ಮುಂಬಯಿ, ಆ. 16: ಕೋವಿಡ್ ನಿರ್ಣಾಯಕ ಆರೈಕೆ ಮತ್ತು ಪ್ಲಾಸ್ಮಾ ದಾನ ಅಗತ್ಯವಿದ್ದರೆ ಪ್ಲಾಸ್ಮಾ ದಾನಿಗಳ ಸಂಬಂ ಧಿಕರಿಗೆ ಆದ್ಯತೆ ನೀಡಲು ಪುಣೆ ಜಿಲ್ಲಾಡಳಿತ ನಿರ್ಧರಿಸಿದೆ.
ಪುಣೆಯ ಜಿಲ್ಲೆಯ ಉಸ್ತುವಾರಿ ಸಚಿವ ಅಜಿತ್‌ ಪವಾರ್‌ ಅವರು ಮಾತನಾಡಿ, ಪುಣೆಯಲ್ಲಿ ಪ್ಲಾಸ್ಮಾ ದೇಣಿಗೆ ಹೆಚ್ಚಾಗಬೇಕಿದೆ. ಇದು ನಿರ್ಣಾಯಕ ರೋಗಿಗಳ ಜೀವ ಉಳಿಸಲು ಸಹಾಯ ಮಾಡುತ್ತದೆ. ಪ್ಲಾಸ್ಮಾ ದೇಣಿಗೆ ಹೆಚ್ಚಿಸಲು ಆಡಳಿತವು ಪ್ರಯತ್ನಗಳನ್ನು ಮಾಡಬೇಕು ಎಂದಿದ್ದಾರೆ.
ವಿಭಾಗೀಯ ಆಯುಕ್ತ ಸೌರಭ್‌ ರಾವ್‌ ಮಾತನಾಡಿ, ಇಲ್ಲಿಯವರೆಗೆ ಪುಣೆಯಲ್ಲಿ ಒಟ್ಟು 500 ಪ್ಲಾಸ್ಮಾ ದೇಣಿಗೆ ನೀಡಲಾಗಿದೆ, ಅದರಲ್ಲಿ 154 ಪ್ಲಾಸ್ಮಾಗಳನ್ನು ಬಳಸಲಾಗಿದೆ. ಪ್ಲಾಸ್ಮಾ ಚಿಕಿತ್ಸೆ ಕೋವಿಡ್ ಸೋಂಕಿತರಿಗೆ ಸಹಾಯ ಮಾಡುತ್ತಿರುವುದು ನಿಜ. ಆದರೆ ಪ್ಲಾಸ್ಮಾ ನೀಡಿದ 7 ರೋಗಿಗಳು ಮರಣಹೊಂದಿದ ಕಾರಣ ಇದು ಸಂಪೂರ್ಣ ಪರಿಹಾರವಲ್ಲ. ಆಗಸ್ಟ್‌ 15ರಿಂದ ಪ್ಲಾಸ್ಮಾ ದಾನ ಅಭಿಯಾನವನ್ನು ಪ್ರಾರಂಭಿಸಲು ಆಡಳಿತ ನಿರ್ಧರಿಸಿದೆ ಎಂದು ಹೇಳಿದ್ದಾರೆ.
ಪ್ಲಾಸ್ಮಾ ದಾನಕ್ಕೆ ಕೋವಿಡ್ ಗುಣಮುಖರು ಮುಂದಾಗುತ್ತಿಲ್ಲ. ನಾಗರಿಕರು ತಮ್ಮ ಸಂಬಂಧಿಕರಿಗೆ ಪ್ಲಾಸ್ಮಾ ದಾನ ಅಗತ್ಯವಿದ್ದರೆ ಅವರು ಸಿದ್ಧರಾಗಿರಬೇಕು ಎಂದು ಭಾವಿಸಿದ್ದಾರೆ. ಇದನ್ನು ನಿವಾರಿಸಲು, ಯಾರಾದರೂ ಪ್ಲಾಸ್ಮಾವನ್ನು ದಾನ ಮಾಡಿದರೆ, ಅಗತ್ಯವಿದ್ದಾಗ ಅಂತಹ ವ್ಯಕ್ತಿಯ ಹತ್ತಿರದ ಸಂಬಂಧಿಗೆ ಪ್ಲಾಸ್ಮಾವನ್ನು ಆದ್ಯತೆಯ ಮೇರೆಗೆ ನೀಡಲಾಗುವುದು ಎಂದು ನಾವು ನಿರ್ಧರಿಸಿದ್ದೇವೆ.
ಆಡಳಿತದ ಅಭಿಯಾನವು ಮೊದಲು ಪೊಲೀಸ್‌ ಸಿಬಂದಿ ಮತ್ತು ಸರಕಾರಿ ನೌಕರರಿಂದ ಪ್ಲಾಸ್ಮಾ ದೇಣಿಗೆಯನ್ನು ಗುರಿಯಾಗಿರಿಸಿಕೊಳ್ಳುತ್ತದೆ ಎಂದು ಆಯುಕ್ತರು ತಿಳಿಸಿದ್ದಾರೆ.
