ಗಿಡ ನೆಟ್ಟು,ಮರವನ್ನಾಗಿಸಿ ಹಸ್ತಾಂತರಿಸುವುದೇ ಪೀಳಿಗೆಗೆ ಕೊಡುಗೆ

ಮೂಲ್ಕಿ: ನಮ್ಮ ಮುಂದಿನ ಪೀಳಿಗೆಗೆ ಒಂದು ಸಸಿಯನ್ನು ನೆಟ್ಟು ಅವರಿಗೆ ಅದನ್ನು ಮರವನ್ನಾಗಿಸಿ ಹಸ್ತಾಂತರಿಸುವುದಕ್ಕಿಂತ ದೊಡ್ಡ ಬಹುಮಾನ ಮತ್ತೂಂದಿಲ್ಲ ಎಂದು ಮೂಲ್ಕಿ ಚರ್ಚ್‌ ಧರ್ಮಗುರು ಫಾ| ಫ್ರಾನ್ಸಿಸ್‌ ಕ್ಷೇವಿಯರ್‌ ಗೋಮ್ಸ್‌ ಹೇಳಿದರು.

ಅವರು ಮೂಲ್ಕಿಯ ಕಾರ್ನಾಡು ಚರ್ಚ್‌, ಅರಣ್ಯ ಇಲಾಖೆ, ಕೆಥೋಲಿಕ್‌ ಸಭಾ ಮೂಲ್ಕಿ, ಗ್ಲೋರಿಯಾ ಮಹಿಳಾ ಸಂಘಟನೆ ಹಾಗೂ ಐ.ಸಿ.ವೈ.ಎಂ. ಸಂಘದ ಆಶ್ರಯದಲ್ಲಿ ಜರಗಿದ ವನ ಮಹೋತ್ಸವ ಹಾಗೂ ಸಸಿಗಳ ವಿತರಣೆ ಸಮಾರಂಭದಲ್ಲಿ ಮಾತನಾಡಿದರು.

ಮರಗಳ ರಕ್ಷಣೆ ಮಾಡದಿದ್ದರೆ ಮುಂದೆ ನಮಗೆ ರಕ್ಷಣೆ ಕೊಡುವ ವಾತಾವರಣವನ್ನು ನಾವು ಕಳೆದುಕೊಳ್ಳುವ ಭಯ ನಮ್ಮ ಮುಂದೆ ಇದೆ ಎಂದರಲ್ಲದೆ, ಈ ಬಗ್ಗೆ ಎಲ್ಲರೂ ಗಾಢವಾಗಿ ಚಿಂತಿಸಬೇಕಾದ ಅಗತ್ಯವನ್ನು ಫಾ| ಗೋಮ್ಸ್‌ ವ್ಯಕ್ತಪಡಿಸಿದರು.

ಒಂದು ಸಾವಿರಕ್ಕೂ ಮಿಕ್ಕಿ ಸಸಿಗಳ ವಿತರಣೆ ನಡೆಯಿತು. ಸಸಿಗಳನ್ನು ನೆಟ್ಟು ಉತ್ತಮವಾಗಿ ಬೆಳೆಸುವ ನಾಗರಿಕರಿಗೆ ನಗದು ಬಹುಮಾನ ನೀಡುವ ಯೋಜನೆಯನ್ನು ಫಾ| ಗೋಮ್ಸ್‌ ಪ್ರಕಟಿಸಿ ಹೆಚ್ಚು ಮರಗಳನ್ನು ಬೆಳೆಸಿ ಉತ್ತಮ ಪರಿಸರ ಹಾಗೂ ಲಕ್ಷಾಂತರ ಬೆಲೆ ಇರುವ ಆಮ್ಲ ಜನಕವನ್ನು ಉಚಿತವಾಗಿ ಪಡೆಯಿರಿ ಎಂದರು.

ಪರಿಸರ ರಕ್ಷಣೆಯಲ್ಲಿ ಗಿಡ ಮರಗಳ ಕೊಡುಗೆಯ ಬಗ್ಗೆ ಉಪ ಅರಣ್ಯ ವಲಯಾಧಿಕಾರಿ ಕೆ.ಸಿ. ಮ್ಯಾಥ್ಯೂ ಮಾಹಿತಿಯಿತ್ತರು.
2012ರಲ್ಲಿ ಸಾಲು ಮರದ ತಿಮ್ಮಕ್ಕ ಮೂಲ್ಕಿಗೆ ಆಗಮಿಸಿದ ಸಂದರ್ಭ ಅವರು ನೆಟ್ಟ ಹಲಸಿನ ಮರಕ್ಕೆ ಗೊಬ್ಬರ, ಕಟ್ಟೆ ಅದರ ವಿಶೇಷ ಪೋಷಣೆಯ ಕಾರ್ಯಕ್ರಮಕ್ಕೆ ಯೋಜನೆಯ ದಾನಿ ರೋಲ್ಪಿ  ಡಿ’ಕೋಸ್ತಾ ಚಾಲನೆ ನೀಡಿದರು.

ಸಮಿತಿಯ ಪ್ರಗತಿಪರ ಕೃಷಿಕ ಹಾಗೂ ರಾಜ್ಯೋತ್ಸವ ಪ್ರಶಸ್ತಿ ವಿಜೇತ ವೈದ್ಯ ಡಾ| ಎ. ಸುರೇಶ್‌ ಜೆ. ಅರಾನ್ಹ, ಚರ್ಚ್‌ ಪಾಲನಾ ಸಮಿತಿಯ ಉಪಾಧ್ಯಕ್ಷೆ ಮೋಲಿ ಡಿ’ಸೋಜಾ, ಕಾರ್ಯದರ್ಶಿ ಪ್ರಕಾಶ್‌ ಮೊಂತೆರೋ, ಗ್ಲೋರಿಯಾ ಮಹಿಳಾ ಸಂಘಟನೆಯ ಲಿಡೀಯಾ ಫ‌ುರ್ತಾಡೋ, ಐಸಿವೈಎಂ ಅಧ್ಯಕ್ಷೆ ಸಾಂಡ್ರಾ ಗ್ಲೋರಿಯ ಕ್ರಾಸ್ತಾ, ಕೆಥೋಲಿಕ್‌ ಸಭಾದ ಅಧ್ಯಕ್ಷ  ವೈಸಿಐಎಂ ಅಧ್ಯಕ್ಷೆ ಲೀಶಾ ರಿಯಾ ಸಿಕ್ವೇರಾ, ಫಾರೆಸ್ಟರ್‌ಗಳಾದ ಶಂಕರ್‌ ಮತ್ತು ಸೇಸಪ್ಪ ಉಪಸ್ಥಿತರಿದ್ದರು. ಸಾಂಡ್ರಾ ಗ್ಲೋರಿಯಾ ಸ್ವಾಗತಿಸಿದರು. ಲೀಶಾ ವಂದಿಸಿದರು.