ಕ್ರೈಸ್ತ ಪದ್ಧತಿಯಂತೆ ಪಿಂಕಿ-ಜೊನಾಸ್‌ ವಿವಾಹ

ಜೋಧಪುರ: ಬಾಲಿವುಡ್‌-ಹಾಲಿವುಡ್‌ ನಟಿ ಪ್ರಿಯಾಂಕಾ ಚೋಪ್ರಾ ಹಾಗೂ ಅವರ ಪ್ರಿಯಕರ ನಿಕ್‌ ಜೊನಾಸ್‌ ಅವರ ಮೂರು ದಿನಗಳ ವಿವಾಹ ಮಹೋತ್ಸವಕ್ಕೆ ಶನಿವಾರ ಚಾಲನೆ ಸಿಕ್ಕಿದೆ. ಜೋಧಪುರದ ಉಮೇದ್‌ ಭವನ್‌ ಅರಮನೆಯಲ್ಲಿ ಕ್ರೈಸ್ತ ಧರ್ಮದ ಪ್ರಕಾರ ಈ ಇಬ್ಬರೂ ಶನಿವಾರ ವಿವಾಹವಾಗಿದ್ದು, ಭಾನುವಾರ ಹಿಂದೂ ಸಂಪ್ರದಾಯದ ಪ್ರಕಾರ ಸತಿ-ಪತಿ ಆಗಲಿದ್ದಾರೆ. 

ಉಮೇದ್‌ ಭವನ್‌ ಅರಮನೆಯಲ್ಲಿ ಏರ್ಪಡಿಸಲಾಗಿದ್ದ ಸಮಾರಂಭ ದಲ್ಲಿ ಇವರಿಬ್ಬರ ವಿವಾಹ ಕ್ಯಾಥೋಲಿಕ್‌ ಚರ್ಚ್‌ನ ವೈವಾಹಿಕ ವಿಧಿವಿಧಾನಗಳಂತೆ ನೆರವೇರಿತು. ಪಾದ್ರಿಯೊಬ್ಬರು ಪ್ರಿಯಾಂಕಾರನ್ನು ಉದ್ದೇಶಿಸಿ ವರ ನಿಮಗೆ ಒಪ್ಪಿಗೆಯೇ ಎಂದು ಕೇಳಿದ್ದಕ್ಕೆ ಪ್ರಿಯಾಂಕಾ, “ಒಪ್ಪಿಗೆಯಿದೆ’ ಎಂದು ಹೇಳಿದರು. ಆನಂತರ, ಜೊನಾಸ್‌ ಸಹ ಒಪ್ಪಿಗೆ ಸೂಚಿಸಿದ ಮೇಲೆ ಜೊನಾಸ್‌ ಅವರು ಪ್ರಿಯಾಂಕಾ ಅವರ ಬೆರಳಿಗೆ ಉಂಗುರ ತೊಡಿಸಿ ಚುಂಬಿಸುವ ಮೂಲಕ ವಿವಾಹ ನೆರವೇರಿತು. ಇದಕ್ಕೆ ಜೊನಾಸ್‌ ತಂದೆ ಪಾಲ್‌ ಕೆವಿನ್‌ ಸಾಕ್ಷಿಯಾದರು. ಈ ಸಮಾರಂಭಕ್ಕಾಗಿ ಲಂಡನ್‌ನ ಪ್ರತಿಷ್ಠಿತ ವಸ್ತ್ರ ವಿನ್ಯಾಸಕ ರಾಲ್ಫ್ ಲೋರೆನ್‌ ವಿನ್ಯಾಸಗೊಳಿಸಿದ್ದ ಉಡುಗೆಗಳಲ್ಲಿ ಮದುಮಕ್ಕಳು ಮಿಂಚುತ್ತಿದ್ದರು.