Joe Biden: ಭಾರತ ನನಗೆ ಪ್ರಮುಖ ರಾಷ್ಟ್ರ ಎಂದಿದ್ದ ಅಧ್ಯಕ್ಷ ಬೈಡೆನ್‌

ನವದೆಹಲಿ: “ವಿಶ್ವದಲ್ಲೇ ಭಾರತವು ನನಗೆ ಅತ್ಯಂತ ಪ್ರಮುಖ ರಾಷ್ಟ್ರ” ಎಂದು ಅಮೆರಿಕ ಅಧ್ಯಕ್ಷ ಜೋ ಬೈಡೆನ್‌ ಹೇಳಿದ್ದಾರೆ. ಈ ಅಂಶವನ್ನು ಭಾರತದಲ್ಲಿನ ಅಮೆರಿಕದ ರಾಯಭಾರಿ ಎರಿಕ್‌ ಗಾರ್ಸೆಟಿ ಸಂದರ್ಶನವೊಂದರಲ್ಲಿ ಪ್ರಸ್ತಾಪಿಸಿದ್ದಾರೆ. “ಭಾರತಕ್ಕೆ ರಾಯಭಾರಿಯಾಗಿ ಆಗಮಿಸುವ ಮುನ್ನ ನನ್ನನ್ನು ಕರೆದ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್‌, ವಿಶ್ವದಲ್ಲಿರುವ ಹಲವು ರಾಷ್ಟ್ರಗಳ ಪೈಕಿ ಭಾರತವು ನನಗೆ ಅತ್ಯಂತ ಪ್ರಮುಖ ರಾಷ್ಟ್ರ” ಎಂದು ಹೇಳಿದ್ದರು.

“ನನ್ನ ಮಾಹಿತಿಯಂತೆ ಎರಡು ರಾಷ್ಟ್ರಗಳ ಇತಿಹಾಸದಲ್ಲೇ ಅಮೆರಿಕ ಅಧ್ಯಕ್ಷರೊಬ್ಬರು ಈ ಮೊದಲು ಈ ರೀತಿ ಹೇಳಿಲ್ಲ. ಅಮೆರಿಕದ ತೆರಿಗೆದಾರರ ಪೈಕಿ ಭಾರತೀಯ ಅಮೆರಿಕನ್ನರು ಶೇ.6ರಷ್ಟಿದ್ದಾರೆ. ಅಮೆರಿಕ-ಭಾರತ ಅತ್ಯಂತ ಉತ್ತಮವಾದ ಸಂಬಂಧ ಹೊಂದಿವೆ. ತಂತ್ರಜ್ಞಾನದಿಂದ ಹಿಡಿದು ವ್ಯಾಪಾರದವರೆಗೆ, ಪರಿಸರದಿಂದ ಹಿಡಿದು ಮಹಿಳಾ ಸಬಲೀಕರಣದವರೆಗೆ, ಸಣ್ಣ ಉದ್ಯಮದಿಂದ ಹಿಡಿದು ಬಾಹ್ಯಾಕಾಶದವರೆಗೆ ಎಲ್ಲಾ ಕ್ಷೇತ್ರಗಳಲ್ಲೂ ಉಭಯ ರಾಷ್ಟ್ರಗಳು ಪರಸ್ಪರ ಸಹಭಾಗಿತ್ವ ಹೊಂದಿದ್ದೇವೆ,’ ಎಂದು ಎರಿಕ್‌ ಹೇಳಿದ್ದಾರೆ.