ಪ್ರೊ ಕಬಡ್ಡಿ: ಬೆಂಗಳೂರು ಬುಲ್ಸ್‌ ,ಹರ್ಯಾಣಕ್ಕೆ ಗೆಲುವು

ಬೆಂಗಳೂರು: ರವಿವಾರದ ಪ್ರೊ ಕಬಡ್ಡಿ ಪಂದ್ಯಗಳಲ್ಲಿ ಬೆಂಗಳೂರು ಬುಲ್ಸ್‌ ಮತ್ತು ಹರ್ಯಾಣ ಸ್ಟೀಲರ್ಸ್‌ ಜಯ ಸಾಧಿಸಿವೆ. ಬುಲ್ಸ್‌ 45-37 ಅಂತರದಿಂದ ಜೈಪುರ್‌ ಪಿಂಕ್‌ ಪ್ಯಾಂಥರ್ಗೆ ಸೋಲುಣಿಸಿ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಿಯಾಯಿತು.

ರೈಡರ್‌ ಭರತ್‌ (15 ಅಂಕ), ನಾಯಕ ಪವನ್‌ ಸೆಹ್ರಾವತ್‌ (10 ಅಂಕ) ಅವರ ಭರ್ಜರಿ ಆಟ ಬುಲ್ಸ್‌ ಜಯದಲ್ಲಿ ಪ್ರಮುಖ ಪಾತ್ರ ವಹಿಸಿತು. ಇದು 20 ಪಂದ್ಯಗಳಲ್ಲಿ ಬುಲ್ಸ್‌ ಕಂಡ 10ನೇ ಜಯ. ಜೈಪುರ್‌ ಪರ ಅರ್ಜುನ್‌ ದೇಶ್ವಾಲ್‌ (16) ಮತ್ತು ದೀಪಕ್‌ ಹೂಡಾ (6) ಉತ್ತಮ ಹೋರಾಟ ಸಂಘಟಿಸಿದರು.

ಮುಂಬಾಗೆ ಸೋಲು
ದಿನದ ಮೊದಲ ಪಂದ್ಯದಲ್ಲಿ ಹರ್ಯಾಣ ಸ್ಟೀಲರ್ಸ್‌ ಯು ಮುಂಬಾವನ್ನು 37-26 ಅಂತರದಿಂದ ಮಣಿಸಿತು. ಇದು ಹರ್ಯಾಣಕ್ಕೆ 20 ಪಂದ್ಯಗಳಲ್ಲಿ ಒಲಿದ 10ನೇ ಜಯ. ಮುಂಬಾ 19 ಸ್ಪರ್ಧೆಗಳಲ್ಲಿ 7ನೇ ಸೋಲನುಭವಿಸಿತು.