ಸೆಮಿಫೈನಲ್‌ನಲ್ಲಿ ಮುಗ್ಗರಿಸಿದ ಪಾರುಪಳ್ಳಿ ಕಶ್ಯಪ್‌

ಇಂಚೆಯಾನ್‌ (ಕೊರಿಯಾ): ಕೊರಿಯಾ ಓಪನ್‌ ಬ್ಯಾಡ್ಮಿಂಟನ್‌ ಪಂದ್ಯಾವಳಿಯಲ್ಲಿ ಭಾರತದ ಕೊನೆಯ ಭರವಸೆಯಾಗಿದ್ದ ಪಾರುಪಳ್ಳಿ ಕಶ್ಯಪ್‌ ಸೆಮಿಫೈನಲ್‌ನಲ್ಲಿ ಎಡವಿದ್ದಾರೆ. ಶನಿವಾರ ನಡೆದ ಮುಖಾಮುಖೀಯಲ್ಲಿ ವಿಶ್ವದ ನಂ.1 ಆಟಗಾರ, ಜಪಾನಿನ ಕೆಂಟೊ ಮೊಮೊಟ ವಿರುದ್ಧ ಕಶ್ಯಪ್‌ 13-21, 15-21 ಅಂತರದ ಸೋಲನುಭವಿಸಿದರು.

ಮೊಮೊಟ-ಪಿ. ಕಶ್ಯಪ್‌ ಸ್ಪರ್ಧೆಯಲ್ಲಿ ಜಪಾನಿ ಆಟಗಾರನೇ ಫೇವರಿಟ್‌ ಆಗಿದ್ದರು. 40 ನಿಮಿಷಗಳ ಈ ಕಾದಾಟದಲ್ಲಿ ಮೊಮೊಟ ಅವರಿಗೆ ಸಾಟಿಯಾಗಲು ಕಶ್ಯಪ್‌ಗೆ ಸಾಧ್ಯವಾಗಲಿಲ್ಲ.

ಇದು ಮೊಮೊಟ-ಕಶ್ಯಪ್‌ ನಡುವೆ ನಡೆದ ಕೇವಲ 2ನೇ ಪಂದ್ಯ. ಇದಕ್ಕೂ ಮುನ್ನ 4 ವರ್ಷಗಳ ಹಿಂದೆ “ಇಂಡೋನೇಶ್ಯ ಓಪನ್‌’ನಲ್ಲಿ ಇವರಿಬ್ಬರು ಮುಖಾಮುಖೀ ಯಾಗಿದ್ದರು. ಅಂದು ಕೂಡ ಕಶ್ಯಪ್‌ ಸೋಲನುಭವಿಸಿದ್ದರು.

ಪಿ.ವಿ. ಸಿಂಧು, ಸೈನಾ, ಬಿ. ಸಾಯಿ ಪ್ರಣೀತ್‌ ಅವರೆಲ್ಲ ಈ ಕೂಟದಿಂದ ನಿರ್ಗಮಿಸಿದಾಗ ಪಿ. ಕಶ್ಯಪ್‌ ಭಾರತದ ಪಾಲಿನ ಆಶಾಕಿರಣವಾಗಿ ಉಳಿದಿದ್ದರು. ಆದರೆ ಎಡಗೈ ಆಟಗಾರ ಮೊಮೊಟ ವಿರುದ್ಧ ಕಶ್ಯಪ್‌ಗೆ ಮೇಲುಗೈ ಸಾಧಿಸಲಾಗಲಿಲ್ಲ. ಅವರು ಒತ್ತಡದಲ್ಲೇ ಆಡುತ್ತ ಸಾಗಿದರು.