ಸಿಎಂ ನಿವಾಸದ ಗೋಡೆ ಮೇಲೆ ಬಿಜೆಪಿ ಬೆಂಬಲಿಸಿ ಬರಹ

ಮುಂಬಯಿ: ಮಹಾರಾಷ್ಟ್ರ ಮುಖ್ಯಮಂತ್ರಿಯ ಅಧಿಕೃತ ನಿವಾಸ “ವರ್ಷಾ’ದ ಒಳಗೋಡೆಗಳ ಮೇಲೆ ಬಿಜೆಪಿ ಬೆಂಬಲಿಸಿ ಕೆಲವೊಂದು ಸಾಲುಗಳನ್ನು ಬರೆದಿರುವುದು ಬೆಳಕಿಗೆ ಬಂದಿದೆ. ಬಿಳಿ ಗೋಡೆಗಳ ಮೇಲೆ “ಉದ್ಧವ್‌ ಠಾಕ್ರೆ ಕೀಳು ಮನುಷ್ಯ’, “ಬಿಜೆಪಿ ರಾಕ್ಸ್‌’ ಎಂದೆಲ್ಲ ಬರೆಯ ಲಾಗಿದೆ. ಮಲಬಾರ್‌ ಹಿಲ್ಸ್‌ ಪ್ರದೇಶದಲ್ಲಿರುವ ಈ ಬಂಗ್ಲೆ ಯನ್ನು ಮಹಾರಾಷ್ಟ್ರದ ಮಾಜಿ ಮುಖ್ಯಮಂತ್ರಿ ದೇವೇಂದ್ರ ಫ‌ಡ್ನವೀಸ್‌ ಕಳೆದ ತಿಂಗಳಷ್ಟೇ ತೊರೆದಿದ್ದರು. ಮುಖ್ಯಮಂತ್ರಿ ಉದ್ಧವ್‌ ಠಾಕ್ರೆ ಇನ್ನೂ ಅಧಿಕೃತ ನಿವಾಸಕ್ಕೆ ಹೋಗಿ ನೆಲೆಸಿಲ್ಲ. ಆದರೂ ಈ ರೀತಿಯ ಬರಹಗಳು ಗೋಡೆ ಮೇಲೆ ಮೂಡಿರುವುದನ್ನು ಶಿವಸೇನೆ ಮತ್ತು ಕಾಂಗ್ರೆಸ್‌ ಖಂಡಿಸಿವೆ. ಅಧಿಕೃತ ನಿವಾಸ ಯಾರ ಖಾಸಗಿ ಸ್ವತ್ತೂ ಅಲ್ಲ. ಈ ಕುರಿತ ತನಿಖೆಯಾಗಲೇ ಬೇಕು ಎಂದು ಕಾಂಗ್ರೆಸ್‌ ಹೇಳಿದೆ.