ವಿಜಯಪುರ : ಮುಸ್ಲಿಮರಿಂದ ಪೇಜಾವರ ಶ್ರೀ ಅರೋಗ್ಯಕ್ಕೆ ವಿಶೇಷ ಪ್ರಾರ್ಥನೆ

ವಿಜಯಪುರ: ಉಡುಪಿ ಪೇಜಾವರ ಮಠದ ವಿಶ್ವೇಶತೀರ್ಥ ಶ್ರೀಗಳು ಶೀಘ್ರ ಗುಣಮುಖರಾಗಲಿ ಎಂದು ವಿಜಯಪುರ ನಗರದಲ್ಲಿ ಮುಸ್ಲಿಂ ಸಮುದಾಯದವರು ವಿಶೇಷ ಪ್ರಾರ್ಥನೆ ಸಲ್ಲಿಸಿದರು.

ಸೋಮವಾರ ನಗರದ ಮನಗೂಳಿ ಅಗಸಿ ಬಳಿ ಇರುವ ಹಜರತ್‌ ಮರ್ತೂಜಾ ಖಾದ್ರಿ ದರ್ಗಾದಲ್ಲಿ ಪವಿತ್ರ ಹೂಗಳ ಚಾದರ ಸಮರ್ಪಿಸಿ, ವಿಶೇಷ ಪ್ರಾರ್ಥನೆ ಸಲ್ಲಿಸಿದರು. ಈ ವೇಳೆ ಶ್ರೀಗಳ ಸಾಮಾಜಿಕ ಸೇವೆ ಅದರಲ್ಲೂ ವಿಜಯಪುರ ಜಿಲ್ಲೆಯಲ್ಲಿ ಮಾಡಿರುವ ಸಮಾಜಮುಖಿ ಕಾರ್ಯಕ್ರಮಗಳನ್ನು ಸ್ಮರಿಸಿದ ಮುಸ್ಲಿಂ ಸಮುದಾಯದವರು, ಧಾರ್ಮಿಕ ಕಾರ್ಯಗಳ ಜತೆ ಸಾಮಾಜಿಕ ಕಾರ್ಯಗಳ ಮೂಲಕ ವಿಜಯಪುರ ಜಿಲ್ಲೆಯಲ್ಲಿ ಸಮಾಜಮುಖೀ ಸೇವೆ ಮಾಡುವಲ್ಲಿ ಶ್ರೀಗಳ ಪರಿಶ್ರಮವಿದೆ.

ಭೂಕಂಪ, ನೆರೆ ಹಾವಳಿ, ಭೀಕರ ಬರ ಹೀಗೆ ಪ್ರಕೃತಿ ವಿಕೋಪ ಸಂದರ್ಭದಲ್ಲಿ ನೆರವಿಗೆ ಧಾವಿಸಿ ಸಂತ್ರಸ್ತರಿಗೆ ಆತ್ಮಸ್ಥೈರ್ಯ ತುಂಬುವ ಕೆಲಸ ಮಾಡಿದ್ದಾರೆ ಎಂದು ಸ್ಮರಿಸಿದರು. ಇನಾಯತ್‌ ರೋಜೆವಾಲೆ, ಯಾಸೀನ್‌ ಜವಳಿ, ಅಸ್ಲಂ ಸೈಯದ್‌ ಅಮೀನ್‌, ಇಬ್ರಾಹಿಂ ಜವಳಿ, ಭಾಷಾ ಅತ್ತಾರ, ರೂಹ್‌ಉಲ್ಲಾ ಮುಲ್ಲಾ, ರಫೀಕ್‌ ಗೌರ, ಮೊಹಸೀನ್‌ ನಾಯ್ಕೋಡಿ, ಬಾಷಾ ರೋಜಿಂದಾರ ಇದ್ದರು.