ಹೊಸಕೋಟೆ: ವಿದೇಶಿ ಹೂಡಿಕೆದಾರರಿಗೆ ಭಾರತದ ಬೇರೆ ಕಡೆಗಳಿಗಿಂತ ಕರ್ನಾಟಕ, ಅದರಲ್ಲೂ ಬೆಂಗಳೂರಿನಲ್ಲಿ ಬಂಡವಾಳವನ್ನು ಹೂಡಲು ಹೆಚ್ಚು ಆಸಕ್ತಿ. ಏಕೆಂದರೆ ಇಲ್ಲಿರುವ ಮಾನವ ಸಂಪನ್ಮೂಲ ಬೇರೆ ಎಲ್ಲಿಯೂ ಇಲ್ಲ ಎಂದು ತಂತ್ರಜ್ಞಾನ ಖಾತೆ ಮಾಜಿ ಸಚಿವ ಪ್ರಿಯಾಂಕ್ ಖರ್ಗೆ ತಿಳಿಸಿದರು.
ನಗರದ ಶ್ರೀ ವಿವೇಕಾನಂದ ವಿದ್ಯಾ ಕೇಂದ್ರದಲ್ಲಿ ಶಾಸಕ ಶರತ್‌ ಬಚ್ಚೇಗೌಡರ ನೇತೃತ್ವದ ಸಮಸ್ತ ಫೌಂಡೇಷನ್‌ ವತಿಯಿಂದ ನಡೆದ ಬೃಹತ್‌ ಉದ್ಯೋಗ ಮೇಳವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಭಾರತದ ಜನಸಂಖ್ಯೆಯಲ್ಲಿ ಶೇ.60ರಷ್ಟು ಯುವಕರಿದ್ದು, ಯುವಕರಿಗೆ ಬೇಕಾಗಿರುವುದು ವಿದ್ಯೆ, ಅದಕ್ಕೆ ತಕ್ಕ ಉದ್ಯೋಗವಾಗಿದೆ. ಕಾಂಗ್ರೆಸ್‌ ಅಧಿಕಾರದಲ್ಲಿದ್ದಾಗ ಎರಡಕ್ಕೂ ಆದ್ಯತೆ ನೀಡುತ್ತಿತ್ತು. ಆದರೆ, ಈ ಸರ್ಕಾರ ಎರಡನ್ನು ಕಡೆಗಣಿಸಿದೆ ಎಂದು ಸರ್ಕಾರವನ್ನು ತರಾಟೆಗೆ ತೆಗೆದುಕೊಂಡರು.
ಇತ್ತೀಚಿನ ದಿನಗಳಲ್ಲಿ ರಾಜ್ಯ ಸರ್ಕಾರ ಯಾವುದೇ ಉದ್ಯೋಗ ಸೃಷ್ಟಿಸಿಲ್ಲ, ಬದಲಾಗಿ ಕೆಪಿಟಿಸಿಎಲ್‌, ಪಿಎಸ್‌ಐ ಹುದ್ದೆಗಳನ್ನು ಮಾರಿಕೊಳ್ಳುತ್ತಿದೆ. ಇದರಿಂದ ಭ್ರಷ್ಟಾಚಾರ ಹೆಚ್ಚಾಗುತ್ತಿದ್ದು, ಇದರ ವಿರುದ್ಧ ಯುವಜನತೆ ಪ್ರತಿಭಟನೆ ನಡೆಸಬೇಕು. ಉದ್ಯೋಗ ಸೃಷ್ಟಿಸುವಲ್ಲಿ ರಾಜ್ಯ ಮತ್ತು ಕೇಂದ್ರ ಸರ್ಕಾರ ವಿಫ‌ಲವಾಗಿದ್ದು, ಕೇಂದ್ರ ಸರ್ಕಾರ ಉದ್ಯೋಗ ಸೃಷ್ಟಿಸುವ ಬದಲು ಸರ್ಕಾರಿ ಸ್ವಾಮ್ಯದ ಕಂಪನಿಗಳನ್ನು ಖಾಸಗಿಯವರಿಗೆ ಮಾರಾಟ ಮಾಡುತ್ತಿದೆ ಎಂದು ಆರೋಪಿಸಿದರು.
