ಹತ್ತು ದಿನಗಳ ನಿರಂತರ ಏರಿಕೆ: ಡೀಸೆಲ್‌ 2.50 ರೂ. ತುಟ್ಟಿ

ಹೊಸದಿಲ್ಲಿ : ನಿರಂತರ ಹತ್ತನೇ ದಿನವಾಗಿ ಇಂದು ಸೋಮವಾರ ಡೀಸೆಲ್‌ ಬೆಲೆ ಲೀಟರಿಗೆ 8 ಪೈಸೆ ಏರಿತು. ಒಟ್ಟಂದದ ಪರಿಣಾಮದಲ್ಲಿ ಈ ತಿಂಗಳ ಆದಿಯಲ್ಲಿ ಸರಕಾರ ಲೀಟರ್‌ ಮೇಲೆ  ಡೀಸೆಲ್‌ ಬೆಲೆಯನ್ನು  ಇಳಿಸಿದ್ದ  2.50 ರೂ. ಈಗ ಸಂಪೂರ್ಣ ಅಳಿಸಿಹೋದಂತಾಗಿದೆ. 

ಅ.5ರಂದು ಕೇಂದ್ರ ಸರಕಾರ ಪೆಟ್ರೋಲ್‌ ಮತ್ತು ಡೀಸೆಲ್‌ ಬೆಲೆಯನ್ನು ಲೀಟರಿಗೆ 1.50 ರೂ. ಇಳಿಸಿತ್ತು. ಅದೇ ವೇಳೆ ತಲಾ 1 ರೂ. ಇಳಿಸುವಂತೆ ತೈಲ ಮಾರಾಟ ಕಂಪೆನಿಗಳನ್ನು ಅದು ಕೇಳಿಕೊಂಡಿತ್ತು. ಪರಿಣಾಮವಾಗಿ ಉಭಯ ಉತ್ಪನ್ನಗಳ ಬೆಲೆ ಲೀಟರಿಗೆ 2.50 ರೂ. ಇಳಿದಿತ್ತು. 

ಇಂದು ಪೆಟ್ರೋಲ್‌ ಬೆಲೆಯಲ್ಲಿ ಯಾವುದೇ ಬದಲಾವಣೆ ಆಗಿಲ್ಲ; ಆದರೆ ಡೀಸೆಲ್‌ ಬೆಲೆ ಲೀಟರಿಗೆ 8 ಪೈಸೆ ಏರಿದೆ. ಕಳೆದ 10 ದಿನಗಳ ನಿರಂತರ ಏರಿಕೆಯಲ್ಲಿ  ಡೀಸೆಲ್‌ ಬೆಲೆ ಒಟ್ಟು 2.51 ರೂ. ಹೆಚ್ಚಾಗಿದೆ.