ಬಂಗಾರ ಮರಳಿಸಿದ ಪೊಲೀಸ್‌ ಸಿಬ್ಬಂದಿ ಕಾರ್ಯಕ್ಕೆ ಪ್ರಶಂಸೆ

ಮಸ್ಕಿ: ಇತ್ತೀಚೆಗೆ ನಡೆದ ರಸ್ತೆ ಅಪಘಾತದಲ್ಲಿ ತೀವ್ರವಾಗಿ ಗಾಯಗೊಂಡಿದ್ದ ವ್ಯಕ್ತಿಯ ಬಳಿಯಲ್ಲಿದ್ದ 20 ತೊಲಿ ಬಂಗಾರ ಸುರಕ್ಷಿತವಾಗಿ ತಲುಪಿಸಿ ಹಾಗೂ ಗಾಯಾಳುಗಳನ್ನು ಆಸ್ಪತ್ರೆ ಸೇರಿಸಿ ಅವರ ಜೀವ ಉಳಿಸಲು ಶ್ರಮಿಸಿದ್ದ ಮಸ್ಕಿ ಠಾಣೆಯ ಇಬ್ಬರು ಸಿಬ್ಬಂದಿಗಳನ್ನು ಎಸ್ಪಿ ನಿಖೀಲ್‌ ಪ್ರಶಂಸಿಸಿ ಪತ್ರ ನೀಡಿದ್ದಾರೆ.

ಎಎಸೈ ಮಲ್ಲಿಕಾರ್ಜುನ ಹಾಗೂ ಪೊಲೀಸ್‌ ಪೇದೆ ಮಲ್ಲಿಕಾರ್ಜುನ ಎನ್ನುವ ಈ ಇಬ್ಬರು ಸಿಬ್ಬಂದಿ ರಾಯಚೂರು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಪ್ರಶಂಸೆಗೆ ಪಾತ್ರರಾಗಿದ್ದಾರೆ.

ಎಸ್ಪಿ ನೀಡಿದ ನಗದು ಬಹುಮಾನ ಹಾಗೂ ಪ್ರಶಂಸನಾ ಪತ್ರವನ್ನು ಪಿಎಸೈ ಸಿದ್ರಾಮ ಬಿದರಾಣಿ ಕರ್ತವ್ಯದಲ್ಲಿ ಪ್ರಾಮಾಣಿಕತೆ ಮೆರೆದಿದ್ದ ಪೊಲೀಸ್‌ ಸಿಬ್ಬಂದಿಗೆ ವಿತರಿಸಿದರು.

ಕಳೆದ ಕೆಲ ದಿನಗಳ ಹಿಂದೆಯಷ್ಟೇ ಲಿಂಗಸುಗೂರು ರಸ್ತೆಯಲ್ಲಿ ನಡೆದ ಕಾರು ಅಪಘಾತದಲ್ಲಿ ಗಾಯಗೊಂಡು ಬಿದ್ದಿದ್ದ ವ್ಯಕ್ತಿಯ ಕಾರಲ್ಲಿ 20 ತೊಲಿ ಚಿನ್ನವಿತ್ತು. ಇದನ್ನು ಕಂಡ ಎಎಸೈ ಹಾಗೂ ಪೊಲೀಸ್‌ ಪೇದೆ ಗಾಯಗೊಂಡವರನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಿ ವ್ಯಕ್ತಿಯ ಕುಟುಂಬಸ್ಥರಿಗೆ ಚಿನ್ನ ತಲುಪಿಸಿದ್ದಾರೆ.