ಶಾಸಕರ ಪ್ರಯತ್ನ ಅದ್ಭುತವಾದದ್ದು: ರಾಜ್ಯ ಸರ್ಕಾರ ಯುವಕರಿಗೆ ಕೆಲಸ ಕೊಡುವುದನ್ನು ಬಿಟ್ಟು ಕೇಸರಿ ಶಾಲು ಹಾಕಿ ರಸ್ತೆಗೆ ಇಳಿಸುತ್ತಿದೆ. ಈ ಕೆಲಸಕ್ಕೆ ಕೇವಲ ಬಡವರ ಮಕ್ಕಳನ್ನು ಉಪಯೋಗಿಸುತ್ತಿದ್ದು, ಯಾವುದೇ ಬಿಜೆಪಿ ಶಾಸಕ ಅಥವಾ ಮಂತ್ರಿಗಳ ಮಕ್ಕಳನ್ನು ಉಪಯೋಗಿಸುತ್ತಿಲ್ಲ. ಎಲ್ಲರಿಗೂ ಭಕ್ತಿಯಿರಬೇಕು. ಆದರೆ, ಭಕ್ತಿ ವ್ಯಕ್ತಿಯ ಮೇಲೆ ಬರಬಾರದು ಎಂದ ಅವರು, ಈ ರೀತಿಯ ಉದ್ಯೋಗ ಮೇಳಗಳನ್ನು ತಮ್ಮ ಸ್ವಂತ ಇಚ್ಛೆಯಿಂದ ಆಯೋಜಿಸಿ ತಾಲೂಕಿನ ಯುವಕರಿಗೆ ಉದ್ಯೋಗ ನೀಡುವ ಶಾಸಕ ಶರತ್‌ ಬಚ್ಚೇಗೌಡರ ಪ್ರಯತ್ನ ಅದ್ಭುತವಾದದ್ದು. ಇಂತಹ ಯುವ ಶಾಸಕರನ್ನು ಮತ್ತೆ ಆರಿಸಿ ಕಳುಹಿಸುವಂತೆ ಮನವಿ ಮಾಡಿದರು.
ಶಾಸಕ ಶರತ್‌ ಬಚ್ಚೇಗೌಡ ಮಾತನಾಡಿ, ಕೇಂದ್ರ ಸರ್ಕಾರ ವರ್ಷಕ್ಕೆ ಎರಡು ಲಕ್ಷ ಉದ್ಯೋಗ ಸೃಷ್ಟಿಸುವ ಭರವಸೆ ನೀಡಿತ್ತು. ಆದರೆ, ಕಳೆದ ಎಂಟು ವರ್ಷಗಳಲ್ಲಿ ಒಂದೂ ಹೊಸ ಉದ್ಯೋಗ ನೀಡಿಲ್ಲ. ಮತ್ತು ಉದ್ಯೋಗ ಕಳೆದುಕೊಂಡವರ ನೆರವಿಗೂ ಬಂದಿಲ್ಲವೆಂದು ಬೇಸರ ವ್ಯಕ್ತಪಡಿಸಿದರು.
16, 000 ಹುದ್ದೆಗಳು ಭರ್ತಿ: ತಾಲೂಕಿನ ಯುವಕರು ಪ್ರತಿಭಾವಂತರಾಗಿದ್ದು, ಅವರ ನೆರವಿಗಾಗಿ ಕಳೆದ ಎರಡು ವರ್ಷದ ಹಿಂದೆ ಉದ್ಯೋಗ ಮೇಳವನ್ನು ನಡೆಸಲಾಗಿತ್ತು. ಆದರೆ, ಎರಡು ವರ್ಷ ಕೊರೊನಾ ಕಾರಣದಿಂದ ನಡೆಸಲಾಗಲಿಲ್ಲ. ಈ ಬಾರಿಯ ಮೇಳದಲ್ಲಿ 105 ಕಂಪನಿಗಳು ಭಾಗವಹಿಸಿದ್ದು, 16, 000 ಹುದ್ದೆಗಳು ಭರ್ತಿಯಾಗಬಹುದಾಗಿದೆ ಎಂದರು.
ಕೆಪಿಸಿಸಿ ಜಿಲ್ಲಾಧ್ಯಕ್ಷ ಮುನಿಶಾಮಣ್ಣ, ಬ್ಲಾಕ್‌ ಕಾಂಗ್ರೆಸ್‌ ಅಧ್ಯಕ್ಷ ಸಗೀರ್‌ ಅಹಮದ್‌, ಮುಖಂಡ ಸುಬ್ನರಾಜು, ವೈಎಸ್‌ಎಂ ಮಂಜುನಾಥ್‌, ಸಿ. ಮುನಿಯಪ್ಪ, ನಗರಸಭೆ ಸದಸ್ಯ ಕೇಶವಮೂರ್ತಿ, ಗೌತಮ್ ಎಸ್‌ಬಿಜಿ ಟೀಂ ಸಂಚಾಲಕಿ ಪ್ರತಿಭಾ ಶರತ್‌ಬಚ್ಚೇಗೌಡ ಹಾಗೂ ಇತರರು ಇದ್ದರು.
