Paris Olympics; ಬಾಲಾಜಿ, ಭಾಂಬ್ರಿ: ಜತೆಗಾರನ ಹೆಸರು ಸೂಚಿಸಿದ ಬೋಪಣ್ಣ

ಹೊಸದಿಲ್ಲಿ: ಭಾರತದ ಟಾಪ್‌ ಡಬಲ್ಸ್‌ ಆಟಗಾರ ರೋಹನ್‌ ಬೋಪಣ್ಣ ಪ್ಯಾರಿಸ್‌ ಒಲಿಂಪಿಕ್ಸ್‌ನಲ್ಲಿ ತಮ್ಮ ಜತೆಗಾರನನ್ನಾಗಿ ಎನ್‌. ಶ್ರೀರಾಮ್‌ ಬಾಲಾಜಿ ಅಥವಾ ಯುಕಿ ಭಾಂಬ್ರಿ ಅವರನ್ನು ಆಯ್ಕೆ ಮಾಡಿಕೊಳ್ಳುವ ಸಾಧ್ಯತೆ ಇದೆ.

ರೋಹನ್‌ ಬೋಪಣ್ಣ ಇವರಿಬ್ಬರ ಹೆಸರನ್ನು ಸೂಚಿಸಿದ್ದು, ಪ್ಯಾರಿಸ್‌ ಒಲಿಂಪಿಕ್ಸ್‌ ಮತ್ತು ಅಖಿಲ ಭಾರತ ಟೆನಿಸ್‌ ಒಕ್ಕೂಟ (ಎಐಟಿಎ) ಇವರ ಆಯ್ಕೆಯನ್ನು ಪರಿಗಣಿಸುವ ಸಾಧ್ಯತೆ ಇದೆ.

44 ವರ್ಷದ ರೋಹನ್‌ ಬೋಪಣ್ಣ ಡಬಲ್ಸ್‌ ರ್‍ಯಾಂಕಿಂಗ್‌ನಲ್ಲಿ 4ನೇ ಸ್ಥಾನದಲ್ಲಿದ್ದಾರೆ. ನಿಯಮಾವಳಿಯಂತೆ, ಟಾಪ್‌-10 ಯಾದಿಯಲ್ಲಿರುವ ಆಟಗಾರಿಗೆ ತಮ್ಮ ಜತೆಗಾರನನ್ನು ಆರಿಸುವ ಹಕ್ಕು ಇರಲಿದೆ. ಆದರೆ ಈ ಆಟಗಾರರು ಎಟಿಪಿ ಹಾಗೂ ಡಬ್ಲ್ಯುಟಿಎ ರ್‍ಯಾಂಕಿಂಗ್‌ನ ಯಾದಿಯ ಟಾಪ್‌-300ರಲ್ಲಿ ಇರುವುದು ಅಗತ್ಯ.

ಪ್ಯಾರಿಸ್‌ ಒಲಿಂಪಿಕ್ಸ್‌ಗೆ ಜೂನ್‌ 10ರ ರ್‍ಯಾಂಕಿಂಗ್‌ ಮಾನದಂಡವನ್ನು ಅನುಸರಿಸಲಾಗುವುದು. ಆಗ ಫ್ರೆಂಚ್‌ ಓಪನ್‌ ಗ್ರ್ಯಾನ್‌ಸ್ಲಾಮ್‌ ಪಂದ್ಯಾವಳಿ ಮುಗಿದಿರುತ್ತದೆ.