Advertisement
1. ಡ್ರಾಸ್ಸೆರಸಾಮಾನ್ಯವಾಗಿ sundews ಅಂತ ಕರೆಯಲ್ಪಡುವ ಈ ಸಸ್ಯ ಕುಬ್ಜವಾಗಿ ನೆಲಕ್ಕೆ ಅಂಟಿಕೊಂಡೇ ಬೆಳೆಯುತ್ತದೆ. ಇದರ ಎಲೆಗಳು ಅಗಲವಾಗಿ ಚಾಚಿಕೊಂಡಿರುತ್ತವೆ. ಎಲೆಯ ತುದಿಗೆ ಆಕರ್ಷಕವಾದ ವರ್ಣಗ್ರಂಥಿಗಳಿರುತ್ತವೆ. ಇವು ಬಿಸಿಲಿನಲ್ಲಿ ಇಬ್ಬನಿಯಂತೆ ಹೊಳೆಯುವುದರಿಂದ ಇದಕ್ಕೆ sundews ಎಂಬ ಹೆಸರು ಬಂದಿದೆ. ಕೀಟವು ಇದರ ಎಲೆಯ ಮೇಲೆ ಬಂದು ಕುಳಿತಾಗ ಅದರ ಕಾಲುಗಳು ಎಲೆಗೆ ಅಂಟಿಕೊಳ್ಳುತ್ತವೆ. ನಂತರ ಎಲೆಗಳು ನಿಧಾನವಾಗಿ ಸುರುಳಿಯಾಕಾರದಲ್ಲಿ ಸುತ್ತುತ್ತಾ ಹುಳು/ಬೇಟೆಯನ್ನು ಜೀರ್ಣ ಮಾಡಿಕೊಳ್ಳುತ್ತವೆ. ಈ ಸಸ್ಯ ಮರಳ ದಂಡೆಯಲ್ಲಿ ಹೆಚ್ಚಾಗಿ ಬೆಳೆಯುತ್ತದೆ.
ಇದು ಅತಿ ಸಾಮಾನ್ಯವಾಗಿ ಕಂಡು ಬರುವ ಮಾಂಸಾಹಾರಿ ಸಸ್ಯಗಳಲ್ಲೊಂದು. ಭಾರತದಲ್ಲಿಯೇ ಸುಮಾರು 90 ಪ್ರಭೇದದ ಪಿಚರ್‌ ಸಸ್ಯಗಳಿವೆ. ಇದರ ಎಲೆಗಳು ಜಗ್‌ (ಹೂಜಿ) ಆಕಾರದಲ್ಲಿರುತ್ತವೆ. ಇದರ ಒಳಗಡೆ ನೀರಿನಂಥ ದ್ರವವಿರುತ್ತದೆ. ಹುಳುಗಳನ್ನು ಆಕರ್ಷಿಸಲು ಕೊಳೆತು ನಾರುವ ದುರ್ಗಂಧವನ್ನು ಪಸರಿಸುವ ಗಿಡ, ಆಕರ್ಷಿತವಾಗಿ ಬರುವ ಹುಳುಗಳು ಎಲೆಯ ಮೇಲಿರುವ ಅಂಟಿನಿಂದಾಗಿ ಕಾಲು ಜಾರಿ ಹೂಜಿಯೊಳಗೆ ಬೀಳುವಂತೆ ಮಾಡುತ್ತದೆ. ಒಂದು ಸಲ ಇದರಲ್ಲಿ ಬಿದ್ದ ಹುಳಕ್ಕೆ ಹೊರ ಬರಲಾಗುವುದೇ ಇಲ್ಲ. ಆ ದ್ರವದಲ್ಲಿರುವ ಎಂಜೈಮ್‌ಗಳು ಹುಳುವನ್ನು ಜೀರ್ಣಿಸಿಕೊಳ್ಳುತ್ತವೆ. ಇಲಿ ಮತ್ತು ಚಿಕ್ಕ ಕಪ್ಪೆಗಳನ್ನು ಕೂಡ ಈ ಗಿಡ ಬೇಟೆಯಾಡುತ್ತದೆ. 3. ಬಟರ್‌ವರ್ಟ್‌
