನೇರಿ ಆಲ್‌ರೌಂಡ್‌ ಆಟ ಪ್ರದರ್ಶಿಸಿ ಗುಜರಾತ್‌ ವಿರುದ್ಧ ಜಯ ಸಾಧಿಸಿತು. ಆಡಿದ 13 ಪಂದ್ಯಗಳಲ್ಲಿ ಇದು ಪುನೇರಿ ತಂಡದ 11ನೇ ಗೆಲುವು ಆಗಿದ್ದು ತನ್ನ ಅಂಕ ಗಳಿಕೆಯನ್ನು 57ಕ್ಕೇರಿಸಿದ್ದು ಅಗ್ರಸ್ಥಾನಿ ಜೈಪುರಕ್ಕಿಂತ ಒಂದಂಕ ಹಿನ್ನೆಡೆಯಲ್ಲಿದೆ.

ತಮಿಳ್‌ ತಲೈವಾಸ್‌ ಈ ಆವೃತ್ತಿಯಲ್ಲಿ ಸಾಧಾರಣ ನಿರ್ವಹಣೆ ನೀಡಿದ ತಂಡವಾಗಿತ್ತು. ಆಡಿದ 13 ಪಂದ್ಯಗಳಲ್ಲಿ ಕೇವಲ ನಾಲ್ಕರಲ್ಲಿ ಜಯ ಸಾಧಿಸಿತ್ತು. ಆದರೆ ರವಿವಾರ ತಮಿಳ್‌ ರೈಡಿಂಗ್‌ ಮತ್ತು ಟ್ಯಾಕಲ್‌ನಲ್ಲಿ ಅಮೋಘ ನಿರ್ವಹಣೆ ನೀಡಿ ಬೆಂಗಳೂರು ತಂಡವನ್ನು ಬಗ್ಗುಬಡಿಯಿತು. ಬುಲ್ಸ್‌ ಆಟಗಾರರನ್ನು ಹಿಡಿದು ದೊಡ್ಡ ಹೊಡೆತ ನೀಡಿತು. ನರೇಂದರ್‌ ಮತ್ತು ಅಜಿಂಕ್ಯ ಪವಾರ್‌ ರೈಡಿಂಗ್‌ನಲ್ಲಿ ಮಿಂಚಿದರು.

ಸೋಮವಾರ ನಡೆಯುವ ಪಂದ್ಯ ಗಳಲ್ಲಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ದಲ್ಲಿರುವ ಜೈಪುರ ಪಿಂಕ್‌ ಪ್ಯಾಂಥರ್ ತಂಡವು ಬೆಂಗಾಲ್‌ ವಾರಿಯರ್ ತಂಡವನ್ನು ಎದುರಿಸಲಿದೆ. ದಿನದ ಇನ್ನೊಂದು ಪಂದ್ಯವು ತೆಲುಗು ಟೈಟಾನ್ಸ್‌ ಮತ್ತು ಹರಿಯಾಣ ಸ್ಟೀಲರ್ ನಡುವೆ ನಡೆಯಲಿದೆ.