ಹೊಳೆಯುತ್ತಿದೆ ಮಹಾತ್ಮನ ಕಣ್ಣು!

ಸ್ಯಾನ್‌ಫ್ರಾನ್ಸಿಸ್ಕೋ: ಅಮೆರಿಕದ ಸ್ಯಾನ್‌ ಫ್ರಾನ್ಸಿಸ್ಕೋದಲ್ಲಿ ಬೇ ಬ್ರಿಡ್ಜ್ಗೆ ಮುಖ ಮಾಡಿರುವ ಮಹಾತ್ಮ ಗಾಂಧಿ ಪ್ರತಿಮೆಯ ಕಣ್ಣುಗಳು ಕೆಂಪು ಬೆಳಕನ್ನು ಸೂಸುವ ಮೂಲಕ ಅಚ್ಚರಿ ಮೂಡಿಸಿದೆ.

1988ರಲ್ಲಿ ಸ್ಥಾಪಿಸಿದ ಕಂಚಿನ ಪ್ರತಿಮೆ ಹಲವು ಬಾರಿ ಇಂಥ ವಿಚಿತ್ರ ಸನ್ನಿವೇಶಗಳನ್ನು ಎದುರಿಸಿದೆ. ಈ ಪ್ರತಿಮೆಯ ಕನ್ನಡಕ ಕಾಣೆಯಾಗುವುದೇನೂ ಹೊಸತೂ ಅಲ್ಲ. ಹೀಗಾಗಿ ಅಲ್ಲಿನ ಆಡಳಿತ ಹೆಚ್ಚುವರಿ ಕನ್ನಡಕವನ್ನು ಮೊದಲೇ ತಂದು ಸಂಗ್ರಹಿಸಿಟ್ಟುಕೊಳ್ಳುತ್ತದೆಯಂತೆ.

ಆದರೆ ಈ ಬಾರಿ ರೆಡ್ಡಿಟ್ ಎಂಬ ಸಾಮಾಜಿಕ ಜಾಲತಾಣದಲ್ಲಿ ವ್ಯಕ್ತಿಯೊಬ್ಬ ಈ ಗಾಂಧಿ ಪ್ರತಿಮೆಯ ಕಣ್ಣುಗಳಿಂದ ಕೆಂಪು ಬೆಳಕು ಹೊರಸೂಸುತ್ತಿರುವ ಫೋಟೋ ಪ್ರಕಟಿಸಿದ್ದಾನೆ. ಈ ಕನ್ನಡಕಗಳಿಗೆ ಯಾರೋ ಎಲ್ಇಡಿ ಬಲ್ಬ್ಗಳನ್ನು ಅಳವಡಿಸಿಬಿಟ್ಟಿದ್ದಾರೆ. ಇದರಿಂದ ಗಾಂಧಿಯ ಕಣ್ಣುಗಳು ಕೆಂಡಕಾರುತ್ತಿರುವಂತೆ ಕಾಣಿಸುತ್ತಿದ್ದವು. ನಂತರ ಈ ಫೋಟೋಗಳು ಫೇಸ್‌ಬುಕ್‌, ಟ್ವಿಟರ್‌, ಇತರೆ ಸಾಮಾಜಿಕ ತಾಣಗಳಲ್ಲೂ ಹರಿದಾಡಿದವು. ಕೆಲವರು ಇದನ್ನು ಸ್ವಾಗತಿಸಿದರೆ, ಇನ್ನೂ ಕೆಲವರು ಇದು ಗಾಂಧೀಜಿಗೆ ಮಾಡಿದ ಅವಮಾನ ಎಂದು ಕಿಡಿಕಾರಿದ್ದಾರೆ.