ಈ ಕೀಟಾಹಾರಿ ಸಸ್ಯವು ಹಿಮಾಲಯ, ಕಾಶ್ಮೀರ, ಸಿಕ್ಕಿಂನಲ್ಲಿ ಕಂಡು ಬರುತ್ತದೆ. ಸಾಮಾನ್ಯವಾಗಿ ತೊರೆ, ಹಳ್ಳಗಳ ಪಕ್ಕದಲ್ಲಿ ಬೆಳೆಯುತ್ತದೆ. ಎಲೆಯ ಮೇಲೆ ಬಂದು ಕೂರುವ ಕೀಟಗಳು, ಎಲೆಯ ಮೇಲಿರುವ ಅಂಟಾದ ವಸ್ತುವಿಗೆ ಸಿಕ್ಕಿಕೊಂಡು ಬಿಡುತ್ತವೆ. ಆಗ ಸಸ್ಯದ ಎಲೆ ಸುರುಳಿಯಾಗಿ ಸುತ್ತಿ, ಕೀಟವನ್ನು ಸ್ವಾಹ ಮಾಡುತ್ತದೆ. ಕೀಟದ ದೇಹದಿಂದ ತನಗೆ ಬೇಕಾದ ಅಂಶಗಳನ್ನು ಹೀರಿಕೊಳ್ಳುತ್ತದೆ.
Related Articles
ಚೂಪಾದ ಹಲ್ಲುಗಳಿರುವ ಪ್ರಾಣಿಯೊಂದು ಬಾಯಿ ತೆಗೆದು ಕುಳಿತಂತೆ ಕಾಣುವ ವೀನಸ್‌ ಫ್ಲೈ ಟ್ರ್ಯಾಪ್‌ ಎಂಬ ಈ ಸಸ್ಯ ನೋಡಲು ಸುಂದರವಾಗಿದೆ. ಈ ಸಸ್ಯಗಳ ಮೂಲ ಅಮೆರಿಕಾದ ಉತ್ತರ ಮತ್ತು ದಕ್ಷಿಣ ಕ್ಯಾರೊಲಿನಾ ಪ್ರಾಂತ್ಯ. ಇವು ಶಿಕಾರಿ ಮಾಡುವ ಬಗೆಯೂ ಕುತೂಹಲಕಾರಿ. ಬಾಯಿ ತೆರೆದುಕೊಂಡಿರುವ ಎಲೆ, ಸುವಾಸನಾಭರಿತ ಮಕರಂದವನ್ನು ಸೂಸುತ್ತಿರುತ್ತದೆ. ಕೀಟಗಳು ಅದರ ಮೇಲೆ ಬಂದು ಕುಳಿತೊಡನೆ ಅದು ಎಲೆಯನ್ನು ಮುಚ್ಚುವುದಿಲ್ಲ. ಬದಲಿಗೆ, ಕೀಟದ ಚಲಿಸುವಿಕೆಯನ್ನು ಗಮನಿಸುತ್ತಿರುತ್ತದೆ! ಕಸ ಕಡ್ಡಿಯನ್ನು ಕೀಟವೆಂದು ನಂಬಿ ಮೋಸ ಹೋಗಬಾರದೆಂದು ಮಾರ್ಪಾಡುಗೊಂಡಿರುವ ಜೈವಿಕ ವಿಧಾನ ಇದು! ಪ್ರತಿ 20 ಸೆಕೆಂಡುಗಳಲ್ಲಿ 2 ಚಲನೆಗಳಾದರೆ ಮಾತ್ರ ಎಲೆಯನ್ನು ಮುಚ್ಚಿ , ಕೀಟವನ್ನು ಬಂಧಿಸುತ್ತದೆ. ನಂತರ ಕೆಲವು ದಿನಗಳಾದ ಮೇಲೆ ಎಲೆ ಪುನಃ ತೆರೆದುಕೊಳ್ಳುತ್ತದೆ ಮತ್ತು ಕೀಟದ ತ್ಯಾಜ್ಯವನ್ನು ಕೆಳಗೆ ಬೀಳಿಸುತ್ತದೆ.
Advertisement
ಅನುಪಮಾ ಕೆ. ಬೆಣಚಿನಮರ್ಡಿ