ಕಾಲೇಜ್‌ ಎಂಬ ಸಾಮ್ರಾಜ್ಯದ ಗೋಡೆಯ ಮೇಲೆ ಅಲ್ಲಲ್ಲಿ ಹೃದಯದ ಗುರುತಿನ ಕೆತ್ತನೆಗಳು, ಡೆಸ್ಕ್ಗಳ ಮೇಲೆ ಪ್ರೀತಿಯ ಕವನಗಳು, ಪ್ರತಿ ಕ್ಲಾಸ್‌ನಿಂದ ಒಂದಾದರೂ ಲವ್‌ ಬರ್ಡ್ಸ್‌ ಜೋಡಿ ಸರ್ವೇಸಾಮಾನ್ಯವಾಗಿದೆ. “ಅವರಿಬ್ಬರು ಕಮಿಟೆಡ್‌ ಅಂತೆ. ನಿನ್ನೆ ಇಬ್ಬರು ಜಗಳ ಆಡಿ ಬ್ರೇಕಪ್‌ ಆಯ್ತಂತೆ’ ಎಂಬ ಮಾತುಗಳನ್ನು ಎಲ್ಲರೂ ಕೇಳಿರುತ್ತೇವೆ. ಅದೆಷ್ಟೋ ಪ್ರೇಮ…ಕಹಾನಿಗಳು ಗಾಸಿಪ್‌ಪ್ರಿಯರ ನಾಲಿಗೆ ತುದಿಯಿಂದ ಇನ್ನೊಬ್ಬರ ಕಿವಿಗೆ ಹೊಕ್ಕಿ ರಾರಾಜಿಸುತ್ತಿರುತ್ತದೆ. ಈ ವಯಸ್ಸಿನಲ್ಲಿ ಪ್ರೇಮ…ಕಹಾನಿಯ ಬದಲು ಪ್ರೇಮ್‌ ಕ ಹಾನಿ ತಿಳಿದಿದ್ದರೆ ಉತ್ತಮ. ಅದ್ಯಾರನ್ನೋ ನೋಡಿ ಕ್ರಶ್‌ ಆಗೋದು, ಒಂದೇ ಭೇಟಿಗೆ ಲವ್‌ ಹುಟ್ಟೋದು, ಸಣ್ಣ ಜಗಳ-ಮನಸ್ತಾಪಗಳಿಗೇ ಅಪರಿಚಿತರಂತೆ ವರ್ತಿಸೋದು- ಇವೆಲ್ಲವೂ ಹದಿಹರೆಯದ ವಯಸ್ಸಿನವರ ವಿವೇಕದ ಅಪಕ್ವತೆ ಎಂದು ಹೇಳಬಹುದಾದರೂ ಇಂಥ ವಿಷಯಗಳಲ್ಲಿ ವಾಸ್ತವಪ್ರಜ್ಞೆ ಇದ್ದರೆ ಒಳಿತು. ಹುಚ್ಚು ಕೋಡಿ ಮನಸ್ಸು ಇದು ಹದಿನಾರರ ವಯಸ್ಸು ಎಂಬ ಮಾತೇ ಇದೆ. ಅಂದ-ಚಂದ ನೋಡಿ ಕೈಲೊಂದು ಗುಲಾಬಿ ಹಿಡಿದು ಶುರುವಾಗುವುದು ಪ್ರೀತಿಯಲ್ಲ. ಅದು ಬರಿಯ ಆಕರ್ಷಣೆ.
ಒಂದಂತೂ ಸತ್ಯ, ಜಗತ್ತಿನಲ್ಲಿ ಪ್ರೀತಿಸದ ಜೀವಿ ಎಲ್ಲೂ ಇಲ್ಲ. ದುಂಬಿಗೆ ಹೂವೆಂದರೆ ಪ್ರೀತಿ, ಸಮುದ್ರದ ಅಲೆಗೆ ದಡವೆಂದರೆ ಪ್ರೀತಿ, ಪ್ರಾಣಿಗಳಿಗೆ ತನ್ನ ಕರುಳಬಳ್ಳಿಯ ಮರಿಗಳೆಂದರೆ ಪ್ರೀತಿ- ಹೀಗೆ ಬಗೆ ಬಗೆಯ ರೀತಿಯಲ್ಲಿ. ತಾಯಿಯ ಪ್ರೀತಿ ಅತ್ಯಂತ ನಿಷ್ಕಲ್ಮಶವಾದದ್ದು. ಅಣ್ಣ-ತಂಗಿ, ತಂದೆ-ಮಕ್ಕಳು, ಗಂಡ-ಹೆಂಡತಿ, ಗುರು-ಶಿಷ್ಯ, ಅಜ್ಜಿ-ಮೊಮ್ಮಕ್ಕಳು, ಹೀಗೆ ಮಾನವ ಸಂಬಂಧಗಳೆಲ್ಲ ಈ ಪ್ರೀತಿಯೆಂಬ ಅಡಿಪಾಯದ ಮೇಲೆ ಭವ್ಯ ಅರಮನೆಯಾಗಿ ನಿಂತಿದೆ.
