ಮುನಿಸಿಕೊಂಡ ಮುಂಗಾರು: ಭತ್ತ ನಾಟಿ ಸ್ಥಗಿತ

ಸವಣೂರು: ಮುಂಗಾರು ಆಗಮನವಾಗಿ ತಿಂಗಳು ಸಮೀಪಿಸಿದೆ. ಆದರೆ ಮಳೆ ಅಬ್ಬರ ಇನ್ನೂ ಕಂಡಿಲ್ಲ. ಇಳೆಯನ್ನು ತೊಯ್ದು ಮಣ್ಣನ್ನು ನುಣುಪಾಗಿಸುವ, ಒರತೆ ಸೃಷ್ಟಿಸುವ, ಗುಡ್ಡ ತೋಡುಗಳಲ್ಲಿ ತೊರೆಗಳನ್ನು ಸೃಷ್ಟಿಸುವ ಜಿಟಿ ಜಿಟಿ ಮಳೆ ಬಂದಿಲ್ಲ. ಮುಂಗಾರು ಮುನಿಸಿನಿಂದ ರೈತರು ಕಂಗಾಲಾಗಿದ್ದಾರೆ.

ಮುಂಗಾರು ಮಳೆ ಇನ್ನೂ ಪೂರ್ಣ ಪ್ರಮಾಣ ದಲ್ಲಿ ಸುರಿಯದೆ ಭತ್ತದ ಬೇಸಾಯ ಮಾಡುವ ರೈತರು ಸಂಕಷ್ಟಕ್ಕೆ ಒಳಗಾಗಿದ್ದಾರೆ. ಕುಡಿಯುವ ನೀರು, ತೋಟಗಾರಿಕೆ ಬೆಳೆಗಳಿಗೆ ನೀರಿನ ಕೊರತೆ ಸದ್ಯಕ್ಕಿಲ್ಲವಾದರೂ ಮಳೆ ನೀರನ್ನೇ ಪ್ರಮುಖವಾಗಿ ಆಶ್ರಯಿಸಿರುವ ಭತ್ತದ ಬೆಳೆ ಮಾತ್ರ ತತ್ತರಿಸುತ್ತಿದೆ.

ಮಳೆ ಇಲ್ಲದೆ ಕಷ್ಟ
ಈ ಬಾರಿ ಮಳೆ ಕೊರತೆಯಿಂದ ಭತ್ತದ ಕೃಷಿ ಮಾಡುವ ಕುರಿತು ಇನ್ನೂ ಅನಿಶ್ಚಿತತೆ ಇದೆ. ಸರಿಯಾದ ಪ್ರಮಾಣದಲ್ಲಿ ಮಳೆ ಇಲ್ಲದೆ ಭತ್ತದ ಕೃಷಿ ಮಾಡಲಾಗದು.
– ಸಿ.ಪಿ. ಪ್ರೇಮಲತಾ ರೈ, ಚೆನ್ನಾವರ ಪಟ್ಟೆ

ಮಳೆ ಕೊರತೆಯಿಂದ ಸಮಸ್ಯೆಈ ಬಾರಿಯ ಮುಂಗಾರಿನ ಕೊರತೆಯಿಂದಾಗಿ ಹಲವೆಡೆ ಭತ್ತದ ಕೃಷಿಕರಿಗೆ ಸಮಸ್ಯೆಯಾಗಿದೆ. ಇಲಾಖೆಯಿಂದ ರೈತರಿಗೆ ಭತ್ತದ ಬೀಜ ಪೂರೈಕೆ ಸಹಿತ ಬೀಜೋಪಚಾರ, ನಾಟಿ ತರಬೇತಿಗಳನ್ನು ನಡೆಸಲಾಗಿದೆ. ಮಳೆ ಕೊರತೆಯೇ ದೊಡ್ಡ ಸಮಸ್ಯೆಯಾಗಿದೆ.
– ತಿಮ್ಮಪ್ಪ ಗೌಡ, ಸಹಾಯಕ ಕೃಷಿ ಅಧಿಕಾರಿ, ಕಡಬ ಹೋಬಳಿ

ಪ್ರವೀಣ್‌ ಚೆನ್ನಾವರ