ಬೆಂಗಳೂರು: ಪ್ರೊ ಕಬಡ್ಡಿಯ ಬಲಿಷ್ಠ ತಂಡವಾಗಿರುವ ದಬಾಂಗ್‌ ದಿಲ್ಲಿಯನ್ನು 61-22 ಭರ್ಜರಿ ಅಂತರದಿಂದ ಮಗುಚಿದ ಬೆಂಗಳೂರು ಬುಲ್ಸ್‌ 6ನೇ ಜಯದೊಂದಿಗೆ ಮುನ್ನುಗ್ಗಿದೆ.
ಇದು ಬುಲ್ಸ್‌ ಆಡಿದ 9ನೇ ಪಂದ್ಯ. ಇನ್ನೊಂದೆಡೆ ದಿಲ್ಲಿ ಸತತ 2ನೇ ಸೋಲನುಭವಿಸಿದೆ. ನಾಯಕ ನವೀನ್‌ ಕುಮಾರ್‌ ಗೈರು ದಿಲ್ಲಿಗೆ ದೊಡ್ಡ ಹೊಡೆತ ನೀಡಿತು.
ಈ ಏಕಪಕ್ಷೀಯ ಪಂದ್ಯದಲ್ಲಿ ಬುಲ್ಸ್‌ ನಾಯಕ ಪವನ್‌ ಸೆಹ್ರಾವತ್‌ ಪ್ರಚಂಡ ಆಟವಾಡಿ 27 ಅಂಕ ಬಾಚಿದರು. ಪವನ್‌ ಒಬ್ಬರೇ ಗಳಿಸಿದ ಅಂಕವನ್ನು ಇಡೀ ದಿಲ್ಲಿ ತಂಡದಿಂದ ಗಳಿಸಲಾಗಲಿಲ್ಲ. ಸಾಮಾನ್ಯವಾಗಿ ದ್ವಿತೀಯಾರ್ಧದಲ್ಲಿ ಅಮೋಘ ಪ್ರದರ್ಶನ ನೀಡುವ ದಿಲ್ಲಿ ಇಲ್ಲಿ ಇನ್ನಷ್ಟು ಮಂಕಾಯಿತು. ವಿರಾಮದ ವೇಳೆ ಬುಲ್ಸ್‌ 27-11 ಮುನ್ನಡೆಯಲ್ಲಿತ್ತು.
ಹರ್ಯಾಣ-ಯೋಧ ಟೈ
ಹರ್ಯಾಣ ಸ್ಟೀಲರ್ ಮತ್ತು ಯುಪಿ ಯೋಧಾ ನಡುವಿನ ಮೊದಲ ಪಂದ್ಯ 36-36ರಿಂದ ಟೈ ಆಯಿತು. ಈ ಪಂದ್ಯದಲ್ಲಿ ಮಿಂಚಿದವರು ಹರ್ಯಾಣ ನಾಯಕ ವಿಕಾಸ್‌ ಖಂಡೋಲ. ಅವರು 25 ರೈಡ್‌ ಮೂಲಕ 17 ಅಂಕ ತಂದುಕೊಟ್ಟರು. ಯೋಧ ಪರ ರೈಡರ್‌ ಸುರೇಂದರ್‌ ಗಿಲ್‌ 14 ಅಂಕ ಗಳಿಸಿದರು.