ಆದರೆ, ಇಂದು ಈ ಪ್ರೀತಿ ಎಂಬ ಪದ ಅದರ ಅರ್ಥವನ್ನು ಕಳೆದುಕೊಳ್ಳುತ್ತಿದೆ. ಹದಿಹರೆಯದವರಲ್ಲಿ ಮೂಡುವ ವಯೋಸಹಜ ಆಕರ್ಷಣೆ ಅಥವಾ ಸೆಳೆತ ಪ್ರೀತಿ ಎಂಬ ಲೇಪನವನ್ನು ಮೆತ್ತಿಕೊಂಡಿದೆ. ಇಂದಿನ ತರುಣ-ತರುಣಿಯರಿಗೆ “ಪ್ರೀತಿ’ ಬರಿ ಒಂದು ಹೃದಯಕ್ಕೆ ಬಾಣತಾಗಿ ರಕ್ತ ಸೋರಿದ ಚಿತ್ರಗಳಲ್ಲಿ ಕಾಣುತ್ತಿದೆ. ಮೂರನೆಯ ಕ್ಲಾಸಿನ ಹುಡುಗಿ ತನ್ನ ಸಹಪಾಠಿಯೊಬ್ಬನಿಗೆ, “ಐ ಲವ್‌ ಯು’ ಎಂದು ಹೇಳುವಷ್ಟರ ಮಟ್ಟಿಗೆ ಪ್ರೀತಿ ಅರ್ಥಹೀನವಾಗುತ್ತಿದೆ. ಕಾರಣ ಕೇಳಿದಾಗ, “ಆತ ನೋಡಲು ಚಂದ ಇ¨ªಾನೆ’ ಎಂಬ ಉತ್ತರ ಬಂತು. ಅಂದ ಚಂದ ನೋಡಿ ಪ್ರೀತಿ ಹುಟ್ಟುತ್ತಾ? ದೈಹಿಕ ಆಕರ್ಷಣೆಗೆ ಪ್ರೀತಿ ಎಂಬ ಹಣೆಪಟ್ಟಿ ಕೊಟ್ಟಿದ್ದೇವೆಯೆ?
ಇವೆಲ್ಲದಕ್ಕೂ ಕಾರಣ, ಇಂದಿನ ಮಾಧ್ಯಮ, ಸಿನೆಮಾ, ಸಾಮಾಜಿಕ ಜಾಲತಾಣಗಳು ಹಾಗೂ ಎಲ್ಲೋ ಶಿಥಿಲವಾಗುತ್ತಿರುವ ನಮ್ಮ ಸನಾತನ ಪರಂಪರೆಯ ಕೌಟುಂಬಿಕ ನೆಲೆಗಟ್ಟು. ಆದರೆ, ಯೌವನದ ಈ ಆಕರ್ಷಣೆಗಳು ಎಂದಿಗೂ ಪ್ರೀತಿಯಾಗುವುದಿಲ್ಲ. ಪ್ರೀತಿ ಎಂಬ ಪದಕ್ಕಿರುವ ಅಗಾಧ ಅರ್ಥ, ವಿಶಾಲ ಹೃದಯ ಇಂದಿನ ಪೀಳಿಗೆಗೆ ತಿಳಿದಿಲ್ಲ, ಅಲ್ಲದೆ ತಿಳಿಯಲು ಸೂಕ್ತ ವಾತಾವರಣವೇ ಇಲ್ಲವಾಗಿದೆ.
ಹದಿಹರೆಯದ, ಪ್ರೀತಿಯ ಲೇಪನವನ್ನು ಮತ್ತಿಕೊಂಡಿರುವ ವಯೋಸಹಜ ಆಕರ್ಷಣೆ ಎಂದಿಗೂ ಹೃದಯದಲ್ಲಿರಬೇಕೇ ಹೊರತು ತಲೆಗೇರಬಾರದು. ಒಮ್ಮೆ ಈ ಆಕರ್ಷಣೆ ಎಂಬ ಮಾಯೆ ತಲೆಗೇರಿದರೆ ಆ ವ್ಯಕ್ತಿಯ ಜೀವನ ಸೂತ್ರವಿಲ್ಲದ ಗಾಳಿಪಟದಂತಾಗಬಹುದು. ಉಜ್ವಲ ಭವಿಷ್ಯದ ಗುರಿ ಹೊಂದಿರುವ ಯಾವುದೇ ವ್ಯಕ್ತಿ ಆಕರ್ಷಣೆಯನ್ನು ಪ್ರೀತಿ ಎಂದು ಅರ್ಥೈಸಿಕೊಂಡರೆ ಅವರ ಜೀವನ ಅಧೋಗತಿ. ನಾವು ಕಾಲೇಜ್‌ ಮೆಟ್ಟಿಲು ಹತ್ತಿರುವ ಉದ್ದೇಶ, ಅದರ ಹಿಂದಿನ ತಂದೆ-ತಾಯಿಯ ಪರಿಶ್ರಮ, ಆಸೆ, ಕನಸುಗಳನ್ನು ಮರೆಯದಿರೋಣ. ಸಾಧಕನಿಗೆ ವಿದ್ಯೆಯೇ ಹೊರತು ಭ್ರಮೆಯಲ್ಲಿರುವವನಿಗೆ ಅಲ್ಲ.
ಇಂಚರಾ ಜಿ. ಜಿ.
ಪ್ರಥಮ ಬಿಎ (ಪತ್ರಿಕೋದ್ಯಮ), ಎಸ್‌ಡಿಎಂ ಕಾಲೇಜು, ಉಜಿರೆ 