ಉತ್ತರಾಖಂಡ ಭೇಟಿ ವೇಳೆ ಶೀಟಿನ ಮನೆಯಲ್ಲಿ ರಾತ್ರಿ ಕಳೆದಿದ್ದ ಮೋದಿ!

ಡೆಹ್ರಾಡೂನ್‌: ಕಳೆದ ವಾರ 2 ದಿನಗಳ ಉತ್ತರಾಖಂಡ ಪ್ರವಾಸದ ವೇಳೆ ಪ್ರಧಾನಿ ನರೇಂದ್ರ ಮೋದಿ ಅವರು ಮನಾ ನಗರದ ಸಮೀಪದ ತಾತ್ಕಾಲಿಕ ನಿವಾಸವೊಂದರಲ್ಲೇ ರಾತ್ರಿ ಕಳೆದಿದ್ದರು!

ಸಮುದ್ರ ಮಟ್ಟದಿಂದ 11,300 ಅಡಿ ಎತ್ತರದಲ್ಲಿ ಗಡಿ ರಸ್ತೆಗಳ ಸಂಸ್ಥೆ(ಬಿಆರ್‌ಒ/ಡಿಇಟಿ)ಯು ತಮ್ಮ ಸಿಬ್ಬಂದಿಗಾಗಿ ನಿರ್ಮಿಸಿರುವ ಸಣ್ಣ ಅರೆ ಶಾಶ್ವತ ತಾತ್ಕಾಲಿಕ ಚಾವಣಿಯಲ್ಲೇ ಅವರು ಮಲಗಿದ್ದರು.

ಮೋದಿ ಅವರು ಈ ಸ್ಥಳದಲ್ಲಿ ರಾತ್ರಿ ಕಳೆಯಲಿದ್ದಾರೆ ಎಂದು ಕೇವಲ ಮೂರು ದಿನಗಳ ಮೊದಲು ಡಿಇಟಿ ಅಧಿಕಾರಿಗಳಿಗೆ ಮಾಹಿತಿ ಕೊಡಲಾಗಿತ್ತು.

ಆ ತಾತ್ಕಾಲಿಕ ನಿವಾಸದಲ್ಲಿ ಯಾವುದೇ ಸೌಲಭ್ಯವಿಲ್ಲದಿದ್ದರೂ ಪ್ರಧಾನಿ ಅಲ್ಲೇ ತಂಗಲು ನಿರ್ಧರಿಸಿದ್ದಾರೆ. ಸಣ್ಣದೊಂದು ಅತ್ಯಗತ್ಯ ಸಾಮಾಗ್ರಿಗಳ ಜತೆ ಎಲೆಕ್ಟ್ರಿಕ್‌ ಹೀಟರ್‌ ಮಾತ್ರವೇ ಅಲ್ಲಿ ಇತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಕಾರ್ಮಿಕರು ಮಾಡಿದ ಅಡುಗೆ:
ಹಾಗೆಯೇ ಮೋದಿ ಅಲ್ಲಿನ ಕಾರ್ಮಿಕರು ಮಾಡಿದ ಅಡುಗೆಯನ್ನೇ ಸೇವಿಸಿದ್ದಾರೆ. ಮೋದಿಗೆಂದು ಬೇರೆಡೆ ಊಟದ ವ್ಯವಸ್ಥೆ ಮಾಡಲಾಗಿತ್ತಾದರೂ ಅವರು ಮನೆಯಲ್ಲಿದ್ದ ಅಡುಗೆಯವರಿಗೆ “ನೀವೇ ಅಡುಗೆ ಮಾಡಿ’ ಎಂದು ಕೇಳಿ ಮಾಡಿಸಿಕೊಂಡು, ತಿಂದಿದ್ದಾರೆ. ಕಿಚಡಿ, ಪೋಹಾ, ಮೀಠಾ ಕರೇಲಾ, ಸಬ್ಬಕ್ಕಿ ಖೀರನ್ನು ಪ್ರಧಾನಿ ಸೇವಿಸಿದ್ದಾರೆ.