Paris olympics: ಇಥಿಯೋಪಿಯಾದ ಟೋಲ ಮ್ಯಾರಥಾನ್‌ ಮ್ಯಾನ್‌

ಪ್ಯಾರಿಸ್‌: ಒಲಿಂಪಿಕ್ಸ್‌ ಪುರುಷರ ಮ್ಯಾರಥಾನ್‌ನಲ್ಲಿ ಕೀನ್ಯಾದ ಪ್ರಭುತ್ವ ಅಂತ್ಯಗೊಂಡಿದೆ. ಶನಿವಾರ ನಡೆದ ಮ್ಯಾರಥಾನ್‌ ಸ್ಪರ್ಧೆಯಲ್ಲಿ ಇಥಿಯೋಪಿಯಾದ ತಾಮಿರತ್‌ ಟೋಲ ನೂತನ ಒಲಿಂಪಿಕ್ಸ್‌ ದಾಖಲೆಯೊಂದಿಗೆ ಚಿನ್ನದ ಪದಕ ಗೆದ್ದರು.

ಟೋಲ 2 ಗಂಟೆ, 6 ನಿಮಿಷ, 26 ಸೆಕೆಂಡ್‌ಗಳಲ್ಲಿ ಸ್ಪರ್ಧೆ ಮುಗಿಸಿ ಒಲಿಂಪಿಕ್ಸ್‌ ದಾಖಲೆ ಬರೆದರು. ಬೆಲ್ಜಿಯಂನ ಬಶೀರ್‌ ಅಬ್ದಿ ರಜತ ಗೆದ್ದರು (2 ಗಂಟೆ, 6 ನಿಮಿಷ, 47 ಸೆಕೆಂಡ್‌). ಟೋಕಿಯೊದಲ್ಲಿ ಇವರು ಕಂಚಿನ ಪದಕ ಜಯಿಸಿದ್ದರು. ಪ್ಯಾರಿಸ್‌ನಲ್ಲಿ ಕೀನ್ಯಾದ ಬೆನ್ಸನ್‌ ಕಿಪ್ರುಟೊ ಅವರಿಗೆ ಕಂಚು ಒಲಿಯಿತು (2 ಗಂಟೆ, 7 ನಿಮಿಷ). ಎರಡು ಬಾರಿಯ ಹಾಲಿ ಚಾಂಪಿಯನ್‌, ಕೀನ್ಯದ ಎಲಿಯುಡ್‌ ಕಿಪೊcàಗೆ ಗುರಿ ಸಾಧಿಸಲು ಚಾಂಪಿಯನ್‌ ಟೋಲ ಅವರಿಗಿಂತ 8 ನಿಮಿಷಕ್ಕೂ ಹೆಚ್ಚಿನ ಅವಧಿ ತೆಗೆದುಕೊಳ್ಳಬೇಕಾಯಿತು.

ಒಲಿಂಪಿಕ್ಸ್‌ನಲ್ಲಿ ಕೀನ್ಯಾ ಹೊರತಾದ ದೇಶದವರು ಕೊನೆಯ ಸಲ ಚಾಂಪಿಯನ್‌ ಆದದ್ದು 2012ರ ಲಂಡನ್‌ ಗೇಮ್ಸ್‌ನಲ್ಲಿ. ಅಂದು ಉಗಾಂಡದ ಸ್ಟೀಫ‌ನ್‌ ಕಿಪ್ರೋಟಿಕ್‌ ಚಿನ್ನ ಜಯಿಸಿದ್ದರು.

ಐತಿಹಾಸಿಕ ಐಫೆಲ್‌ ಟವರ್‌ ಬಳಿ ಮ್ಯಾರಥಾನ್‌ ಸ್ಪರ್ಧೆ ಅಂತ್ಯಗೊಂಡಿತು. ಇದರೊಂದಿಗೆ ತಾಮಿರತ್‌ ಟೋಲ 24 ವರ್ಷಗಳ ಬಳಿಕ ಇಥಿಯೋಪಿಯಾಕ್ಕೆ ಒಲಿಂಪಿಕ್ಸ್‌ ಮ್ಯಾರಥಾನ್‌ನಲ್ಲಿ ಚಿನ್ನದ ಪದಕ ತಂದಿತ್ತ ಹೆಗ್ಗಳಿಕೆಗೆ ಪಾತ್ರರಾದರು. ಅಂದು ಗೆಜಹೇನ್‌ ಅಬೇರ ಚಾಂಪಿಯನ್‌ ಆಗಿದ್ದರು (2 ಗಂಟೆ, 10 ನಿಮಿಷ, 11 ಸೆಕೆಂಡ್‌).