ಕಟ್ಟಡಕ್ಕೆ ವಿಮಾನ ಡಿಕ್ಕಿ ಹೊಡೆಸುವೆ ಎಂದು ಬೆದರಿಕೆ ಹಾಕಿದ ಪೈಲೆಟ್‌!

ವಾಷಿಂಗ್ಟನ್‌: ವಿಮಾನ ನಿಲ್ದಾಣದಿಂದ ವಿಮಾನವನ್ನೇ ಕದ್ದ ಪೈಲೆಟ್‌ ಒಬ್ಬ ನಗರದ ಕಟ್ಟಡವೊಂದಕ್ಕೆ ವಿಮಾನವನ್ನು ಡಿಕ್ಕಿ ಹೊಡೆಸುವೆ ಎಂದು ಬೆದರಿಕೆ ಹಾಕಿ, ಗಂಟೆಗಟ್ಟಲೆ ಕಾಡಿಸಿದ ವಿಚಿತ್ರ ಘಟನೆ ಅಮೆರಿಕದ ಮಿಸ್ಸಿಸ್ಸಿಪ್ಪಿಯ ತುಪೆಲೋ ನಗರದಲ್ಲಿ ಶನಿವಾರ ನಡೆದಿದೆ.

ಸುಮಾರು 4 ಗಂಟೆಗೂ ಹೆಚ್ಚು ಸಮಯದ ನಂತರ ಆ ವಿಮಾನ ಪತನಗೊಂಡಿದ್ದು, ಪೊಲೀಸರು ಪೈಲೆಟ್‌ ಅನ್ನು ವಶಕ್ಕೆ ಪಡೆದಿದ್ದಾರೆ.

ತುಪೆಲೋ ಪ್ರಾದೇಶಿಕ ವಿಮಾನ ನಿಲ್ದಾಣದಲ್ಲಿ ಸಿಬ್ಬಂದಿಯಾದ ಪೈಲೆಟ್‌ ಈ ಕೆಲಸ ಮಾಡಿದವನು. ಆತ ಶನಿವಾರ ಬೆಳಗ್ಗೆಯೇ “ಬೀಚ್‌ಕ್ರಾಫ್ಟ್ ಕಿಂಗ್‌ ಏರ್‌ 90′ ಹೆಸರಿನ 9 ಸೀಟಿನ ಸಣ್ಣ ವಿಮಾನ ಕದ್ದು, ಹಾರಾಟ ಆರಂಭಿಸಿದ್ದಾನೆ. ನಂತರ ಪೊಲೀಸರೊಂದಿಗೆ ನೇರ ಸಂಪರ್ಕಕ್ಕೆ ಬಂದ ಆತ, ನಗರದ ವಾಲ್‌ಮಾರ್ಟ್‌ ಮಳಿಗೆಗೆ ವಿಮಾನವನ್ನು ಡಿಕ್ಕಿ ಹೊಡೆಸುತ್ತೇನೆ ಎಂದು ಬೆದರಿಸಿದ್ದಾನೆ.

4 ಗಂಟೆಗಳ ಕಾಲ ಅದೇ ಪ್ರದೇಶದಲ್ಲಿ ಆತ ಸುತ್ತಿದ್ದು ಜನರ ಆತಂಕಕ್ಕೆ ಕಾರಣವಾಗಿತ್ತು. ಪೊಲೀಸರು ವಾಲ್‌ಮಾರ್ಟ್‌ ಹಾಗೂ ಸುತ್ತಲಿನ ಪ್ರದೇಶಗಳ ಜನರನ್ನು ಬೇರೆಡೆಗೆ ಸ್ಥಳಾಂತರಿಸಿತ್ತು.