27.68 ಲಕ್ಷ ರೂ ದಂಡ ತೆತ್ತ ಪೋರ್ಷೆ ಕಾರು ಮಾಲಕ!

ಅಹಮದಾಬಾದ್: ದುಬಾರಿ ಬೆಲೆಯ ಪೋರ್ಷೆ ಕಾರಿನ ಒಡೆಯನೊಬ್ಬನಿಗೆ ಪೊಲೀಸರು ಬರೋಬ್ಬರಿ 27.68 ಲಕ್ಷ ರೂಪಾಯಿ ದಂಡ ಹಾಕಿದ್ದಾರೆ.

ಪೋರ್ಷೆ ಕಾರು ಮಾಲಕ ರಂಜಿತ್ ದೇಸಾಯಿ ದೇಶದ ಅತೀ ಹೆಚ್ಚಿನ ಮೊತ್ತದ ದಂಡ ಪಾವತಿ ಮಾಡಿದವರು.  ಈ ಹಿಂದೆ ವಾಹನ ತಪಾಸಣೆ ಸಡೆಸುತ್ತಿದ್ದ ಸಂದರ್ಭ ಪೊಲೀಸರು ರಂಜಿತ್ ದೇಸಾಯಿಗೆ 9 ಲಕ್ಷ ರೂಪಾಯಿ ದಂಡ ವಿಧಿಸಿದ್ದರು. ಯಾಕೆಂದರೆ ಕಾರಿಗೆ ನಂಬರ್ ಪ್ಲೇಟ್ ಸೇರಿದಂತೆ ಯಾವುದೇ ದಾಖಲೆಗಳಿರಲಿಲ್ಲ.

ಇತ್ತೀಚೆಗೆ ದಾಖಲೆ ಪಡೆಯುವ ಸಲುವಾಗಿ ಮತ್ತು ದಂಡ ಕಟ್ಟಲು ಪ್ರಾದೇಶಿಕ ಸಾರಿಗೆ ಇಲಾಖೆಗೆ ತೆರಳಿದ ರಂಜಿತ್ ದೇಸಾಯಿ ಒಟ್ಟು 27.68 ಲಕ್ಷ ರೂ ಪಾವತಿಸಿದ್ದಾರೆ.  ದಂಡ ಪಾವತಿಸುವಲ್ಲಿ ವಿಳಂಬವಾದ ಕಾರಣ 12 ಲಕ್ಷ ರೂಪಾಯಿ ಮತ್ತು ಉಳಿದ ಹಣ ರಸ್ತೆ ತೆರಿಗೆ , ವಾಹನ ನೋಂದಣಿ ಮತ್ತು ಇತರ ತೆರಿಗೆಗಳು ಸೇರಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ರಂಜಿತ್ ದೇಸಾಯಿ 2.38 ಕೋಟಿ ರೂಪಾಯಿ ಬೆಲೆಯ ಪೋರ್ಷೆ 911 ಸ್ಪೋರ್ಟ್ಸ್ ಕಾರನ್ನು ಹೊಂದಿದ್ದು, 2017ರಿಂದ ದಾಖಲೆಯಿಲ್ಲದೆ ಓಡಿಸುತ್ತಿದ್ದರು.