PoK ಭಾರತದ ಭಾಗ; ಮರಳುವಿಕೆ ಖಚಿತಪಡಿಸಿಕೊಳ್ಳಲು ಎಲ್ಲಾ ಪಕ್ಷಗಳು ಬದ್ಧವಾಗಿವೆ: ಜೈಶಂಕರ್

ಹೊಸದಿಲ್ಲಿ: ಪಾಕ್ ಆಕ್ರಮಿತ ಕಾಶ್ಮೀರವು(PoK) ಭಾರತದ ಭಾಗವಾಗಿದೆ. ಅದು ಭಾರತಕ್ಕೆ ಮರಳುವುದನ್ನು ಖಚಿತಪಡಿಸಿಕೊಳ್ಳಲು ಪ್ರತಿ ಭಾರತೀಯ ರಾಜಕೀಯ ಪಕ್ಷಗಳೂ ಬದ್ಧವಾಗಿವೆ ಎಂದು ವಿದೇಶಾಂಗ ಸಚಿವ ಎಸ್ ಜೈಶಂಕರ್ ಬುಧವಾರ ಪ್ರತಿಪಾದಿಸಿದ್ದಾರೆ.

ಹೊಸದಿಲ್ಲಿಯ ಗಾರ್ಗಿ ಕಾಲೇಜಿನ ವಿದ್ಯಾರ್ಥಿಗಳೊಂದಿಗೆ ಸಂವಾದದ ಸಂದರ್ಭದಲ್ಲಿ ಜೈಶಂಕರ್ ಅವರು “ಪಿಒಕೆ ಬಗ್ಗೆ ಸಂಸತ್ತಿನ ನಿರ್ಣಯವಿದೆ ಈ ದೇಶದ ಪ್ರತಿಯೊಂದು ರಾಜಕೀಯ ಪಕ್ಷಕ್ಕೂ ಭಾರತದ ಭಾಗವಾಗಿರುವ ಪಿಒಕೆ ಭಾರತಕ್ಕೆ ಹಿಂತಿರುಗುವುದು ಬದ್ಧತೆಯಾಗಿದೆ” ಎಂದು ಹೇಳಿದ್ದಾರೆ.

ಜಮ್ಮು ಮತ್ತು ಕಾಶ್ಮೀರದಲ್ಲಿ 370 ನೇ ವಿಧಿಯನ್ನು ರದ್ದುಗೊಳಿಸಿರುವುದನ್ನು ಉಲ್ಲೇಖಿಸಿ, ”ಅಂದಿನ ರಾಜಕೀಯವು ಸಾರ್ವಜನಿಕ ಪ್ರಜ್ಞೆಗೆ ಆಳವಾಗಿ ಚಾಲನೆ ನೀಡಿದ್ದರಿಂದ 370 ನೇ ವಿಧಿಯನ್ನು ಬದಲಾಯಿಸಲು ಸಾಧ್ಯವಿಲ್ಲ ಎಂದು ಜನರು ಮೊದಲೇ ಭಾವಿಸಿದ್ದರು. ಒಮ್ಮೆ ನಾವು ಅದನ್ನು ಬದಲಾಯಿಸಿದರೆ ಇಡೀ ನೆಲದ ಪರಿಸ್ಥಿತಿ ಬದಲಾಗುತ್ತದೆ” ಎಂದು ಜೈಶಂಕರ್ ಹೇಳಿದರು.