ಹೈದರಾಬಾದ್: ಪವನ್ ಕಲ್ಯಾಣ್ ಅವರ ʼಉಸ್ತಾದ್ ಭಗತ್ ಸಿಂಗ್’ ಸೆಟ್ಟೇರುವ ಮುನ್ನವೇ ಒಂದಲ್ಲ ಒಂದು ವಿಚಾರದಲ್ಲಿ ಸುದ್ದಿಯಾಗುತ್ತಿದೆ. ಸಿನಿಮಾದ ನಾಯಕಿ ಯಾರೆನ್ನುವ ಕುರಿತು ಅನೇಕ ಗಾಸಿಪ್‌ ಗಳ ಹಬ್ಬಿದ್ದು, ಇದೀಗ ಈ ಬಗ್ಗೆ ಮತ್ತೊಂದು ಸುದ್ದಿ ಹೊರಬಿದ್ದಿದೆ.
ʼಉಸ್ತಾದ್ ಭಗತ್ ಸಿಂಗ್’ ಮೈತ್ರಿ ಮೂವೀ ಮೇಕರ್ಸ್ ನಿರ್ಮಾಣದ ಪವನ್ ಕಲ್ಯಾಣ್ ಅವರ ಬಹು ನಿರೀಕ್ಷಿತ ಸಿನಿಮಾಗಳಲ್ಲೊಂದು. ಹರೀಶ್ ಶಂಕರ್ ನಿರ್ದೇಶನದ ಸಿನಿಮಾದಲ್ಲಿ ಬಹುಭಾಷಾ ನಟಿ ಪೂಜಾ ಹೆಗ್ಡೆ ನಟಿಸಲಿದ್ದಾರೆ ಎನ್ನುವ ಮಾತುಗಳು ಆರಂಭಿಕವಾಗಿ ಕೇಳಿ ಬಂದಿತ್ತು. ಆ ಬಳಿಕ ಅವರು ಈ ಸಿನಿಮಾದಲ್ಲಿ ಇರುವ ಬಗ್ಗೆ ಕೆಲವೊಂದು ಗಾಸಿಪ್‌ ಗಳು ಹರಿದಾಡಿತ್ತು.
ಪೂಜಾ ಹೆಗ್ಡೆ ಅವರ ಕಳೆದ ಕೆಲ ಸಿನಿಮಾಗಳು ಬಾಕ್ಸ್‌ ಆಫೀಸ್‌ ನಲ್ಲಿ ಹಿಟ್‌ ಆಗಿಲ್ಲ. ಸತತ ಸೋಲಿನಿಂದ ನಟಿ ಪೂಜಾ ಹೆಗ್ಡೆ ಈಗ ತನ್ನ ಸ್ಕ್ರಿಪ್ಟ್‌ ಗಳನ್ನು ಎಚ್ಚರಿಕೆ ವಹಿಸಿಕೊಂಡು ಆಯ್ದುಕೊಳ್ಳುತ್ತಿದ್ದಾರೆ. ತನಗೆ ಸೂಕ್ತವಾದ ಸ್ಕ್ರಿಪ್ಟ್‌ ಗಳನ್ನು ಮಾತ್ರ ಆಯ್ದುಕೊಳ್ಳುತ್ತಿದ್ದಾರೆ. ಇದೀಗ ʼಉಸ್ತಾದ್ ಭಗತ್’ ಚಿತ್ರದಿಂದ ಕರಾವಳಿ ಚೆಲುವೆ ಹೊರಬಿದ್ದಿದ್ದಾರೆ.
ʼಉಸ್ತಾದ್ ಭಗತ್ ಸಿಂಗ್’ ಸಿನಿಮಾದಲ್ಲಿ ಪವನ್ ಕಲ್ಯಾಣ್ ಅವರೊಂದಿಗೆ ಬಹುಭಾಷಾ ನಟಿ ಶ್ರೀಲೀಲಾ ಕಾಣಿಸಿಕೊಳ್ಳಲಿದ್ದಾರೆ.
ಸೆ. 5ರಿಂದ ಸಿನಿಮಾದ ಚಿತ್ರೀಕರಣ ಆರಂಭಗೊಳ್ಳಲಿದ್ದು, ಈ ಸಿನಿಮಾದಲ್ಲಿ ಶ್ರೀಲೀಲಾ, ಅಶುತೋಷ್ ರಾಣಾ, ನವಾಬ್ ಶಾ, ಬಿ ಎಸ್ ಅವಿನಾಶ್, ಗೌತಮಿ ಮತ್ತು ಚಮ್ಮಕ್ ಚಂದ್ರ ಮುಂತಾದವರು ನಟಿಸಲಿದ್ದಾರೆ ಎಂದು ಮೈತ್ರಿ ಮೂವೀ ಮೇಕರ್ಸ್ ತಿಳಿಸಿದೆ.
ʼಉಸ್ತಾದ್ ಭಗತ್ ಸಿಂಗ್ʼ ಚಿತ್ರವು 2016 ರಲ್ಲಿ ಬಿಡುಗಡೆಯಾದ ಅಟ್ಲೀ ಅವರ ತಮಿಳು ಚಿತ್ರ ʼಥೇರಿʼಯ ರಿಮೇಕ್ ಎನ್ನಲಾಗಿದ್ದು, ತಮಿಳಿನಲ್ಲಿ ದಳಪತಿ ವಿಜಯ್, ಸಮಂತಾ ರೂತ್ ಪ್ರಭು ಮತ್ತು ಆಮಿ ಜಾಕ್ಸನ್ ನಟಿಸಿದ್ದರು. ಕಾಲಿವುಡ್‌ ನಲ್ಲಿ ʼಥೇರಿʼ ಸೂಪರ್‌ ಹಿಟ್‌ ಆಗಿತ್ತು.
ಇತ್ತೀಚೆಗೆ ರಿಲೀಸ್‌ ಆದ ಪವನ್ ಕಲ್ಯಾಣ್ ಹಾಗೂ ಸಾಯಿ ಧರಮ್ ತೇಜ್ ಅವರ ʼಬ್ರೋʼ ಬಾಕ್ಸ್‌ ಆಫೀಸ್‌ ನಲ್ಲಿ ಭರ್ಜರಿ ಗಳಿಕೆ ಕಂಡಿತ್ತು.
