ಅಭ್ಯಾಸ ಪಂದ್ಯ; ಪೂಜಾರ ಶತಕ

ಕೂಲಿಜ್‌ (ಆ್ಯಂಟಿಗುವಾ): ವೆಸ್ಟ್‌ ಇಂಡೀಸ್‌ ಮಂಡಳಿ ಇಲೆವೆನ್‌ ಎದುರಿನ ತ್ರಿದಿನ ಅಭ್ಯಾಸ ಪಂದ್ಯದ ಮೊದಲ ದಿನ ಚೇತೇಶ್ವರ್‌ ಪೂಜಾರ ಶತಕ ಬಾರಿಸಿ ಭಾರತಕ್ಕೆ ರಕ್ಷಣೆ ಒದಗಿಸಿದ್ದಾರೆ. ಇವರೊಂದಿಗೆ ರೋಹಿತ್‌ ಶರ್ಮ ಕೂಡ ಉತ್ತಮ ಬ್ಯಾಟಿಂಗ್‌ ಪ್ರದರ್ಶಿಸಿದರು.

ದಿನದಾಟದ ಅಂತ್ಯಕ್ಕೆ ಭಾರತ 5 ವಿಕೆಟಿಗೆ 297 ರನ್‌ ಗಳಿಸಿತ್ತು. ಪೂಜಾರ 187 ಎಸೆತಗಳಿಂದ 100 ರನ್‌ ಬಾರಿಸಿ ನಿವೃತ್ತರಾದರು. ಇದರಲ್ಲಿ 8 ಬೌಂಡರಿ, ಒಂದು ಸಿಕ್ಸರ್‌ ಒಳಗೊಂಡಿತ್ತು. ರೋಹಿತ್‌ ಶರ್ಮ 68 ರನ್ನುಗಳ ಕೊಡುಗೆ ಸಲ್ಲಿಸಿದರು (115 ಎಸೆತ, 8 ಬೌಂಡರಿ, 1 ಸಿಕ್ಸರ್‌). ಇವರಿಂದ 4ನೇ ವಿಕೆಟಿಗೆ 132 ರನ್‌ ಒಟ್ಟುಗೂಡಿತು.

ರಿಷಭ್‌ ಪಂತ್‌ 33 ರನ್‌ ಮಾಡಿದರು (53 ಎಸೆತ, 4 ಬೌಂಡರಿ, 1 ಸಿಕ್ಸರ್‌). ಹನುಮ ವಿಹಾರಿ 37, ರವೀಂದ್ರ ಜಡೇಜ ಒಂದು ರನ್‌ ಮಾಡಿ ಬ್ಯಾಟಿಂಗ್‌ ಕಾಯ್ದುಕೊಂಡಿದ್ದಾರೆ. ದ್ವಿತೀಯ ದಿನದಾಟದ ಆರಂಭಕ್ಕೆ ಮಳೆಯಿಂದ ಅಡಚಣೆಯಾಗಿದೆ.