Paris Olympics: ರೈಲ್ವೇ ಜಾಲದ ಬಳಿಕ ಫೈಬರ್‌ ಜಾಲದ ಮೇಲೆ ದಾಳಿ!

ಪ್ಯಾರಿಸ್‌: ಒಲಿಂಪಿಕ್ಸ್‌ ಉದ್ಘಾಟನ ದಿನವಾದ ಶುಕ್ರವಾರ (ಜು. 26) ಪ್ಯಾರಿಸ್‌ನಲ್ಲಿ ರೈಲ್ವೇ ಜಾಲದ ಮೇಲೆ ಬೆಂಕಿ ದಾಳಿಯಾಗಿತ್ತು. ಈ ದಾಳಿ ಪ್ರಕರಣ ಇಲ್ಲಿಗೇ ನಿಂತಿಲ್ಲ, ರವಿವಾರ ರಾತ್ರಿ ಅಲ್ಲಿನ ದೂರಸಂಪರ್ಕ ಜಾಲದ ಮೇಲೂ ದಾಳಿ ನಡೆದಿದೆ. ಇದರಿಂದ ಫೈಬರ್‌ ನೆಟ್‌ವರ್ಕ್‌ಗೆ ಸಮಸ್ಯೆಯಾಗಿದೆ ಎಂದು ಸ್ಥಳೀಯ ಟೆಲಿಕಾಂ ಕಂಪೆನಿಗಳು ತಿಳಿಸಿವೆ.

ಪ್ಯಾರಿಸ್‌ನ ಹಲವು ಕಡೆ ಫೈಬರ್‌ ಲೈನ್‌ಗಳನ್ನು ಧ್ವಂಸಗೊಳಿಸಲಾಗಿದೆ. ಹಲವು ಕಡೆ ದೂರಸಂಪರ್ಕ ವ್ಯತ್ಯಯವಾಗಲು ಕಾರಣವಾಗಿದ್ದರೂ ಒಲಿಂಪಿಕ್ಸ್‌ ಸಂಘಟಕರು ಮಾತ್ರ ತಮಗೆ ಏನಾದರೂ ತೊಂದರೆಯಾಗಿದೆಯೇ ಎಂದು ಬಾಯಿ ಬಿಟ್ಟಿಲ್ಲ. ಆದರೆ ಫ್ರಾನ್ಸ್‌ ಸರಕಾರದ ಕನಿಷ್ಠ 6 ಇಲಾಖೆಗಳಿಗೆ ಇದರಿಂದ ತೊಂದರೆಯಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

ಸೆನ್‌ ನದಿ ನೀರು ಶುದ್ಧವಾಗಿಲ್ಲ
ಹನ್ನೆರಡು ಸಾವಿರ ಕೋಟಿ ರೂ. ಖರ್ಚು ಮಾಡಿ ಪ್ಯಾರಿಸ್‌ನ ಸೆನ್‌ ನದಿಯನ್ನು ಶುದ್ಧೀಕರಿಸಿದ್ದರೂ ಪ್ರಯೋಜನವಾಗಿಲ್ಲ. ಇದರಲ್ಲಿ ಈಜು ಸ್ಪರ್ಧೆಗಳನ್ನು ನಡೆಸುವಷ್ಟು ನೀರಿನ ಗುಣಮಟ್ಟ ವಿಲ್ಲ ಎಂದು ತಜ್ಞರು ಹೇಳಿದ್ದಾರೆ. ಆದ್ದರಿಂದ ಟ್ರಯಾಥ್ಲಾನ್‌ ಸಂಘಟಕರು ಸತತ 2ನೇ ದಿನವೂ ಇಲ್ಲಿ ನಡೆಯಬೇಕಾದ ಈಜು ಸ್ಪರ್ಧೆಯನ್ನು ಮುಂದೂ ಡಿದ್ದಾರೆ. ನದಿಯ ನೀರಿನ ಗುಣಮಟ್ಟ ಮುಂದಿನ ಅವಧಿಯಲ್ಲಿ ಸುಧಾರಿಸಿದರೆ, ಇಲ್ಲಿ ಟ್ರಯಾಥ್ಲಾನ್‌ ಕ್ರೀಡೆಯ ಈಜು ಸ್ಪರ್ಧೆ ನಡೆಯುತ್ತದೆ. ಇಲ್ಲವಾದರೆ ಈಜನ್ನು ಮಾತ್ರ ರದ್ದು ಮಾಡಲಾಗುತ್ತದೆ.