ಏರ್‌ಪೋರ್ಟ್‌ಗಳಲ್ಲಿ ಭೌತಿಕ ತಪಾಸಣೆಗೆ ಶೀಘ್ರ ಕಡಿವಾಣ

ನವದೆಹಲಿ: ಇನ್ನು ಕೆಲವೇ ದಿನಗಳಲ್ಲಿ ಭಾರತದ ವಿಮಾನ ನಿಲ್ದಾಣಗಳಲ್ಲಿ ಭೌತಿಕ ಭದ್ರತಾ ತಪಾಸಣೆಗೆ ಕಡಿವಾಣ ಬೀಳಲಿದೆ. ಎಲ್ಲಾ ಪ್ರಮುಖ ವಿಮಾನ ನಿಲ್ದಾಣಗಳಲ್ಲೂ ಸಂಪೂರ್ಣ ಬಾಡಿ ಸ್ಕ್ಯಾನರ್‌ಗಳನ್ನು ಅಳವಡಿಸಲು ನಾಗರಿಕ ವಿಮಾನಯಾನ ಸಚಿವಾಲಯ ಮುಂದಾಗಿದೆ.

“ದೇಶಾದ್ಯಂತ ವಿಮಾನ ನಿಲ್ದಾಣಗಳಲ್ಲಿ 2ರಿಂದ 4 ಸಂಪೂರ್ಣ ಬಾಡಿ ಸ್ಕ್ಯಾನರ್‌ಗಳು ಮತ್ತು ಮೆಟಲ್‌ ಡಿಟೆಕ್ಟರ್‌ಗಳನ್ನು ಅಳವಡಿಸಲಾಗುವುದು. ಎಲ್ಲಾ ಪ್ರಯಾಣಿಕರು ಇದರ ಮೂಲಕ ಹಾದುಹೋಗಬೇಕು. ಒಂದು ವೇಳೆ ಅನುಮಾನ ಬಂದರೆ, ಆ ಸಂದರ್ಭಗಳಲ್ಲಿ ಮಾತ್ರ ಅಂಥ ವ್ಯಕ್ತಿಗಳನ್ನು ತೀವ್ರವಾಗಿ ಭೌತಿಕ ತಪಾಸಣೆಗೆ ಒಳಪಡಿಸಲಾಗುವುದು,’ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

“ಎಲ್ಲಾ ವಿಮಾನ ನಿಲ್ದಾಣಗಳಲ್ಲಿ ಸಂಪೂರ್ಣ ಬಾಡಿ ಸ್ಕ್ಯಾನರ್‌ಗಳನ್ನು ಅಳವಡಿಸಿದ ನಂತರ ಭೌತಿಕ ಭದ್ರತಾ ತಪಾಸಣೆಗೆ ಕಡಿವಾಣ ಬೀಳಲಿದೆ. ವಿಮಾನ ನಿಲ್ದಾಣ ಸಿಬ್ಬಂದಿ ಮತ್ತು ವಿಮಾನ ಸಿಬ್ಬಂದಿ ಕೂಡ ಬಾಡಿ ಸ್ಕ್ಯಾನರ್‌ಗಳ ಮೂಲಕ ಹಾದುಹೋಗಬೇಕು,’ ಎಂದು ಹೇಳಿದ್ದಾರೆ.

“ಲೋಹವಲ್ಲದ ಶಸ್ತ್ರಾಸ್ತ್ರಗಳು ಮತ್ತು ಸ್ಫೋಟಕಗಳನ್ನು ಮೆಟಲ್‌ ಡಿಟೆಕ್ಟರ್‌ಗಳು ಗುರುತಿಸುವುದಿಲ್ಲ. ಹಾಗಾಗಿ ಸಂಪೂರ್ಣ ಬಾಡಿ ಸ್ಕ್ಯಾನರ್‌ ಅಗತ್ಯವಿದೆ. ಇತ್ತೀಚಿನ ಒಂದು ಪ್ರಕರಣದಲ್ಲಿ ದೆಹಲಿ ವಿಮಾನ ನಿಲ್ದಾಣದಲ್ಲಿ ಕೀನ್ಯಾ ಮಹಿಳೆಯೊಬ್ಬಳು ಎರಡು ವಿಸ್ಕಿ ಬಾಟಲ್‌ಗ‌ಳಲ್ಲಿ ದ್ರವ ರೂಪದ ಕೊಕೇನ್‌ ಕಳ್ಳಸಾಗಣೆ ಮಾಡುತ್ತಿದ್ದಳು. ಇದನ್ನು ಭೌತಿಕ ತಪಾಸಣೆ ಮೂಲಕ ಕಂಡುಹಿಡಿಯಲಾಯಿತು,’ ಎಂದು ವಿವರಿಸಿದ್ದಾರೆ.